Hébreu 9 - NYANMIƐN NDƐ'N 1998

Sa nga be yo i laa man bé wun sa'n wie'n, nin siɛn liɛ'n

¹ Aenguɛ nga Nyanmiɛn nin sran'm be trɛli i laa'n, ɔ lɛ i Nyanmiɛn sulɛ'n su mmla nin i sua asiɛ'n su wa .

² Afin be kplannin tannin sua kun, i nun sua ba klikli'n, be flɛ i Nyanmiɛn lika. Kannin siewlɛ, nin tabli ɔ nin i su kpaun nga be fa man Nyanmiɛn'n be o lɔ .

³ Yɛ tannin i nnyɔn su'n i sin lɔ sua ba liɛ'n be flɛli Nyanmiɛn lika kpa tra su .

⁴ Nyanmiɛn sɔwlɛ b'ɔ ti sika ɔkwlɛ'n, bɔ be yra ayre fannin su'n, ɔ nin Nyanmiɛn i alaka, bɔ be klo sika ɔkwlɛ guɛli i wun'n be o lɔ. Sika ɔkwlɛ sɛma'n bɔ mani'n wo nun'n, nin Aarɔn kpɔnman b'ɔ fɛfɛli'n, ɔ nin yɛbuɛ paplaapla bɔ be klɛ aenguɛ nga Nyanmiɛn waan ɔ nin sran'm be ´tra bé su'n, be wo alaka sɔ'n nun .

⁵ Anz bɔ be nian Nyanmiɛn i ninnge'm be su'n bɔ be yi Nyanmiɛn i wafa ng'ɔ ti'n i nglo'n, be o alaka sɔ'n su, be ndɛwa'n kata Nyanmiɛn sɔwlɛ'n su. Sanngɛ nɛ́n i kanlɛ'n ɔ nin i nun yiyilɛ i cɛn yɛlɛ ndɛ.

⁶ Kɛ be siesieli ninnge sɔ'n be kwlaa sɔ'n, cɛn'n kwlaa Nyanmiɛn nyrun jranfuɛ'm be wlu sua ba klikli'n nun be di be junman'n.

⁷ Sanngɛ sua ba i nnyɔn su'n, Nyanmiɛn nyrun jranfuɛ'm be su kpɛn'n i ngunmin yɛ ɔ wlu lɔ afuɛ kun nun kpɛ kun-ɔn. Kɛ ɔ ´wlu lɔ'n, san ɔ ´fɛ i bɔbɔ i ti nnɛn'n i mmoja'n, ɔ nin sran'm be fɔnlɛ'n i ti nnɛn'n i mmoja'n yɛ ɔ wlu lɔ-ɔ .

⁸ Nyanmiɛn Wawɛ'n fɛ i sɔ sa'n kle e kɛ kɛ tannin sua klikli liɛ'n tɛ o lɛ'n, wuun atin ng'ɔ kɔ Nyanmiɛn lika kpa'n nun lɔ'n nian bo-man.

⁹ Ɔ ti blɛ nga e o nun yɛ'n liɛ'n i nzɔliɛ. Ɔ kle kɛ like nga be fa man Nyanmiɛn'n nin nnɛn nga be fa sɔ i'n, ɔ man be nga be mɛn i sɔ like'n be klun titilɛ'n wie-man.

¹⁰ Afin be ti ndidiɛ ninnge, nin like nɔnnɔnlɛ, ɔ nin wunnzinlɛ fanunfanun'm bé su mmla bɔ be di su lele fa juli cɛn nga Nyanmiɛn kacili like'n kwlaa uflɛ'n.

¹¹ Sanngɛ Krist bali, ɔ wa yoli Nyanmiɛn nyrun jranfuɛ'm be su kpɛn ninnge kpakpa bɔ be wa ba'n be ti. Tannin sua ng'ɔ di i junman nun'n ti dan, ɔ ti kpa tra laa liɛ'n. Nán sran yɛ ɔ kplannin-ɔn, ɔ man ɔ ti-man mɛn nga Nyanmiɛn yili i yɛ'n i nun like'm be wie.

¹² Kɛ Krist ´wlu Nyanmiɛn lika kpa nun'n, nán boli kpakpuɛ nin nannin ba mmoja yɛ ɔ fa ɔli-ɔ, sanngɛ ɔ fɛli i bɔbɔ i mmoja'n, ɔ wluli lɔ kpɛ kunngba cɛ, ɔ su wlu-man lɔ kun, ɔ man ɔ deli ye mlɔnmlɔn.

¹³ Boli kpakpuɛ nin nannin tola'm be mmoja'n, be fa kpɛntɛn-kpɛntɛn be nga be kan fiɛn'n bé wun be fa yo be saun. Nannin tola bɔ be yrɛ i'n, be fɛ i nzuɛn'n be guagua bé wun ekun .

¹⁴ Sɛ ɔ ti sɔ'n, Krist kwla fɛ i mmoja liɛ'n kusu yo like b'ɔ tra wun fiɛn kplolɛ'n fatifati! Kɛ ɔ ti aolia nun sran b'ɔ ti anannganman'n ti'n, ɔ fɛ i bɔbɔ bɔ fiɛn kaan sa nun-mɛn i wun'n mannin Nyanmiɛn. Ɔ man like nga be yo-man like fi ye bɔ e yo be man e klun titi ye'n, ɔ ´wie nan e ´kwla su Nyanmiɛn b'ɔ lafi-man'n!

¹⁵ I sɔ'n ti yɛ Krist ti aenguɛ uflɛ nga Nyanmiɛn waan ɔ nin sran'm be tra i nun jranfuɛ nin-ɔn. I wulɛ b'ɔ wuli'n ti'n, be nga be fa aenguɛ klikli nga Nyanmiɛn ɔ nin sran'm be ´trali'n su, bɔ be yo sa tɛ'n, ɔ de be i su saɛ'n nun. Ɔ man be nga Nyanmiɛn flɛli be'n, be ´nyan like kpakpa ng'ɔ wie-man mlɔnmlɔn bɔ i waan ɔ ´fa man be'n.

¹⁶ Sɛ sran kun sie aja'n, san ɔ ´wu nan b'a wun aja sɔ'n i wlɛ sakpa.

¹⁷ San sran ng'ɔ sieli aja'n ɔ ´wu nan b'a di aja'n, afin kɛ ɔ nian wu-man'n, be kwla di-man.

¹⁸ I sɔ'n ti'n, kɛ be ´bo aenguɛ klikli nga Nyanmiɛn waan ɔ nin sran be ´tra'n, i su falɛ'n i bo'n, mmoja yɛ be fa boli i bo-ɔ.

¹⁹ Afin kɛ Moiz kan mmla'n kwlaa kleli sran mun'n, ɔ fali nannin ba mun nin boli kpakpuɛ'm be mmoja'n guali nun nzue, yɛ ɔ fali bua ndrɛ ɔkwlɛ nin izɔp nnya boli nun, nan ɔ'a fa kpɛntɛn-kpɛntɛn mmla fluwa'n nin sran'm be kwlaa bé wun.

²⁰ Ɔ seli kɛ: «Mmoja ng'ɔ o yɛ'n ti aenguɛ nga Nyanmiɛn waan ɔ nin amun be ´tra'n nin like nga i waan an yo'n i mmoja .»

²¹ Ɔ fa mmoja'n kpɛntɛn-kpɛntɛnnin tannin sua'n nin Nyanmiɛn ninnge'm be kwlaa bé wun.

²² Be klɛli i mmla'n nun kɛ be fa mmoja yo ninnge'm be kpanngban lika kpa be wun saun, ɔ man sɛ be kun-man nnɛn bɔ i mmoja gua-man'n, Nyanmiɛn yaci-man bé wun sa'n cɛ-man be .

Krist fɛ i wun sɔli Nyanmiɛn

²³ I sɔ'n ti'n, sɛ bé yo ninnge nga be ti nyanmiɛn su lɔ liɛ'n nzɔliɛ bé wun saun sɔ'n, ɔ ti su. Sanngɛ nyanmiɛn su lɔ liɛ'n bɔ be ti i kpafuɛ'n, san be ´nyan nnɛn bɔ i kpa tra nga'n, nan b'a yo bé wun saun.

²⁴ Afin nán Nyanmiɛn lika b'ɔ ti sran sa nuan b'ɔ ti i kpafuɛ'n i nzɔliɛ i nun yɛ Krist wluli-ɔ, sanngɛ ɔ ɔli nyanmiɛn bɔbɔ'n su lɔ Nyanmiɛn wun lɔ, ɔ man kɛ e ´se yɛ'n, ɔ jran é nuan.

²⁵ Nyanmiɛn nyrun jranfuɛ'm be su kpɛn'n, afuɛ nuan kwlaa ɔ fa nnɛn mmoja wlu Nyanmiɛn lika kpa'n nun. Sanngɛ Krist liɛ'n, ɔ'a wlu-man lɔ kɛ ɔ fɛ i wun sɔ Nyanmiɛn titi,

²⁶ afin sɛ ɔ ti kɛ ɔ yoli sɔ'n, wuun kɛ ɔ fin mɛn'n i bo bolɛ nun'n, ɔ ´wun nyrɛnnɛn tititi. Sanngɛ siɛn'n bɔ y'a ju mɛn'n i bue nuan'n, ɔ yili i wun nglo kpɛ kunngba nan i wun b'ɔ fa sɔli Nyanmiɛn'n ti'n, sa tɛ'n `wie.

²⁷ Be sieli i kɛ sran wu kpɛ kunngba, i sin be fɛ i kɔ Nyanmiɛn ja su.

²⁸ I kunngba'n, kɛ ɔ ´yo nan Krist a fa sran kpanngban bé wun sa'n, i kusu fɛ i wun sɔli Nyanmiɛn kpɛ kunngba. Balɛ nga ɔ wa ba ekun'n, nán sa tɛ'n ti-ɔ, sanngɛ ɔ ´ba be nga bé nyin tɛ i sin'n be delɛ .