Hébreu 11 - NYANMIƐN NDƐ'N 1998

Be nga be lafi Nyanmiɛn su'n

¹ Nyanmiɛn su bɔ e lafi'n ti, e si weiin kpa kɛ y'a nyan like nga é wla o su'n, ɔ man e si kpa kɛ like nga e wun-mɛn i'n wo lɛ.

² Laafuɛ'm be Nyanmiɛn su bɔ be lafi'n ti yɛ ɔ boli be dunman kpa nin-ɔn.

³ Nyanmiɛn su bɔ e lafi ti yɛ e si kɛ i nuan nun ndɛ'n yɛ ɔ fa yili mɛn nin-ɔn, ɔ man ɔ fa like nga be wun-mɛn i'n yɛ ɔ fa yili like nga e wun be yɛ nin-ɔn.

⁴ Nyanmiɛn su bɔ Abɛl lafi'n ti yɛ i like nga ɔ fa sɔli i'n i kpa trali Kaɛn liɛ nin-ɔn. I su b'ɔ lafi'n ti'n, Nyanmiɛn bɔbɔ seli kɛ ɔ ti sran kpa, afin ɔ sɔli like nga ɔ fa mɛnnin i'n nun. Ɔ wuli, sanngɛ Nyanmiɛn su b'ɔ lafi'n ti'n, ɔ tɛ ijɔ .

⁵ Nyanmiɛn su bɔ Enɔk lafi'n ti yɛ ɔ fɛ ɔli i wun lɔ bɔ ɔ'a wu-man nin-ɔn. B'a wun-mɛn i kun afin Nyanmiɛn mɛnnin i su. Be klɛli kɛ Nyanmiɛn klun jɔli i wun nan ɔ'a mɛn i su .

⁶ Afin sɛ be lafi-mɛn i su'n, i klun jɔ-man be wun mlɔnmlɔn. Ɔ man sran nga i waan ɔ ´fɛ i wun mantan Nyanmiɛn'n, man ɔ lafi su kɛ ɔ o lɛ, yɛ be nga be kunndɛ i'n, ɔ ´yi i wun kle be.

⁷ Nyanmiɛn su bɔ Noe lafi'n ti, kɛ ɔ boli like nga be nian wun-mɛn i le'n su kleli i'n, ɔ boboli mmeli kun ɔ fa deli i osufuɛ mun srolɛ b'ɔ sro i'n ti. Kɛ ɔ yoli sɔ'n, ɔ buli mɛnfuɛ'm be fɔ, yɛ ɔ yoli sran kpa i su b'ɔ lafi'n ti .

⁸ Nyanmiɛn su bɔ Abraam lafi'n ti, kɛ ɔ flɛli i kɛ ɔ wɔ nvle nga i waan ɔ ´fa mɛn i nun'n, i nyin yili i, ɔ si-man lika ng'ɔ kɔ'n, sanngɛ ɔ ɔli.

⁹ I su b'ɔ lafi'n ti, ɔ ko trannin nvle nga i waan ɔ ´fa mɛn i'n nun kɛ aofuɛ sa. Ɔ nin Izaak nin Zakɔb bɔ be kusu be ´nyan like nga i waan ɔ ´fa mɛn i'n wie'n, be trannin tannin sua'n nun.

¹⁰ Afin ɔ minndɛ klɔ kpa nga be wlɛli i sua'm bé bo ase kpa'n, bɔ Nyanmiɛn bɔbɔ yɛ ɔ jajali yɛ ɔ kplannin'n.

¹¹ Sara kusu Nyanmiɛn su b'ɔ lafi'n ti, ɔ nin i kpɛnngbɛn bɔbɔ bɔ ɔ'a yo'n, ɔ mɛnnin i fanngan man ɔ wuli ba, afin ɔ si kɛ Nyanmiɛn b'ɔ kan kɛ ɔ ´yo sa sɔ'n mɛn i'n ɔ ti nanwlɛfuɛ .

¹² I sɔ'n ti yɛ yasua kunngba sɔ'n bɔ ɔ'a yo kpɛnngbɛn b'ɔ ti kɛ ɔ'a wu sa'n, ɔ wuli ba bɔ i osu'n trɛli kɛ nzraama nin jenvie nuan aunnyan bɔ be kwla ka-man'n sa nin-ɔn .

¹³ Be kwlaa be lafi Nyanmiɛn su lele be fa wuli, sanngɛ ɔ nin i sɔ'n ngba'n, b'a nyan-man ninnge nga i waan ɔ ´fa man be'n. Be wunnin be mmua lɔ, ɔ man be klun jɔli. Yɛ be dili bé wun nanwlɛ kɛ be ti aofuɛ nin wlan-wlanfuɛ asiɛ'n su .

¹⁴ Be nga be se sɔ'n, ɔ kle weiin kɛ be bɔbɔ be nvle yɛ be kunndɛ-ɔ.

¹⁵ Sɛ ɔ ti kɛ bé nyin kpɛnnin nvle nga be tuli lɔ'n su'n, wuun be sali bé sin.

¹⁶ B'a yo-man sɔ, sanngɛ be kunndɛli nvle nga i kpa tra nvle sɔ'n, yɛlɛ nyanmiɛn su lɔ liɛ'n. I sɔ'n ti, kɛ be se kɛ ɔ ti be Nyanmiɛn'n, nyannzuɛn kun-mɛn i, afin ɔ'a yo klɔ kun a sie be .

¹⁷ Nyanmiɛn su bɔ Abraam lafi'n ti yɛ kɛ ɔ kɛn i niannin'n ɔ fa Izaak mɛnnin i nin-ɔn. Sa nga Nyanmiɛn seli kɛ ɔ ´yo'n, Abraam yɛ ɔ seli i kɛ ɔ ´yo mɛn i-ɔ. Sanngɛ ɔ fɛ i wa kunngba cɛ'n mɛnnin i .

¹⁸ Ba kunngba sɔ'n ti yɛ Nyanmiɛn seli i kɛ: «Izaak ti yɛ a ´nyan osu kun b'ɔ man ɔ dunman'n su nunnun-man-an .»

¹⁹ Abraam si kɛ Nyanmiɛn kwla cɛn Izaak, i sɔ'n ti yɛ Nyanmiɛn fɛ i wa'n mɛnnin ekun nin-ɔn. Sa sɔ'n ti sa nzɔliɛ.

²⁰ Nyanmiɛn su bɔ Izaak lafi'n ti, ɔ yrali Zakɔb nin Ezau be nguan, ɔ seli be kɛ cɛn wie lele be ´nyan ye .

²¹ Nyanmiɛn su bɔ Zakɔb lafi'n ti, kɛ ɔ wa wu'n, ɔ yrali Zozɛf wa nnyɔn'n be nguan, yɛ ɔ kluli i kpɔnman'n su manmannin Nyanmiɛn .

²² Nyanmiɛn su bɔ Zozɛf lafi'n ti, kɛ ɔ wa ju i wie cɛn'n, ɔ kannin Izraɛlfuɛ'm be Ezipt lɔ tulɛ'n, nin i saka'n i ndɛ .

²³ Nyanmiɛn su bɔ Moiz si nin i nin be lafi'n ti, kɛ be wuli i'n, be fɛ i fiali anglo nsan, afin be wunnin kɛ ba'n ti klanman, ɔ man b'a bu-man famiɛn'n i ndɛ'n ndɛ .

²⁴ Nyanmiɛn su bɔ Moiz lafi'n ti, kɛ ɔ nyinnin'n ɔ'a kplin-man su kɛ be se kɛ ɔ ti Ezipt famiɛn'n i wa bla'n i wa ,

²⁵ afin ɔ klo kɛ be kle i nin Nyanmiɛn sran'm be nyrɛnnɛn tra kɛ ɔ ´di mɛn'n b'ɔ ti le nnyɔn kun like'n.

²⁶ Ɔ wunnin i kɛ finfin nga Krist ti be yo i'n ɔ ti kpa tra Ezipt lɔ like kpakpa'n kwlaa, afin like ng'ɔ wa nyɛn i cɛn wie'n, i nyin tɛ i mmua lɔ.

²⁷ Nyanmiɛn su b'ɔ lafi'n ti, kɛ ɔ jao Ezipt famiɛn wlɛfuɛ'n wun lɔ'n, srɛ a kun-mɛn i, afin ɔ trɛ i anwlɛn, ɔ ti kɛ ɔ'a wun Nyanmiɛn bɔ be wun-mɛn i'n sa .

²⁸ Nyanmiɛn su b'ɔ lafi'n ti, ɔ boli Delɛ-cɛn dilɛ'n bo, yɛ ɔ man be fa mmoja kpɛntɛn-kpɛntɛnnin anuan'm bé su nan anz b'ɔ ´ba talua ba yasua'm be kunlɛ'n ɔ'a kun-man Izraɛlfuɛ'm be liɛ'm be wie .

²⁹ Nyanmiɛn su bɔ Izraɛlfuɛ'm be lafi'n ti yɛ Jenvie ɔkwlɛ'n kpacili nan b'a sin nun nin-ɔn. Sanngɛ kɛ Eziptfuɛ'm be waan be ´su be su'n, nzue'n bu katali bé su .

³⁰ Nyanmiɛn su bɔ Izraɛlfuɛ'm be lafi'n ti yɛ kɛ be bo sin yiali Zeriko klɔ'n le nso'n, i wun nga be sili'n bu guali nin-ɔn .

³¹ Nyanmiɛn su bɔ Raab b'ɔ ti tekle bla'n lafi'n ti yɛ kɛ be bɔ bé nyin yi-man Nyanmiɛn'n be wuli'n ɔ'a wu-man wie nin-ɔn, yɛlɛ kɛ be nga be ɔli be mɛn'n i kpla nianlɛ'n, ɔ sikeli be kpa .

³² ?Nzu ndɛ yɛ n ´kɛn i ekun-ɔn? Sɛ n waan n ´kan Zedeɔn, nin Barak, nin Samsɔn, nin Zɛfte, nin David, nin Samiɛl, ɔ nin Nyanmiɛn nuan ijɔfuɛ'm be ndɛ'n, n su nyan-man n ti kɛn-mɛn i ngba.

³³ Nyanmiɛn su bɔ be lafi'n ti, be kwla nvle mun, be yo sa ng'ɔ ti i nuan su'n, be nyan like nga Nyanmiɛn waan ɔ ´man be'n, be cici asɔmɔli'm bé nuan,

³⁴ be nuan sin sroesroe, yɛ be flo be nga be waan be ´fa tokofi kun be'm bé sa nun. Be nga be lɛ-man wunmiɛn'n be nyannin fanngan, be yoli yakpa alɛ nun, yɛ be fuannin nvle wie'm be sonja mun .

³⁵ Bla wie'm be sran nga be wuli'n be cɛnnin, be wunnin be ekun. Be kleli wie'm be nyrɛnnɛn lele be kunnin be, b'a klo-man kɛ be de be, afin be klo kɛ be ´cɛn nan be ´nyan nguan kpa .

³⁶ Be to wie'm be mma, be fa nyantiaan bo be, be fa jrɔkɔ ci wie mun, yɛ be wla be bisua.

³⁷ Be fin be yɛbuɛ, be wlan-wlan be, be fa si be kpaci be nun, yɛ be fa tokofi kun be. Be wla bua nin boli kplo be kɔ wa kɔ wa, be nyan-man like fi, be wun nyrɛnnɛn, yɛ be yo be tɛtɛ.

³⁸ Be kpa'n ti'n, be nin mɛn nga nun tranlɛ a fata-man! Be wlan-wlan aawlɛ flɛnnɛn'm be nun nin oka'm bé su, yɛ be tran yɛbuɛ buɛ nin kunman'm be nun.

³⁹ Be kwlaa sɔ'n, Nyanmiɛn su bɔ be lafi'n ti, be nyannin dunman, sanngɛ b'a nyan-man like nga i waan ɔ ´fa man be'n.

⁴⁰ Afin Nyanmiɛn sieli like nga i kpa tra be liɛ'n lɔ sie ye, ɔ man sɛ e nun-man be nun wie'n, be su yo-man kpa.