Hébreu 6 - NYANMIƐN NDƐ'N 1998

¹ I sɔ'n ti'n, nán man e ka Krist i ndɛ'n i bo bolɛ nga be kle ye'n su, man e mian é nyin e yo sran. Nán man e wla sua'n i bo ase kun. I bo ase wlalɛ sɔ'n yɛlɛ ndɛ nga e kan se kɛ be `yaci sa ngbɛn-ngbɛn yolɛ be lafi Nyanmiɛn su'n,

² be `yo sran'm be batɛm wafa-wafa'n, be `sie bé sa sran'm bé su'n, sran'm be cɛn'n, yɛ Nyanmiɛn bu ndɛ-ɔ ɔ kaci-mɛn i'n.

³ Sɛ Nyanmiɛn di su'n, kɛ e wa yo sɔ-ɔ.

⁴ Afin sɛ Nyanmiɛn man sran kun wun ase'n, b'ɔ wun nyanmiɛn su lɔ like b'ɔ be fa mɛn i'n i fɛ'n, bɔ Nyanmiɛn Wawɛ'n yo i liɛ wie'n,

⁵ b'ɔ wun Nyanmiɛn ndɛ'n i fɛ'n, b'ɔ si sa kekleekle nga cɛn wie lele be ´yo'n,

⁶ ɔ nin i sɔ'n ngba sɛ ɔ yaci atin'n, be kwla yo-man man ɔ sɛ-mɛn i sin kaci-mɛn i nzuɛn'n kun. Afin sɛ ɔ ko yaci atin'n, wuun i kusu su bobo Nyanmiɛn Wa'n waka'n su ekun, ɔ guɛ i nyin ase nzra nun.

⁷ Afin lika nga nzue ta lɛ tɔ'n, b'ɔ yo like nga be yo i su'n i ye'n, b'ɔ man be nga be yo like sɔ'n be nyan wie'n, Nyanmiɛn man lika sɔ'n yo ye kpa.

⁸ Sanngɛ sɛ ɔ yo-man like ye bɔ owie nin aintɔnman yɛ ɔ yo ye lɛ'n, be bu-mɛn i like fi, ɔ cɛ-man nan Nyanmiɛn a se kɛ nán man i su like yo ye mlɔnmlɔn, i agualiɛ yɛlɛ i nun wɔlɛ .

Sa nga Nyanmiɛn seli kɛ ɔ ´yo'n

⁹ N sran kpa mun, kannzɛ e kan sɔ'n, e lafi su kɛ amún sa liɛ nga kɛ amun nyan amún ti'n an yo'n, ɔ ti kpa tra be nga'm be liɛ'n.

¹⁰ Afin Nyanmiɛn yo-man sa b'ɔ ti-mɛn i su'n, i wla fi-man junman nga an dili nin klolɛ nga an fa klo i b'ɔ man an yoli i sran'm be ye bɔ an tɛ yo'n su'n.

¹¹ Sanngɛ e klo kɛ amun kwlakwla an mian amún nyin yo kɛ an yo i laa'n sa guɛ i ti nin i bo, yɛ amun ´nyan like nga amún wla o su kɛ amun ´nyɛn i'n i kwlaa-a.

¹² E klo-man kɛ an yo nvɛɛfuɛ, sanngɛ be nga be lafi Nyanmiɛn su'n, bɔ be tra be anwlɛn b'ɔ man be nyan like nga i waan ɔ ´fa man be'n, an nian be liɛ'n su yo.

¹³ Kɛ Nyanmiɛn ´kan sa nga i waan ɔ ´yo man Abraam'n, ɔ tali nda. Kɛ ɔ wun-man sran nga i dan trɛ i nan ɔ'a tɛ i nda'n, ɔ tɛli i bɔbɔ wun nda.

¹⁴ Ɔ seli kɛ: «M man ɔ́ wun ´jɔ wɔ fɔuun, yɛ ɔ osu'n ´trɛ .»

¹⁵ Ɔ man i sɔ'n ti'n, kɛ Abraam trɛli i anwlɛn lele'n, ɔ nyannin like nga Nyanmiɛn seli kɛ ɔ ´mɛn i'n.

¹⁶ Kɛ sran'm be ´ta nda'n, sran ng'ɔ lɛ nyrun tra be'n yɛ be fɛ i dunman ta nda sɔ'n nin-ɔn. Kɛ be ko ta nda sɔ'n, wuun akplowa'n ɔ'a wie.

¹⁷ Nyanmiɛn klo kɛ be nga be ´nyan like nga i waan ɔ ´man be'n be wun i wlɛ kpa kɛ ɔ su kaci-mɛn i akunndan'n. I sɔ'n ti yɛ kɛ ɔ kannin'n ɔ tali su nda nin-ɔn.

¹⁸ Ɔ man ndɛ ng'ɔ kannin'n nin nda ng'ɔ tali'n, like nnyɔn sɔ'n ɔ kaci-man be, ɔ bua-man ato. I sɔ'n ti'n, ɔ wla e bɔ e taloli i'n e fanngan kɛ e kplin é nyin nan e nyan like ng'ɔ sie e nyrun lɔ sieli ye'n, bɔ é wla o su kɛ e ´nyɛn i'n.

¹⁹ Like nga é wla o su sɔ'n ti kɛ mmeli i blalɛ'n bɔ be fa jrɛn i'n sa, ɔ tra ye ase. Ɔ tra kpa tankaan, e lafi i su. Ɔ wlu lele juli tannin b'ɔ kpɛ nyanmiɛn su lɔ Nyanmiɛn sua dan'n nun'n i sin lɔ .

²⁰ Lɔ yɛ é ti Jésus b'ɔ ti e nyrun dunfuɛ'n ɔ wluli nin-ɔn. Ɔ kacili Nyanmiɛn nyrun jranfuɛ b'ɔ ´ka lɛ titi kɛ Mɛlkizedɛk liɛ'n sa .