Hébreu 12 - NYANMIƐN NDƐ'N 1998

E Si Nyanmiɛn

¹ I sɔ'n ti, kɛ sran kpanngban kpa bɔ be kan Nyanmiɛn sulafilɛ ndɛ'n be sin yia e kukuku'n, man e kusu e gua like kwlaa ng'ɔ tanndan e wun'n be ase, man e wla sa tɛ'n kwlaa ase, afin ɔ cɛ-man nan ɔ'a tanndan é ja nun. Man e mian é nyin sin lika nga be kle ye'n nun.

² Man e kpɛ é nyin nian Jésus, e Nyanmiɛn sulafilɛ'n fin i, i yɛ man e ´lafi i su lele ´guɛ i ti nin i bo-ɔ. Kɛ ɔ bu i klun b'ɔ wa jɔ'n i akunndan'n, ɔ kplinnin su man be kunnin i waka'n su, ɔ'a bu-mɛn i nyin ase gualɛ'n i like fi, kɛ e ´se yɛ'n ɔ'a ko tran Nyanmiɛn i bia'n i fama su .

³ An `bu i bɔ kɛ sa tɛ yofuɛ'm be saci i wun'n ɔ trɛli i anwlɛn'n i akunndan nan amún sa sin a bubu-man amun nan amu'an kpɔnzɔ-man.

⁴ Sɛ sa tɛ'n ti sran'n, wuun n ´se kɛ amun nin i a tu lele amun mmoja nian gua-man.

⁵ ?Afɔtuɛ nga Nyanmiɛn mannin amun bɔ an ti i mma mun'n, amún wla a fi su? Be klɛli i kɛ: «N wa, nán bu fɔ nga e Min Nyanmiɛn'n tu wɔ'n i aɔwi, yɛ sɛ ɔ ijɔ wɔ'n, nán ɔ́ sa sin bubu wɔ.

⁶ Afin e Min'n tu be nga ɔ klo be'm be fɔ, yɛ be nga ɔ bu be i wa'n, ɔ fa nyantiaan bo be .»

⁷ Sɛ Nyanmiɛn tu amun fɔ'n, man ɔ sɔn amun nun, afin ɔ bu amun i wa. ?Ba onin yɛ i si tu-mɛn i fɔ-ɔ?

⁸ Sɛ ɔ tu-man amun fɔ kɛ ɔ fa tu i mma mun sa'n, wuun an ti-mɛn i klun ba yɛ an lɛ-man si .

⁹ E si'm be tu e fɔ, yɛ e bu be sran. Sɛ ɔ ti sɔ'n, man e bu e Si nga e wawɛ'n wo i sa nun'n i sran tra be nan y'a nyan nguan.

¹⁰ Kpa nga é si'm be waan e yo bɔ i ti yɛ be tu e fɔ'n, ɔ ti le nnyɔn kun liɛ, sanngɛ nga Nyanmiɛn fa tu ye'n, e kpa yolɛ mlɔnmlɔn ti-ɔ nan e kaci kɛ i sa.

¹¹ Nanwlɛ, fɔ tulɛ'n kwlaa, kɛ be ´tu ye'n, i klikli'n nun ɔ yo e ya, ɔ yo-man e fɛ, sanngɛ be nga be fa su bɔ be kaci'n, ɔ man be yo kpa, yɛ be di alaje.

Afɔtuɛ manlɛ

¹² I sɔ'n ti, an `kpɛntɛn amún sa bɔ b'a kpɔ'n nin amún ja bɔ b'a nyan amun wun'n, be nun .

¹³ An `kpɛ atin nga an sin nun'n kpa nan sran nga i ja ti-man kpa'n i ja'n ɔ'a fɔnndɔn-man, sanngɛ ɔ'a yo juejue'n ti.

¹⁴ Man amun nin sran'm be kwlaa amún nuan sɛ amún wun, man amun nzuɛn'n fa Nyanmiɛn liɛ'n, afin sɛ ɔ ti-mɛn i ti-ɔ, sran fi su wun-man e Min'n.

¹⁵ An `nian amún wun kpa, nán man ye nga Nyanmiɛn yo sran'n ɔ to fuan sran fi nan klunwi'n i olui'n ɔ'a fɛfɛ-man, yɛ ɔ'a saci-man amun nan ɔ'a sa-man sran kpanngban'n ti .

¹⁶ An `nian amún wun kpa nan sran fi a kunndɛ-man bla nin bian, yɛ sran fi a bu-man Nyanmiɛn i ninnge'm be kɛ be ti-man like fi kɛ Ezau bɔ aliɛ talie kun ti ɔ yoli i kpɛnngbɛn'n i atɛ'n sa .

¹⁷ An si kɛ kɛ ɔ yoli sɔ'n, i sin i waan i si yrɛ i nguan, sanngɛ ɔ'a kplin-man su. Ɔ sunnin bɔ lele, sanngɛ ɔ'a wun-mɛn i wafa nga ɔ ´yo nan ɔ'a kaci ndɛ ng'ɔ kannin nin-ɔn .

¹⁸ Amun liɛ'n nán oka wie bɔ be kɛn i-ɔ ɔ yo ye'n bɔ sin dan nin bɔlɛ tukuu, nin aosin, ɔ nin aunngban dan o su'n i bo yɛ amun ɔli kɛ Izraɛlfuɛ'm be liɛ'n sa-a.

¹⁹ Be tili awɛ tɛlɛ, ɔ nin sran kun nɛn. Kɛ be tili i nɛn'n, be waan nán man ɔ kan ndɛ kle be kun

²⁰ yɛlɛ kɛ ndɛ sɔ'n ti kekle be kwla fa-man su, afin ɔ seli kɛ: «Sɛ nnɛn bɔbɔ kan oka'n, be fa yɛbuɛ kun i .»

²¹ Like sɔ'm be yo sro, ɔ man Moiz seli kɛ, «Srɛ kun min yɛ min wun usu min .»

²² Sanngɛ an bali Siɔn Oka'n i bo, an bali nyanmiɛn su Zerizalɛm liɛ'n b'ɔ ti Nyanmiɛn i klɔ'n bɔ anz akpi-akpi be o su'n su.

²³ An bali Nyanmiɛn i mma ngbɛn-ngbɛn bɔ be klɛli be dunman nyanmiɛn su lɔ'n bé cɛn dilɛ'n bo nin be anyia'n nun. An bali Nyanmiɛn b'ɔ ti sran'n kwlaa be jɔlɛ difuɛ'n, nin sran kpa nga Nyanmiɛn a kaci be sran kpa mlɔnmlɔn siɛn'n be wawɛ'n,

²⁴ nin Jésus b'ɔ ti aenguɛ uflɛ nga Nyanmiɛn waan ɔ nin sran'm be ´tra'n i nun jranfuɛ'n be wun. Jésus mmoja b'ɔ fa kpɛntɛn-kpɛntɛn'n, sɛ ɔ kwla ijɔ'n, wuun ɔ ´kan ndɛ fɛ tra Abɛl liɛ'n .

²⁵ An `nian amún wun kpa, nán an kpalo ndɛ nga be kan kle amun'n. Be nga be kpaloli sran ng'ɔ kan ndɛ kleli be asiɛ'n su wa'n i ndɛ'n, b'a fite-man nun. Sɛ e kusu e kaci e sin si sran ng'ɔ o nyanmiɛn su lɔ b'ɔ kan ndɛ kle ye'n, e su fite-man nun mlɔnmlɔn.

²⁶ Laa kɛ ɔ ´ijɔ'n, asiɛ'n kejeli, sanngɛ siɛn'n ɔ se e kɛ: «M ma keje asiɛ'n ekun nin nyanmiɛn b'ɔ la nglo lɔ plaii'n kusu .»

²⁷ Kɛ ɔ se kɛ ɔ ´keje i «Ekun'n» ɔ kle weiin kɛ i yɛ ɔ ´yi like nga ɔ keje be'n be lɛ-ɔ, afin i yɛ ɔ yili be-ɔ, nan nga ɔ'a keje-man be'n be ka lɛ .

²⁸ I sɔ'n ti, man e yo Nyanmiɛn mo, afin e ´nyan mɛn b'ɔ keje-man'n. Man e su Nyanmiɛn i wafa ng'ɔ jɔ i klun'n srolɛ bɔ e sro i'n nin sran bɔ e bu i'n ti,

²⁹ afin e Nyanmiɛn'n ti kɛ sin sa, ɔ yra .