Ndɛ Nga Nyanmiɛn I Nuan Ijɔfuɛ Oze Kannin'n 11 - NYANMIƐN NDƐ'N 1998

Izraɛlfuɛ'm be si-man ye, sanngɛ Nyanmiɛn ti aunnvuɛ sifuɛ

¹ «Kɛ Izraɛl tɛ yo sɛsɛ kan'n, yɛ n sɔli i klolɛ-ɔ, i nun sɔ'n nun yɛ n flɛli mín wa'n kɛ ɔ jao Ezipt lɔ bla-a .

² Sanngɛ kɛ ɔ ´ju kɔ siɛn'n i yɛ'n, kɛ n flɛ i kpa'n, wuun blɛ li yɛ b'a se i kɛ ɔ ´wanndi min-ɔn. Ɔliɛ Baal mun yɛ be yi tɛ be man be-ɔ. Amuɛn mun yɛ be yra ansans be man be-ɔ.

³ Min bɔ n yoli Efraim i taataa'n, min bɔ n juli i'n, ɔ'a si-man kɛ n niannin i lika.

⁴ Kɛ n ko yo'n yɛ n yoli i-ɔ, n kloli i klolɛ kpa, e nin i e trannin kɛ siɛ nin ba sa, n fɛli i m boli min wue su, n wlɛli i nuan nun aliɛ.

⁵ Izraɛlfuɛ'm be su sa-man be sin Ezipt lɔ, sanngɛ Asiri'n yɛ ɔ ´sie be-ɔ, afin be waan be sa-man bé sin mín wun wa.

⁶ Alɛ'n ´yri be klɔ'm be su, ɔ ´saci klɔ wun anuan mun, ɔ ´di klɔ su sran mun. Be akunndan nga be jajali'n ti alɛ'n ´di be.

⁷ Gblɛ kpɛlɛ'n yɛ min sran'm be fa cici bé ti-ɔ, be flɛ be kɛ be jaso, sanngɛ ngbɛn-ɔn.

⁸ ?Efraimfuɛ mun, n `yo amun sɛ? Izraɛlfuɛ mun, n yi amun m man sran mun-ɔn ɔ yo-man ye, n yo amun kɛ Adma sa-a, ɔ yo-man ye, n yo amun kɛ Zɛbɔim sa kusu-ɔ ɔ yo-man ye. Min akunndan'n ɔ'a sanngan, n wun-man mín wun yowlɛ kunngba.

⁹ Min ya dan nga n fali'n, n su yo-mɛn i su sa, n su saci-man Efraim kun, afin nán klɔ sran yɛlɛ min, Nyanmiɛn yɛlɛ min, n ti min liɛ ngunmin. N ti Nyanmiɛn yɛ n wo amun afiɛn lɛ-ɔ. I sɔ'n ti'n, n su ba-man amún wun ya su.»

¹⁰ Be nga be bo be sanndili'n, be wa su Anannganman'n su, Anannganman b'ɔ kpan kɛ asɔmɔli sa'n, be ´su i su. Kɛ ɔ ´kpan sa'n, i mma'm bɔ be o jenvie'n i bue kun lɔ'n be ´usu yɛ be ´ba-a.

¹¹ Wie'm be ´fin Ezipt yɛ be ´ba-a. Be ´lɔngɔ su be ´ba kɛ anunman mun sa, be ´fin Asiri be lɔngɔ su be ´ba kɛ auble mun sa. «Be ba-a, n ´fa be n ´kɔ be tranwlɛ'm be nun.» Anannganman'n yɛ ɔ kan i sɔ ndɛ nin-ɔn.