Hébreu 10 - NYANMIƐN NDƐ'N 1998

¹ Afin mmla'n ti kɛ like kpakpa nga be ´ba'n be wawɛ sa, ɔ kle-man be wafa kpa'n. I sɔ'n ti yɛ kɛ be fa su bɔ be sɔ Nyanmiɛn i wafa kunngba afuɛ nuan kwlaa'n, ɔ kwla yo-man man be nga be fa bé wun mantan Nyanmiɛn sɔ'n be yo-man sran kpa mlɔnmlɔn nin-ɔn.

² ?Sɛ ɔ kwla yo man be yo kpa'n, wuun b'a yaci-man Nyanmiɛn i sɔlɛ'n? Afin sɛ be nga be sɔ i sɔ'n bé wun sa'n kwla wie mlɔnmlɔn'n, wuun be klun titi-man be bé sa tɛ'n ti kun.

³ Sanngɛ i sɔlɛ sɔ'n man bé wla kpɛn bé sa tɛ'n su afuɛ nuan'n kwlaa.

⁴ Afin nannin tola'n nin boli kpakpuɛ'm be mmoja'n ɔ kwla wie-man bé wun sa'n.

⁵ I sɔ'n ti yɛ kɛ Krist ´ba mɛn'n nun'n ɔ seli kɛ: «W'a kunndɛ-man kɛ ´n yi tɛ annzɛ sraka man wɔ, sanngɛ a mannin min wunnɛn.

⁶ Tɛ nga be yrɛ i nnɛn kɔlikɔli'n annzɛ ɔ kpatalɛ tɛ'n, be jɔ-man ɔ klun.

⁷ Yɛ n seli kɛ: ‹Nyanmiɛn, min yɛ, n su ba ɔ klun sa yolɛ.› Afin be klɛli min wun ndɛ sɔ mmla fluwa'n nun .»

⁸ Ɔ dun mmua seli kɛ: «W'a kunndɛ-man tɛ nin sraka, nin tɛ nga be yrɛ i nnɛn'n kɔlikɔli'n, ɔ nin ɔ kpatalɛ tɛ'n, yɛ be jɔ-man ɔ klun.» Sanngɛ be fa mɛn i kɛ be klɛli mmla'n nun kɛ be `fa mɛn i'n sa.

⁹ I sin ɔ seli kɛ: «Min yɛ, n su ba ɔ klun sa yolɛ.» I sɔ'n nun'n, Nyanmiɛn man be yacili i sɔlɛ wafa laa liɛ'n, ɔ fa uflɛ kacili i .

¹⁰ Kɛ Jésus-Krist yoli Nyanmiɛn klun sa'n, b'ɔ fɛ i wun mɛnnin i kpɛ kunngba b'ɔ su yo-mɛn i kun'n, é ti tɛ yɛ ɔ fɛ i wun yili-ɔ.

¹¹ Cɛn kwlaa Nyanmiɛn nyrun jranfuɛ'm be kwlaa be o be junman'n su, be sɔ Nyanmiɛn i wafa kunngba'n titi, sanngɛ i sɔlɛ sɔ'n kwla wie-man bé wun sa'n mlɔnmlɔn .

¹² Krist liɛ'n, kpalɛ kunngba nga ɔ sɔli i'n, ɔ kpɛ i kwlaa ti, ɔ man be kunndɛ-man uflɛ kun. I sin ɔ ko trannin Nyanmiɛn i fama su.

¹³ Siɛn'n ɔ ti lɔ, ɔ su minndɛ kɛ Nyanmiɛn man ɔ tiɛ i kpɔfuɛ'm bé su .

¹⁴ Afin kɛ ɔ sɔli Nyanmiɛn kpalɛ kunngba sɔ'n, ɔ man be kwlaa nga ɔ fɛ i wun yili bé ti tɛ'n, be yoli sran kpa mlɔnmlɔnmlɔn.

¹⁵ Nyanmiɛn Wawɛ'n kan ndɛ kunngba'n kle ye. Afin ɔ se kɛ:

¹⁶ «E Min'n seli kɛ: ‹Amun `nian, cɛn wie lele aenguɛ nga e nin be tra'n yɛ: N `fa min mmla'n n ´wla be anwlɛn'n nun, yɛ n ´fa klɛ be akunndan'n nun.› »

¹⁷ I sin ɔ seli kɛ: «N su bo-man bé sa tɛ'n nin bé sa tɛtɛ yolɛ'n su n di-man jɔlɛ kun .»

¹⁸ Ɔ man sran nga Nyanmiɛn yaci i sa tɛ'n cɛ i'n, ɔ kunndɛ-mɛn i sa tɛ'n i ti nnɛn kun.

Man e fa é wun mantan Nyanmiɛn kpa

¹⁹ I sɔ'n ti'n, aniaan mun, e si weiin kɛ e kwla wlu Nyanmiɛn lika kpa'n nun Jésus mmoja'n ti.

²⁰ Afin Jésus kpɛli atin mannin e koko nun wa, ɔ tannin-man mlɔnmlɔn. Ɔ tili tannin'n b'ɔ kpɛ Nyanmiɛn i sua'n nun'n nun, ɔ ɔli i sin lɔ, tannin sɔ'n yɛlɛ i wunnɛn'n.

²¹ E lɛ Nyanmiɛn nyrun jranfuɛ'm be su kpɛn kun bɔ be fɛ i sieli Nyanmiɛn i awlo'n su.

²² I sɔ'n ti'n, man e fa é wun mantan Nyanmiɛn. Kɛ e ´yo sɔ'n, nán man akunndan tɛ tran e klun, man e lafi i su kpa, afin ɔ man é wun sa'n b'ɔ man e klun titi ye'n ɔ wieli, yɛ ɔ fa nzue klengle wunnzinnin e .

²³ Man e tra like nga e kɛn i ndɛ kɛ é wla o su'n i kekle, nán man é sa'n kpɔ, afin Nyanmiɛn b'ɔ se kɛ ɔ ´yo man ye'n, ɔ ti nanwlɛfuɛ.

²⁴ Man e bu e wiengu'm be akunndan e wla be fanngan nan be klo bé wun yɛ be yo sran ye.

²⁵ Nán man e yaci yialɛ'n kɛ sran wie'm be yo'n sa. Sanngɛ man e yia e tu é wun fɔ. Siɛn'n bɔ an wun kɛ e Min'n i cɛn'n su mantan'n, an `yo i sɔ tra su.

²⁶ Afin sɛ e si nanwlɛ'n nan e nyinfu e yo sa tɛ ekun'n, i sɔ sa liɛ'n ɔ lɛ-mɛn i ti nnɛn kun.

²⁷ Like ng'ɔ ka'n b'ɔ yo e sro'n yɛlɛ fɔ nga Nyanmiɛn wa bu i kpɔfuɛ mun'n, ɔ nin sin sroesroe b'ɔ wa yra be'n .

²⁸ Sran kwlaa ng'ɔ tɔn Moiz mmla'n, sɛ sran nnyɔn annzɛ nsan be kan'n, be si-mɛn i aunnvuɛ, be kun i .

²⁹ ?Sɛ ɔ ti sɔ'n, be nga be yo Nyanmiɛn Wa'n i finfin'n, bɔ be bu-man aenguɛ nga Nyanmiɛn waan ɔ nin sran'm be ´tra i wa'n i mmoja b'ɔ man bé wun sa'n wie'n i like fi'n, bɔ be kpɛ Nyanmiɛn Wawɛ'n b'ɔ yo sran ye'n i nzowa'n, an bu be liɛ'n sɛ? Be liɛ'n ´yo tɛ tra su .

³⁰ Afin e si sran ng'ɔ seli kɛ: «Min yɛ n tu klunngbɔ nin-ɔn, yɛ min yɛ n ´tua be kalɛ-ɔ,» yɛ ɔ kɛnnin ekun kɛ: «E Min'n i ja su yɛ be ´fɛ i sran mun kɔ-ɔ .»

³¹ Sɛ Nyanmiɛn b'ɔ lafi-man'n ɔ nyan sran kun'n, i sɔfuɛ'n i yako!

³² Laa bɔ kɛ Nyanmiɛn man an wunnin ase'n, nyrɛnnɛn dan kpa nga an wunnin i'n bɔ an jrannin kekle'n, an `bu i akunndan.

³³ Cɛn wie be kpɛ amun nun wie nzowa, yɛ be yo amun tɛtɛ nzra nun, cɛn wie kusu an fa amún wun wla be bɔ be su yo be tɛtɛ'n be nun.

³⁴ Afin an wun bisuafuɛ'm be aunnvuɛ. Kɛ sran'm be ´de amun ninnge mun amún sa nun'n, amun nin be a kpli-man, sanngɛ amun klun jɔli su, afin an si kɛ an lɛ ninnge wie bɔ be ti kpa tra nga lɛ'n, bɔ be ´ka lɛ tititi.

³⁵ Nán an yi amún nyin like nga amún wla o su'n su, afin mo yolɛ dan kpa o su!

³⁶ An `tra amun anwlɛn nan amu'an yo Nyanmiɛn klun sa nan amu'an nyan like nga i waan ɔ ´fa man amun'n.

³⁷ Afin be klɛli i kɛ: «Ɔ cɛ kan'n, ɔ ka bɔ kaan sa, sran nga be waan ɔ ´ba'n, ɔ su cɛ-man, ɔ ´ba.

³⁸ Yɛ min sran ng'ɔ lafi n su, b'ɔ man ɔ kaci sran kpa'n, ɔ ´nyan nguan. Sanngɛ sɛ ɔ cuɛn i wun kɔ siɛn'n, n klun su jɔ-mɛn i wun .»

³⁹ E liɛ'n, nán be nga be cuɛn bé wun kɔ siɛn'n b'ɔ man be mlin'n be wie yɛlɛ ye, sanngɛ e ti be nga be lafi Nyanmiɛn su bɔ be nyan bé ti'n be wie.