Hébreu 1 - NYANMIƐN NDƐ'N 1998

Nyanmiɛn kannin ndɛ

¹ Lalafuɛ nun Nyanmiɛn man i nuan ijɔfuɛ'm be bobo i ndɛ'm be su wafa-wafa kleli e nannan mun.

² Sanngɛ e bɔ e su kɔ mɛn'n i bue nuan'n, ɔ man i Wa'n yɛ ɔ kan ndɛ kleli ye-ɔ. I yɛ ɔ man ɔ yili mɛn'n nin ninnge'n kwlaa-a, yɛ ɔ seli kɛ ɔ ´fa like'n kwlaa mɛn i.

³ I yɛ ɔ man e wun Nyanmiɛn b'ɔ yi i wun nglo nyannyannyan nin-ɔn, ɔ fa Nyanmiɛn i wafa kwlaa ng'ɔ ti'n, i nuan nun ndɛ'n yɛ man ninnge'n kwlaa be o lɛ-ɔ. Kɛ ɔ yoli bɔ sran'm bé wun sa'n wieli'n, ɔ ko trannin Nyanmiɛn b'ɔ ti Wlengbi'n i fama su nyanmiɛn su lɔ.

⁴ Ɔ man ɔ yoli kpa tra anz mun, kɛ i dunman nga Nyanmiɛn fa flɛli i'n kusu ti dan tra be liɛ'n sɔ-ɔ.

Jésus-Krist i kpa tra anz mun

⁵ ?Afin anz'm be nun onin yɛ Nyanmiɛn seli i kɛ: «A ti n wa, ndɛkɛn m'an kaci ɔ si-ɔ?» ?Yɛ be nun onin ekun yɛ ɔ kɛn i ndɛ kɛ: «N ´yo i si, yɛ i kusu ɔ ´yo n wa-a ?»

⁶ Kɛ ɔ ´fɛ i Wa kpɛn'n ba mɛn nun'n, ɔ kɛnnin i ekun kɛ: «Man min anz'm be kwlaa be koto i bo be mɛnmɛn i.»

⁷ Yɛ ɔ kɛnnin i anz'm be ndɛ kɛ: «N kaci min anz mun kɛ aunngban sa, yɛ n kaci min sran mun kɛ sin taaman sa .»

⁸ Sanngɛ ɔ kɛnnin i Wa'n i ndɛ kɛ: «Nyanmiɛn, ɔ bia'n wo lɛ tititi,» yɛ: «Sielɛ nga a sie sran mun'n, a sie be kpa.

⁹ A klo sa ng'ɔ ti kpa'n, a klo-man sa tɛ'n mlɔnmlɔn. I sɔ'n ti yɛ min Nyanmiɛn b'ɔ ti ɔ Nyanmiɛn'n fali wɔ b'ɔ guali be klun jɔlɛ ngo ɔ su nin-ɔn. Ɔ yacili ɔ wiengu'm be lɛ ɔ fali wɔ .»

¹⁰ Yɛ ɔ kɛnnin i ekun kɛ: «Nannan, kɛ ɔ fin lalafuɛ nun'n, wɔ yɛ a yili asiɛ nin-ɔn, yɛ ɔ sa nuan like yɛlɛ nyanmiɛn b'ɔ la nglo lɔ plaii.

¹¹ Be ´saci, sanngɛ ɔ liɛ'n a ´ka lɛ, nyanmiɛn b'ɔ la nglo lɔ plaii nin asiɛ'n be ´yo kɛ tralɛ nvuɛn sa.

¹² A ´bubu be nun kɛ kondro sa, a ´kaci be kɛ be kaci tralɛ'n sa. Sanngɛ ɔ liɛ'n, a ´ka wɔ osu'n nun, wɔ afuɛ liɛ'n su wie-man mlɔnmlɔn .»

¹³ ?Yɛ anz'm be nun onin yɛ ɔ seli i kɛ: «Tran ase n fama su, lele m man n yi ɔ kpɔfuɛ'm be ase ɔ bo nan n fa be yo ɔ ja siesiewlɛ-ɔ ?»

¹⁴ ?Anz'n kwlaa bɔ be ti aolia nun sran bɔ be su Nyanmiɛn'n, w'a sunman-man be kɛ be wa nian be nga be wa nyan bé ti'n bé su?