Hébreu 2 - NYANMIƐN NDƐ'N 1998

Ti nyanlɛ

¹ I sɔ'n ti'n, man e fa ndɛ nga e tili be'n sie e klun kpa tra laa'n, sɛ y'a yo-man sɔ-ɔ ɔ cɛ-man nan y'a to a fuan atin'n.

² ?Sɛ ndɛ nga anz'm be kannin'n ɔ kpɛnnin su'n, yɛ sɛ sa tɛ nin nyin kekle bɔ be yoli'n, be wunnin i kwlaa'n i sin'n,

³ wuun sɛ e kpa sa nga e yo-ɔ e ´nyan é ti'n su'n, e ´yo sɛ yɛ e ´fite nun-ɔn? E Min'n bɔbɔ dun mmua kannin é ti nyanlɛ sɔ'n i ndɛ, yɛ be ng'ɔ kannin bɔ be tili'n, be kan kleli ye weiin kɛ ɔ ti nanwlɛ.

⁴ Kɛ Nyanmiɛn yi atrɛ b'ɔ yo abonuan sa nin sa kekleekle fanunfanun'n, b'ɔ fa like nga i Wawɛ'n man sran yo'n man sran kɛ i klun klo'n sa'n, ɔ guali be ndɛ'n su.

Jésus kpɛli atin man y'a nyan é ti

⁵ Afin nán anz mun yɛ Nyanmiɛn ´fa be sie mɛn nga ɔ wa yi bɔ e kɛn i ndɛ'n su-ɔ.

⁶ Sanngɛ e kɛnngɛn i Nyanmiɛn i Ndɛ nga be klɛli'n i lika wie nun kɛ sran wie se kɛ: «?Wan yɛlɛ sran bɔ man ɔ wla ko kpɛn i su-ɔ? ?Wan yɛlɛ klɔ sran bɔ man i ndɛ ko lo wɔ sɔ-ɔ?

⁷ A yoli man anz'm be kpa'n trɛli i le nnyɔn kun, a sieli i famiɛn man ɔ nyannin nyrun, be mɛnmɛn i,

⁸ yɛ a fɛ i sie like'n kwlaa su .» Kɛ Nyanmiɛn fɛ i sieli like'n kwlaa su sɔ'n, like fi a ka-man lɛ bɔ nɛ́n i yɛ ɔ sie i-ɔ. Sanngɛ e nian wun-man kɛ ɔ sie like'n kwlaa kɛ e ´se yɛ'n.

⁹ Sanngɛ e wun Jésus bɔ Nyanmiɛn yoli man anz'm be kpa trɛli i le nnyɔn kun'n. Nyanmiɛn i aklunye'n ti ɔ wuli sran'm be kwlaa be ti. Siɛn'n e wun i anyrunnyan dan b'ɔ lɛ i'n nin ayɛ bɔ be yi i'n nyrɛnnɛn wie'n b'ɔ wuli'n ti.

¹⁰ Nanwlɛ, Nyanmiɛn b'ɔ yili like'n kwlaa bɔ i ti yɛ i kwlaa o lɛ'n, ɔ yoli sa ng'ɔ yo-ɔ ɔ nin i fata'n. Afin kɛ ɔ ´yo nan i mma kpanngban kpa b'a nyan i anyrunnyan'n wie ti, ɔ yoli man Jésus b'ɔ kpɛ atin man be nyan bé ti'n, ɔ yo sran bɔ nyrɛnnɛn b'ɔ wunnin i'n ti ɔ si atin sɔ'n kpɛ kpa.

¹¹ Afin i b'ɔ man sran'm bé wun sa'n wie'n, ɔ nin be nga ɔ man bé wun sa'n wieli'n, ɔ nin be bé si ti kun. I sɔ'n ti yɛ kɛ ɔ se kɛ be ti i niaan'n, nyannzuɛn kun-mɛn i nin-ɔn.

¹² Afin ɔ se kɛ: «Nyanmiɛn, m ´bo wɔ dunman n ´kle min niaan mun, kɛ sran'm be yia lɛ'n, m ´manman wɔ lɛ .»

¹³ Ɔ kɛnnin i ekun kɛ: «N ´fa n wla'n guɛ i su.» Yɛ ɔ kɛnnin i ekun kɛ: «An `nian, min nin ba nga Nyanmiɛn fa be mannin min'n e yɛ .»

¹⁴ Kɛ bɔ ba sɔ'm be ti klɔ sran'n ti'n, Jésus kusu kacili i wun klɔ sran kɛ be sa. Ɔ yoli i sɔ nan sɛ ɔ wu'n ɔ ´kwla mmusu'm bé si Satan'n b'ɔ man wie'n kwla sran mun'n.

¹⁵ Yɛ ɔ ´de be kwlaa nga kɛ be wuli be lele'n wie'n i srolɛ ti b'a kaci kɛ kanga sa'n.

¹⁶ Afin nanwlɛ, nán anz mun yɛ ɔ bali be ukalɛ-ɔ, Abraam anunman mun yɛ ɔ bali be ukalɛ-ɔ .

¹⁷ Kɛ ɔ ´yo nan ɔ'a yo Nyanmiɛn nyrun jranfuɛ'm be su kpɛn'n, nan ɔ'a si i niaan'm be aunnvuɛ'n nan ɔ'a si Nyanmiɛn junman'n di kpa'n, nan ɔ'a kwla yaci sran'm bé wun sa'n ɔ'a cɛ be'n, san ɔ ´kaci i wun kɛ be sa.

¹⁸ Afin kɛ ɔ wunnin nyrɛnnɛn lakalɛ bɔ be lɛkɛli i'n ti'n, i kusu kwla uka be nga be laka be'n.