Ndɛ Nga Nyanmiɛn I Nuan Ijɔfuɛ Oze Kannin'n 1 - NYANMIƐN NDƐ'N 1998

¹ Fluwa nga i nun ndɛ'm be ti Anannganman i ndɛ yɛ ɔ fa wlɛli Beeri i wa Oze nuan kɛ ɔ `kan-an. Kɛ ɔ ´fa wlɛ i nuan sɔ'n, wuun Zɔas i wa Zeroboam yɛ ɔ ti famiɛn Izraɛl mɛn'n su-ɔ. I blɛ kunngba sɔ'n nun yɛ Ozias, nin Zɔtam, nin Akaz, ɔ nin Ezekias be yoli famiɛn Zida lɔ-ɔ.

Oze i tekle bla jalɛ ndɛ

² Ndɛ nga Anannganman'n fa wlali Oze nuan'n, i bo bolɛ'n yɛ. Ɔ seli Oze kɛ: «Ko ja tekle bla kun nan a nin i be `wu wlaka ba. Afin min sran nga be o min mɛn'n nun'n, tekle'n yɛ be si-ɔ. Sa ti bɔ n se kɛ be si tekle'n yɛlɛ kɛ, be kacili bé sin be sili min, kpɛkuun amuɛn mun yɛ be sɔ be-ɔ.»

³ Yɛ Oze kɔ jali Diblaim i wa talua nga be flɛ i Gɔmɛr'n nan ɔ nin i b'a wu ba yasua kun.

⁴ Anannganman seli Oze kɛ: «Flɛ i kɛ Zizreɛl, afin sɛ ɔ di le nnyɔn kun'n, n wa kle Zei anunman'm be nun, sran nga be kunnin be Zizreɛl lɔ'n ti. Kpɛkuun n wa yo man Izraɛl mɛn'n nun sran fi su yo-man famiɛn kun .

⁵ Le kun sɔ nun'n n wa yo man Izraɛl safunyrɛn'm be fanngan'n ɔ wie Zizreɛl lika kpɛtɛkplɛɛ'n nun lɔ.»

⁶ Gɔmɛr wunnzɛli ekun, ɔ wuli ba bla kun. Yɛ Anannganman'n seli Oze kɛ: «Flɛ i kɛ Nsi-man-be-aunnvuɛ, yɛlɛ kɛ n su si-man Izraɛlfuɛ'm be aunnvuɛ kun, n su yaci-man bé wun sa n cɛ-man be kun.

⁷ Sanngɛ n wa si Zidafuɛ'm be aunnvuɛ. M bɔbɔ min Anannganman bɔ n ti be Nyanmiɛn'n n ´de be. Delɛ nga n ´de be'n, nán ta nin tokofi, nin alɛ kunlɛ, nin nnɛn kpanngɔ mun, ɔ nin nnɛn kpanngɔ su fufuɛ mun yɛ n ´fa de be-ɔ .»

⁸ Kɛ Gɔmɛr kpɛli Nsi-man-be-aunnvuɛ i nyɔnflɛn'n, ɔ wunnzɛli nan ɔ'a wu ba yasua kun.

⁹ Anannganman seli Oze kɛ: «Flɛ i kɛ Aofuɛ, afin nán min sran yɛlɛ amun kun, amun kusu nán amun like fi yɛlɛ min kun.»