Ndɛ Nga Nyanmiɛn I Nuan Ijɔfuɛ Oze Kannin'n 12 - NYANMIƐN NDƐ'N 1998

Zakɔb i mma'm bé sa tɛ nga be yoli'n

¹ Anannganman'n wan yoo: «Efraimfuɛ'm be fa be ato'n sin yia min pɛ! Izraɛlfuɛ'm be fa lakalɛ'n sin yia min. Zidafuɛ'm be yɛ be nin min tɛ nanti-ɔ, yɛ be fa bé wun mantan min bɔ n ti Nyanmiɛn bɔ min nzuɛn nin klɔ sran liɛ'n ti-man kun nin-ɔn.

² Efraimfuɛ'm be fa ngo ko man Eziptfuɛ mun. Be janvuɛ sɔ mun bɔ be ti-man like fi'n, bɔ be ti kɛ aunngban sa'n, yɛ be nin be nanti-ɔ. Ɔliɛ Asirifuɛ'm bɔ be tɛ ti kɛ wia afiliɛ lɔ aunngban klakla sa'n, be yɛ ɔ nin be di anuansɛ nin-ɔn. Gblɛ nin sa tɛtɛ'n yɛ ɔ'a kaci Efraimfuɛ'm be junman-an .

³ Anannganman'n nin Zidafuɛ mun be lɛ ndɛ. Zakɔb i nvlefuɛ'm be nyoliɛ'n ti, ɔ wa tu be fɔ. Ɔ wa man be nyoliɛ'n i nuan akatua.

⁴ Zakɔb i gblɛ'n, ɔ nin i fin i nin klun. Kɛ ɔ ´sɔ i niaan bian jasin nanndi'n, wuun ɔ tɛ o i nin klun . Yɛ kɛ ɔ wa yoli kpɛnngbɛn'n, ɔ nin Nyanmiɛn be tuli,

⁵ ɔ nin anz kun be tuli ngondin, ɔ boli anz'n. Nan ɔ'a sun ɔ'a se anz'n kɛ ɔ `yrɛ i nuan klanman mɛn i. Ɔ nin Nyanmiɛn be yiali Betɛl lɔ, lɔ yɛ Nyanmiɛn kannin ndɛ kleli i nin-ɔn .

⁶ Nyanmiɛn b'ɔ sie mɛn wunmuan'n, bɔ be flɛ i Anannganman'n seli i kɛ:

⁷ ‹Sa ɔ sin bla min sin. Yo sa kpa, yo sran ndɛnman sufuɛ. Nán yaci min b'ɔ n ti ɔ Nyanmiɛn'n min su lafilɛ.›

⁸ Kanaanfuɛ'm bé sa nun toe'm be ti-man kpa, akpo bolɛ'n yɛ ɔ ti be junman-an.

⁹ Efraimfuɛ'm be ko se kɛ yoo: ‹Nanwlɛ, e ti kpa, y'a nyan e wun, y'a nyan ninnge kpanngban, sanngɛ i kwlaa sɔ'n ti ye junman'n su mmlusuɛ. ?Yɛ mmlusuɛ nyanlɛ'n, wan yɛ i waan ɔ ti tɛ-ɔ ?›

¹⁰ M bɔbɔ min Anannganman bɔ kɛ amun tɛ o Ezipt lɔ'n yɛ n yoli amun Nyanmiɛn'n, n wa yo man amun ´tran tannin sua bo ekun kɛ e nin amun e wun wunlɛ klikli nun'n sa .

¹¹ N kannin ndɛ n kleli mín nuan ijɔfuɛ mun. N fali aolia nun ninnge kpanngban n kleli be, n fali nyanndra n wlali bé nuan be kan kleli amun.

¹² Sa tɛ kpa nga be flɛ sa tɛ'n yɛ Galaadfuɛ'm be yoli-ɔ. I sɔ'n ti be wa nunnun mlɔnmlɔn. Gilgal lɔ'n, kɛ a ´to ɔ nyin nian-an, a wun kɛ be su fa nannin be ´yi tɛ. I sɔ'n ti'n, bé sraka yiwlɛ sɔ'm be wa bubu, be wa tian ninnge nga be fa yoli be'n be nuan ɔklɔɔ kɛ yɛbuɛ bɔ be tian bé nuan fie su lɔ'n sa.

¹³ Zakɔb wanndi ɔli Mezopotami i nglo lɔ lika'n nun lɔ. Bla jalɛ ti Zakɔb b'ɔ suan Izraɛl ko yoli kanga. Bla dunman nun ti ɔ ko niannin nnɛn'm be su .

¹⁴ Anannganman sunmannin i nuan ijɔfuɛ kun, i yɛ ɔ ko fali Izraɛlfuɛ mun Ezipt lɔ bali-ɔ. Nyanmiɛn nuan ijɔfuɛ kun kusu yɛ ɔ sieli i kɛ ɔ niɛn i sran'm be su-ɔ.

¹⁵ Efraimfuɛ'm be wlali Anannganman'n i klunngbɔ, be Min'n kusu fali bé sa tɛ i su afɛ'n guali be su. Sran'm be finfin nga be yoli be'n, ɔ wa fa yo be wie.»