Hébreu 7 - NYANMIƐN NDƐ'N 1998

Nyanmiɛn nyrun jranfuɛ Mɛlkizedɛk

¹ Mɛlkizedɛk sɔ'n ti Salɛm famiɛn nin Nyanmiɛn bɔ like fi nun-mɛn i sin'n i nyrun jranfuɛ. Kɛ Abraam nin famiɛn mun be ko kunnin b'ɔ kwlali be b'ɔ ´ba'n, Mɛlkizedɛk kpɛli i atin, yɛ ɔ yrɛli i nguan.

² Yɛ Abraam fali like ng'ɔ nyɛnnin i'n i kwlaa i blusu'n mɛnnin i. I dunman'n i bo'n kun yɛlɛ famiɛn b'ɔ yo sa i nuan su, yɛ kun ekun yɛlɛ Salɛm i famiɛn bɔ i bo yɛlɛ alaje'n i min'n .

³ Be si-mɛn i si, nin i nin, ɔ nin i nannan, y'a kɛnngɛn-mɛn i ndɛ kɛ be wuli i yɛ ɔ wuli. Ɔ ti kɛ Nyanmiɛn Wa'n sa, ɔ man ɔ ´kɛ i Nyanmiɛn nyrun jranlɛ'n su tititi.

⁴ An `nian bian sɔ'n i nyrun b'ɔ lɛ i-ɔ! Afin Nannan Abraam bɔbɔ fa like ng'ɔ nyɛnnin i alɛ'n nun'n i nun kpakpafuɛ'n i blusu'n mɛnnin i!

⁵ Levifuɛ'm bɔ be di Nyanmiɛn nyrun jranlɛ junman'n, kannzɛ be nin be niaan Izraɛlfuɛ'm be kwlaa be ti Abraam anunman'n, be klɛli i mmla'n nun kɛ be `de be niaan sɔ mun be ninnge'm be blusu'n.

⁶ Sanngɛ Mɛlkizedɛk b'ɔ fin-man Levi osu nun'n, ɔ fali Abraam i ninnge'm be blusu'n, yɛ Abraam bɔ Nyanmiɛn seli i kɛ ɔ ´yo like kpa mɛn i'n, Mɛlkizedɛk sɔ'n yrɛli i nguan!

⁷ Sran ng'ɔ lɛ nyrun'n yɛ ɔ yra ng'ɔ lɛ-man nyrun'n i nguan-an, akplowa nun-man su.

⁸ Nyanmiɛn nyrun jranfuɛ bɔ be fa ninnge'm be blusu'n, be ti sran bɔ be wu, sanngɛ Mɛlkizedɛk liɛ'n, be klɛli i Nyanmiɛn Ndɛ'n kun kɛ i b'ɔ wu-man'n yɛ ɔ fali ninnge'm be blusu nin-ɔn.

⁹ Sɛ be waan be ´niɛn i sa'n, wuun e ´se kɛ Levi b'ɔ fa ninnge'm be blusu'n, kɛ Abraam yili i blusu liɛ'n, ɔ yili wie,

¹⁰ afin kɛ Mɛlkizedɛk ´ko kpa Abraam atin'n, wuun i nannan nian wu-mɛn i si.

¹¹ Mmla nga Nyanmiɛn fa mannin Izraɛlfuɛ mun'n, ɔ taka Levifuɛ'm be Nyanmiɛn nyrun jranlɛ'n su. Sɛ ɔ ti kɛ be junman nga be dili'n ɔ yoli ye'n, b'ɔ man sran'm be yoli kpa'n, wuun Nyanmiɛn nyrun jranfuɛ uflɛ b'ɔ fin-man Aarɔn osu'n nun'n, b'ɔ ti kɛ Mɛlkizedɛk sa'n ɔ'a ba-man kun.

¹² Afin kɛ be ko kaci Nyanmiɛn nyrun jranlɛ i wafa'n, san be ´kaci mmla'n kusu.

¹³ Sran nga e kɛn i ndɛ wa'n, ɔ fin osu uflɛ nun, yɛ i osufuɛ fi nian di-man Nyanmiɛn sɔwlɛ lɔ junman le.

¹⁴ Afin sran'm be kwlaa be si i weiin kɛ e Min'n fin Zida osu bɔ Moiz a kan-man Nyanmiɛn nyrun jranfuɛ fi ndɛ osu sɔ'n nun le'n i nun.

Nyanmiɛn nyrun jranfuɛ uflɛ b'ɔ ti kɛ Mɛlkizedɛk sa

¹⁵ Kɛ Nyanmiɛn nyrun jranfuɛ uflɛ b'ɔ ti kɛ Mɛlkizedɛk sa'n bali'n, ɔ man sa sɔ'n i nyin fiteli weiin.

¹⁶ Kɛ be ´sie i'n, b'a nian-man mmla ng'ɔ kle sran'm be wafa bɔ be ti i su yɛ be sieli i-ɔ, sanngɛ anannganman nguan'n bɔ lɛ i b'ɔ man ɔ kwla'n ti yɛ be fɛ i sieli-ɔ.

¹⁷ Afin be klɛli i Nyanmiɛn Ndɛ'n nun kɛ: «A ti Nyanmiɛn nyrun jranfuɛ bɔ a ´ka lɛ titi kɛ Mɛlkizedɛk liɛ'n sa .»

¹⁸ Ɔ man be yacili mmla klikli liɛ'n, afin i su falɛ'n kwla-man like fi yo, ɔ ti ngbɛn.

¹⁹ Mmla sɔ'n man like fi kwla yo-man kpa, yɛ like uflɛ bɔ i kpa trɛ i'n, bɔ e kwla fa é wla'n gua su'n, be fa sieli i osu, ɔ man e kwla mantan Nyanmiɛn.

²⁰ Nyanmiɛn tali nda yɛ ɔ fɛ i sieli i nyrun jranfuɛ nin-ɔn,

²¹ sanngɛ be nga'm be liɛ'n, ɔ'a ta-man nda yɛ be sieli be-ɔ. Sanngɛ Jésus liɛ'n, Nyanmiɛn b'ɔ fɛ i sieli'n, ɔ tali nda yɛ ɔ fɛ i sieli-ɔ, afin ɔ seli kɛ: «E Min'n ɔ'a ta nda, ɔ su kaci-mɛn i akunndan'n, a ti Nyanmiɛn nyrun jranfuɛ bɔ a ´ka lɛ tititi .»

²² I sɔ'n ti'n, Jésus man e si kɛ sa nga Nyanmiɛn se kɛ ɔ ´yo man ye'n ti kpa tra laa liɛ ng'ɔ yoli'n.

²³ Yɛ kusu Nyanmiɛn nyrun jranfuɛ nga mun be sie be kpanngban, afin wie'n man be cɛ-man be junman'n su,

²⁴ sanngɛ Jésus liɛ'n, kɛ ɔ wu-man'n ti'n, i Nyanmiɛn nyrun jranlɛ'n, be su fa man-man sran uflɛ.

²⁵ I sɔ'n ti'n, ɔ man be bɔ i ti be mantan Nyanmiɛn'n, be ´kwla nyan bé ti mlɔnmlɔn, afin ɔ o lɛ titi ɔ srɛ Nyanmiɛn kɛ ɔ nian bé su.

²⁶ Nanwlɛ, Nyanmiɛn nyrun jranfuɛ'm be su kpɛn nga y'a nyɛn i yɛ'n, yɛ e kunndɛ nin-ɔn. Ɔ ti Nyanmiɛn liɛ klonglonglo sa tɛ kaan sa nun-mɛn i wun, ɔ nin sa tɛ yofuɛ'm be sanman nun, yɛ Nyanmiɛn mɛnnin i tranwlɛ kpa nglo mmua-mmua lɔ.

²⁷ Ɔ nin Nyanmiɛn nyrun jranfuɛ dandan nga mun be ti-man kun, ɔ yo-man sa tɛ fi, ɔ man ɔ bo-man wɛ sɔ-man Nyanmiɛn i bɔbɔ ti nan ɔ'a sɔ i sran'm bé ti kɛ be nga'm be yo i cɛn'n kwlaa'n sa. Kɛ ɔ fɛ i wun mannin'n, ɔ sɔli Nyanmiɛn kpɛ kunngba ɔ wieli .

²⁸ Be nian mmla'n su be fa sran'm bɔ be kwla yo-man like fi'n sieli Nyanmiɛn nyrun jranfuɛ dan, sanngɛ kɛ mmla'n wo lɛ lele'n, ndɛ nga Nyanmiɛn wa ta nda kannin'n ti ɔ fɛli i Wa'n b'ɔ ti kpa lele guɛ i ti nin i bo'n sieli i nyrun jranfuɛ'm be su kpɛn .