Hébreu 3 - NYANMIƐN NDƐ'N 1998

Jésus-Krist i kpa tra Moiz

¹ I sɔ'n ti, aniaan bɔ an ti Nyanmiɛn liɛ b'ɔ flɛli amun wie'n, an `bu Jésus bɔ Nyanmiɛn sunmɛnnin i kɛ ɔ yo i nyrun jranfuɛ'm be su kpɛn i su bɔ e lafi'n, i akunndan.

² Junman nga Nyanmiɛn fɛ sieli su'n, ɔ nian nun di i kpa mɛnnin i kɛ Moiz kusu yoli i sɔ Nyanmiɛn i awlo wunmuan'n nun'n sa .

³ Sɛ sran kun kplan sua klanman kun'n, i bɔbɔ dunman'n fu tra sua'n. Jésus kusu'n, sɛ ɔ nyan nyrun tra Moiz'n, ɔ ti su.

⁴ Afin sua nga be o lɛ'n, sran yɛ ɔ kplannin be kwlaa-a, sanngɛ Nyanmiɛn yɛ ɔ yili ninnge'n kwlaa-a.

⁵ Moiz yoli junman difuɛ kpa Nyanmiɛn awlo wunmuan'n nun. Ɔ kannin ndɛ nga cɛn wie lele Nyanmiɛn wa kan'n i ndɛ .

⁶ Krist kusu, kɛ ɔ ti i Wa'n, ɔ niɛn i bɔbɔ Nyanmiɛn i awlo'n su kpa sɔ. Sɛ e tra ye anwlɛn e jran kekle e lafi like nga é wla o su kɛ e ´nyɛn i'n su kpa'n, e ti i awlo.

Nyanmiɛn i sran'm be wunmiɛn delɛ

⁷ Afin Nyanmiɛn Wawɛ'n seli kɛ: «Sɛ ndɛkɛn an ti ndɛ nga Nyanmiɛn kan'n,

⁸ nán an yo nyin kekle i su kɛ i nun bɔ amun jaoli i wun'n amun yoli'n, bɔ amun kɛnnin i niannin aawlɛ flɛnnɛn nun lɔ'n sa.»

⁹ Nyanmiɛn seli kɛ: «Amun nannan'm be kan min niannin aawlɛ flɛnnɛn nun lɔ, yɛ be wunnin sa nga n yoli i afuɛ ablanan nun'n i kwlaa.

¹⁰ I sɔ'n ti yɛ n fali ya sran sɔ'm bé wun nin-ɔn. N seli kɛ: ‹Be ti sran bɔ be akunndan'n tran-man lika kun, yɛ be si-man min nzuɛn'n mlɔnmlɔn.›

¹¹ I sɔ'n ti n fali be wun ya kpa, nan m'an ta nda kɛ: ‹Be su ju-man wunmiɛn delɛ lika nga m'an siesie'n nun lɔ'n mlɔnmlɔn'n .› »

¹² Aniaan mun, i sɔ'n ti an `nian amún wun, nán man amun nun wie i anwlɛn'n ɔ yo tɛ, yɛ nán man ɔ `yo kɛ ɔ lafi-man Nyanmiɛn su b'ɔ man ɔ ´yaci Nyanmiɛn b'ɔ lafi-man nin-ɔn.

¹³ Sanngɛ kɛ ɔ ´yo nan b'a laka-man amun nun wie nan ɔ'a yo-man sa tɛ ɔ'a kete-man'n, an `tu amun wun fɔ cɛn'n kwlaa bɔ be tɛ se kɛ: «Ndɛkɛn'n.»

¹⁴ Afin sɛ e fa é wla gua Krist su lele guɛ i ti nin i bo kɛ i bo bolɛ nun sa'n, wuun e nin i e ti wiengu.

¹⁵ E tɛ kanngan Nyanmiɛn Ndɛ nga be klɛli'n nun kɛ: «Sɛ ndɛkɛn an ti ndɛ nga Nyanmiɛn kan'n, nán an yo nyin kekle i su kɛ i nun bɔ amun jaoli i wun amun yoli'n sa .»

¹⁶ ?Wan mun yɛ kɛ Nyanmiɛn kannin ndɛ be tili bɔ be jaoli i wun nin-ɔn? ?Nán be kwlaa nga Moiz nin be fin Ezipt bali mun-ɔn?

¹⁷ ?Wan mun yɛ Nyanmiɛn fa bé wun ya afuɛ ablanan nin-ɔn? ?Nán be kwlaa nga be yo sa tɛ bɔ be fuɛn'n kali blo lɔ mun-ɔn?

¹⁸ ?Yɛ wan mun yɛ Nyanmiɛn tali be nda kɛ be su ju-man wunmiɛn delɛ i lika nga ɔ'a sie ɔ'a man be'n nun lɔ? ?Nán be nga be yoli nyin kekle i su mun-ɔn?

¹⁹ Ɔ man e wun kɛ b'a kwla ju-man lika sɔ'n nun yɛlɛ kɛ b'a lafi-mɛn i su .