Hébreu 8 - NYANMIƐN NDƐ'N 1998

Jésus ti e Nyanmiɛn nyrun jranfuɛ'm be su kpɛn

¹ An `nian ndɛ nga e kan'n i nun nanndoliɛ'n yɛ: e lɛ Nyanmiɛn nyrun jranfuɛ'm be su kpɛn kun b'ɔ ti Nyanmiɛn Kpli b'ɔ ti Wlengbi'n i bia'n i fama su nyanmiɛn su lɔ .

² Ɔ di Nyanmiɛn nyrun jranlɛ junman Nyanmiɛn lika kpa'n bɔ yɛlɛ tannin sua kpa nga nán sran yɛ ɔ kplannin bɔ e Min'n bɔbɔ yɛ ɔ kplannin'n nun.

³ Nyanmiɛn nyrun jranfuɛ'm be su kpɛn kwlaa nga be sie be'n, be sie be kɛ be `fa like nga sran'm be waan be ´fa man Nyanmiɛn'n nin nnɛn nga be ´fa sɔ i'n, be fa mɛn i. Ɔ man e liɛ'n kusu, ɔ fata kɛ ɔ nyan like wie fa mɛn i.

⁴ Sɛ ɔ ti asiɛ'n su wafuɛ'n, wuun ɔ su yo-man Nyanmiɛn nyrun jranfuɛ, afin be nga be klɛli mmla'n nun kɛ be fa like nga sran'm be waan be ´fa man Nyanmiɛn'n be fa mɛn i'n, i sɔfuɛ'm be o lɛ.

⁵ Be Nyanmiɛn nyrun jranlɛ junman nga be di'n, ɔ ti nyanmiɛn su lɔ liɛ kpa'n i nzɔliɛ ɔ nin i wawɛ. Kɛ Moiz liɛ'n kusu ti sɔ-ɔ. I nun nga ɔ wa kplan tannin sua'n, Nyanmiɛn seli i kɛ: «I wafa nga n kleli wɔ oka'n su lɔ'n, niɛn i kwlaa'n su kpa yo .»

⁶ Sanngɛ siɛn'n Nyanmiɛn nyrun jranlɛ junman b'ɔ ti kpa tra be nga'm be liɛ'n, b'a fa Krist a sie su, afin aenguɛ nga Nyanmiɛn waan ɔ nin sran'm be ´tra'n, ɔ ti i nun jranfuɛ. Aenguɛ sɔ'n i kpa tra laa liɛ'n, afin aenguɛ nga Nyanmiɛn waan ɔ ´tra be siɛn'n be ti kpa tra laa liɛ'n.

⁷ Aenguɛ nga Nyanmiɛn waan ɔ nin sran'm be ´trɛ i laa'n, sɛ ɔ ti kɛ fiɛn nun-mɛn i wun'n, wuun b'a se-man kɛ be ´kunndɛ uflɛ.

⁸ Sanngɛ Nyanmiɛn kputu i sran mun, afin be klɛli i Nyanmiɛn Ndɛ'n nun kɛ: «E Min'n seli kɛ: ‹Cɛn wie lele'n, e nin Izraɛl nvle'n nin Zida nvle'n e wa tra aenguɛ uflɛ.

⁹ Aenguɛ sɔ'n nin nga e nin be nannan mun e trali'n i nun bɔ n ´fa be Ezipt lɔ m ba'n, ɔ su yo-man kun.› E Min'n seli kɛ: ‹I sɔ'n aenguɛ liɛ'n, b'a yo-mɛn i su sa'n, ɔ man n kusu m'an nian-man be lika.›

¹⁰ E Min'n seli ekun kɛ: ‹Aenguɛ nga cɛn wie e nin Izraɛl nvle'n e ´tra'n yɛ: N man min mmla'n ´tran be klun, yɛ n ´fa min mmla'n klɛ be anwlɛn'n nun. N ´yo be Nyanmiɛn, yɛ be kusu be ´yo min sran.

¹¹ Sran fi su kle-mɛn i wiengu like kun, yɛ ɔ kle-man i niaan like kun, ɔ su se-man be kɛ: An mantan Anannganman! Yɛlɛ kɛ kɛ ɔ fin be kanngan'm be nun lele fa ju be kpɛnngbɛn'm be nun'n, be kwlaa be ´si min.

¹² Sa nga be yoli min'n, n ´yaci cɛ be. N su bo-man bé sa tɛ'n su n su di-man jɔlɛ kun .› »

¹³ Kɛ Nyanmiɛn kan kɛ ɔ ´yo sa uflɛ man sran'n, ɔ kle kɛ laa liɛ'n i blɛ'n ɔ'a sin, afin nga bɔ ɔ'a cɛ, bɔ i blɛ liɛ'n su sin'n, ɔ cɛ kaan be su di-man su kun.