Hébreu 13 - NYANMIƐN NDƐ'N 1998

Sa nga be yo-ɔ ɔ yo Nyanmiɛn fɛ'n

¹ An `klo amun wun kpa kɛ sran nin i niaan sa tititi.

² Sran ng'ɔ to amun'n, an `sike i, afin sran wie'm be yoli sɔ be sikeli anz mun b'a si-man nun .

³ An `bu bisuafuɛ'm be akunndan kɛ amun bɔbɔ an wo lɔ wie sa. An `bu be nga be ´yo be tɛtɛ'n be akunndan, afin be kusu be ti sran kɛ amun sa.

⁴ Man sran'm be kwlaa be bu aja'n i like dan, yɛ be bɔ b'a ja bé wun'n, nán man be yo sa sukusuku. Afin be nga be kunndɛ bla annzɛ bian'n, ɔ nin be nga be kunndɛ bla bé yi bo annzɛ bian bé wun bo'n mun'n, Nyanmiɛn nin be lɛ i.

⁵ Like nga amun ´yo'n, nán an yo i sika klolɛ'n ti. Man amún nyin yi like nga an lɛ i'n, afin Nyanmiɛn bɔbɔ seli kɛ: «N su yaci-man wɔ, n su kpɔci-man wɔ mlɔnmlɔn .»

⁶ I sɔ'n ti, e tra e anwlɛn e kan ndɛ nga be klɛli i kɛ: «E Min Nyanmiɛn'n yɛ ɔ ti n ukafuɛ-ɔ, srɛ kun-man min. ?Nzu yɛ sran kwla yo min-ɔn ?»

⁷ An `bu amun kpɛnngbɛn bɔ laa be kan Nyanmiɛn ndɛ kleli amun'n be akunndan. An `nian be nzuɛn'n nin be agualiɛ'n, an `nian kɛ be fa lafili Nyanmiɛn su'n, an `lafi i su sɔ wie.

⁸ Kɛ Jésus-Krist fa ti anunman'n, ɔ ti sɔ ndɛ, yɛ ɔ ti sɔ tititi.

⁹ Nán an fa like wafa-wafa nga be kle amun b'ɔ nin e liɛ'n ti-man kun'n su nan an yaci atin kpafuɛ'n. Sɛ e tra ye anwlɛn kpa ye bɔ Nyanmiɛn yoli ye ti'n, ɔ ti kpa. Nán man e bu kɛ aliɛ dilɛ mmla'n bɔ e fa su'n ɔ kwla yo e kpa, afin be nga be fali su'n, ɔ'a yo-man sa fi ye a man-man be.

¹⁰ E liɛ'n, e lɛ Nyanmiɛn sɔwlɛ kun yɛ Nyanmiɛn nyrun jranfuɛ bɔ be di junman Zuif'm bé tannin sua nun'n, be kwla di-man like ng'ɔ fin Nyanmiɛn sɔwlɛ sɔ'n su.

¹¹ Afin kɛ Nyanmiɛn nyrun jranfuɛ'm be su kpɛn'n fa nnɛn bɔ be fa sɔ Nyanmiɛn'n i mmoja'n kɔ Nyanmiɛn bɔbɔ i lika kpa nun'n, be fɛ i nnɛn'n ko yrɛ i klɔ'n tiwa lɔ .

¹² I sɔ'n ti, kɛ ɔ ´yo nan Jésus mmoja'n ti sran'm bé wun sa'n ɔ'a wie'n, i kusu ɔ wunnin nyrɛnnɛn klɔ'n i tiwa lɛ.

¹³ I sɔ'n ti, man e fite e wɔ i wun klɔ'n i tiwa lɔ nan be gua e nin i é nyin ase .

¹⁴ Afin e lɛ-man klɔ kpa wa, e su minndɛ klɔ nga be wa fa man ye'n.

¹⁵ I sɔ'n ti, man manmanlɛ nga e manman Nyanmiɛn titi'n ɔ yo kɛ asenna like bɔ e fa man Jésus kɛ ɔ fa mɛn i'n sa. Kɛ e ´yo sɔ'n e bo i dunman .

¹⁶ Nán an yaci sa kpa nin sran ye yolɛ'n, afin i sɔ like'n yɛ be yo-ɔ ɔ jɔ Nyanmiɛn klun-ɔn.

¹⁷ Man amún nyin yi amun kpɛnngbɛn mun, an `bu be sran. Be nian amún su titi, afin be wa kan be junman'n i su ndɛ kle Nyanmiɛn. An `yo sa nga b'ɔ man be klun ´jɔ be junman'n su'n. Sɛ amu'an yo-mɛn i sɔ bɔ be oto'n, ɔ man be su kwla uka-man amun.

¹⁸ An `srɛ Nyanmiɛn titi kɛ ɔ nian e su. E si e klun lɔ weiin kɛ y'a yo-man sa fi, afin sa'n kwlaa nun e klo kɛ e ´yo sa ng'ɔ ti kpa'n.

¹⁹ N ´srɛ amun kpa kɛ an srɛ Nyanmiɛn kɛ ɔ man min atin man n sa n sin amun wun lɔ ekun icra'n.

I nuan yralɛ nin be like yolɛ

²⁰ Nyanmiɛn cɛnnin e Min Jésus b'ɔ ti Bua Tafuɛ Dan'n i mmoja b'ɔ man sran nin Nyanmiɛn be tra aenguɛ tititi'n ti . Man Nyanmiɛn b'ɔ man sran di alaje'n

²¹ ɔ man amun fanngan sa'n kwlaa nun nan an yo i klun sa. Jésus-Krist ti, man ɔ fa e yo like ng'ɔ klo'n. Man e la Krist ase tititi! Man ɔ yo sɔ!

²² Aniaan mun, n ´srɛ amun, an `fa afɔtuɛ nga m mannin amun yɛ'n su, afin ɔ ti-man ndɛ tɛnndɛn.

²³ An `tie ndɛ fɛ kun: b'a yi e niaan Timote bisua'n nun. Sɛ ɔ to n wa icra'n, min nin i e ´ba amun wun lɔ.

²⁴ N ´yo amun kpɛnngbɛn nin Nyanmiɛn sran'm be kwlaa be like. Italifuɛ'm be ´yo amun like.

²⁵ N yra ń nuan kɛ amun kwlaa an nyan ye!