Hébreu 4 - NYANMIƐN NDƐ'N 1998

¹ Man e nian é wun kpa, afin Nyanmiɛn seli kɛ e ´ju wunmiɛn delɛ lika ng'ɔ siesie mannin ye'n nun. I sɔ'n ti, nán man ɔ yo kɛ amun nun wie ɔ'a ju-man lika sɔ'n nun lɔ wie.

² Afin jasin fɛ nga be kan kleli be nga be trannin aawlɛ flɛnnɛn nun lɔ'n, be kɛnnin i kunngba'n kleli ye kusu, sanngɛ ndɛ nga be tili'n bɔ b'a lafi-man su'n ti'n, b'a yo-man kpa.

³ Sanngɛ e bɔ e lafi i su'n, e wa wlu lika sɔ'n bɔ Nyanmiɛn kɛnnin i ndɛ i nun wie, ɔ se kɛ: «I sɔ'n ti n fali be wun ya kpa, nan m'an ta nda kɛ: Be su ju-man wunmiɛn delɛ lika nga m'an siesie'n nun lɔ'n mlɔnmlɔn .» Ɔ seli sɔ, sanngɛ kɛ ɔ yili mɛn'n yɛ i junman'n wieli-ɔ.

⁴ Afin be klɛli cɛn ba nso su'n i ndɛ Nyanmiɛn Ndɛ'n nun lika wie kɛ: «Kɛ Nyanmiɛn dili junman lele'n, i le nso su'n ɔ deli wunmiɛn .»

⁵ Yɛ ndɛ ng'ɔ kɛnnin i laa'n, ɔ kɛnnin i wa ekun kɛ: «Be su ju-man wunmiɛn delɛ lika nga m'an siesie'n nun lɔ nun mlɔnmlɔn .»

⁶ Be nga be dun mmua tili jasin fɛ sɔ'n, b'a ju-man lika sɔ'n nun yɛlɛ kɛ b'a lafi-man su. Be wie kusu be o lɛ bɔ Nyanmiɛn man be ´ju lɔ.

⁷ I sɔ'n ti yɛ Nyanmiɛn sie cɛn uflɛ kun ekun kɛ: «Ndɛkɛn» nin-ɔn. Kɛ ɔ sieli cɛn sɔ'n b'ɔ cɛ lele'n, ɔ man David kɛnnin i ndɛ bɔ e kɛnnin i ndɛ icra'n kɛ: «Sɛ ndɛkɛn an ti ndɛ nga Nyanmiɛn kan'n, nán an yo nyin kekle i su .»

⁸ Afin sɛ Zozie man be deli wunmiɛn'n, wuun Nyanmiɛn a kan-man cɛn uflɛ ndɛ kun .

⁹ I sɔ'n ti, Nyanmiɛn sran'm be wunmiɛn delɛ sakpa'n b'ɔ fa wunmiɛn nga Nyanmiɛn deli le nso su'n, ɔ tɛ o be nyrun.

¹⁰ Afin sran ng'ɔ wlu wunmiɛn delɛ lika nga Nyanmiɛn ɔ'a sie nun'n, ɔ yaci i junman'n de wunmiɛn kɛ Nyanmiɛn wieli i liɛ'n di b'ɔ deli wunmiɛn'n sa .

¹¹ I sɔ'n ti, man e mian é nyin nan e wlu wunmiɛn delɛ lika sɔ'n nun nan sran fi a yo-man nyin kekle i su nan ɔ'a wlu-man lika sɔ'n nun kɛ be liɛ'n sa-a.

¹² Afin Nyanmiɛn i ndɛ nga ɔ ko kan'n, wuun ɔ'a kan ɔ kaci-mɛn i, ɔ man sran'm be kaci. Sɛ e kwla se'n, wuun e ´se kɛ ɔ la tra tokofi. Ɔ wɔ ɔ wlu lele ɔ ju be wawɛ'n, nin be anwlɛn'n, nin be akpɔlɛ'n, ɔ nin be owie i klun lui'm be nun, ɔ si be klun akunndan'n, ɔ nin be klun sa'n.

¹³ Like fi nun-man lɛ bɔ Nyanmiɛn wun-mɛn i-ɔ. Like nga ɔ yili be'n wie fi fiɛ-mɛn i nyrun, i nyin ta be kwlaa. I ja su yɛ e kwlaa e ´kan sa nga e yoli nin-ɔn.

Jésus-Krist ti Nyanmiɛn nyrun jranfuɛ dan

¹⁴ E lɛ Nyanmiɛn nyrun jranfuɛ'm be su kpɛn kpa kun, ɔ ɔli lele juli Nyanmiɛn bɔbɔ nyrun lɔ: yɛlɛ Jésus Nyanmiɛn Wa'n. I sɔ'n ti'n, like nga e lafi su'n, man e lafi su kpa.

¹⁵ Afin Nyanmiɛn nyrun jranfuɛ nga e lɛ i'n, ɔ ti-man sran b'ɔ si-man kɛ e kwla-man like fi yo-ɔ, afin like nga be fa lakali ye'n, be fɛ i kwlaa'n lɛkɛli i wie, sanngɛ ɔ'a yo-man sa tɛ le.

¹⁶ I sɔ'n ti, man e fa é wla gua Nyanmiɛn su e wunnge i bia'n bɔ be kɔ lɔ-ɔ be nyan ye'n i wun lɔ nan ɔ si ye aunnvuɛ, nan blɛ nga é sa mian'n, ɔ `yo e ye, yɛ ɔ `ti é wun nyanman nun.