Hébreu 5 - NYANMIƐN NDƐ'N 1998

¹ Nyanmiɛn nyrun jranfuɛ'm be su kpɛn kwlaa nga be fɛ i'n, be sie i kɛ ɔ jran sran'm bé nuan Nyanmiɛn nyrun nan like nga sran'm be waan be ´fa mɛn i'n, ɔ nin nnɛn nga be fa sɔ i'n, be fa mɛn i.

² Kɛ i bɔbɔ ti sran b'ɔ kwla-man like fi yo'n ti'n, ɔ kwla wun be nga be wun-man sa wlɛ'n, nin be nga be fɔn'n, be aunnvuɛ.

³ Kɛ ɔ ti sran sɔ'n ti'n, san ɔ ´fa nnɛn sɔ Nyanmiɛn i bɔbɔ i sa tɛ'n nin sran'm be liɛ'n ti .

⁴ Sran fi jao se-man kɛ ɔ kunndɛ dunman kɛ be fɛ sie i Nyanmiɛn nyrun jranfuɛ'm be su kpɛn, Nyanmiɛn bɔbɔ yɛ ɔ flɛ sran kɛ be sie i i nyrun jranfuɛ'm be su kpɛn kɛ ɔ flɛli Aarɔn'n sa.

⁵ Krist kusu, nɛ́n i bɔbɔ yɛ ɔ kunndɛ dunman kɛ be fɛ i sie Nyanmiɛn nyrun jranfuɛ'm be su kpɛn-ɔn, sran ng'ɔ seli i kɛ: «A ti n Wa, ndɛkɛn m'an kaci ɔ́ si'n,» i yɛ ɔ fɛ i sieli-ɔ .

⁶ Ɔ kannin ndɛ kunngba'n lika uflɛ kɛ: «A ti Nyanmiɛn nyrun jranfuɛ bɔ a ´ka lɛ titi kɛ Mɛlkizedɛk liɛ'n sa .»

⁷ Kɛ Krist sɔ'n wo asiɛ'n su wa'n, ɔ kpannin, i nyinmuɛn guali nan ɔ'a srɛ Nyanmiɛn b'ɔ kwla de i wie'n nun'n kɛ ɔ niɛn i su, ɔ jrannin su kpa. I nyin b'ɔ yi Nyanmiɛn'n ti ɔ tili.

⁸ Kannzɛ ɔ ti i Wa'n, ɔ wunnin nyrɛnnɛn, ɔ man i ainyiɛ'n i nyin fiteli dan.

⁹ Kɛ ɔ yoli sran wafa nga Nyanmiɛn klo kɛ ɔ `yo'n, ɔ man be kwlaa nga bé nyin yi i'n, be ´nyan bé ti mlɔnmlɔn,

¹⁰ afin Nyanmiɛn seli kɛ ɔ ti i nyrun jranfuɛ'm be su kpɛn kɛ Mɛlkizedɛk liɛ'n sa .

Nán an yaci Nyanmiɛn sulafilɛ

¹¹ E lɛ sa sɔ'n i su ndɛ kpanngban bɔ e waan e ´kan-an, sanngɛ i bo tulɛ'n yo ya, afin amu'an yo sran bɔ amun wun-man sa wlɛ ndɛndɛ.

¹² Amu'an cɛ, yɛ amu'an ju sran uflɛ'm be like klelɛ, sanngɛ kusu an tɛ kunndɛ kɛ be fa Nyanmiɛn ndɛ'n i bo bolɛ'n kle amun ekun. Amun ti sran bɔ amun nin nyɔnflɛn nɔnlɛ fata, an kwla di-man aliɛ.

¹³ Sran ng'ɔ tɛ nɔn nyɔnflɛn'n, wuun ɔ tɛ yo bakan, yɛ ɔ si-man sa ng'ɔ ti kpa'n .

¹⁴ Sanngɛ be nga b'a yo sran bɔ be kunndɛ sa ng'ɔ ti kpa'n nin tɛ'n be ngbaciɛ lele b'a si i kpa'n, aliɛ'n ti be liɛ.