Ndɛ Nga Nyanmiɛn I Nuan Ijɔfuɛ Aze Kannin'n 2 - NYANMIƐN NDƐ'N 1998

Nyanmiɛn sua uflɛ'n i klanman'n

¹ Kɛ Dariis trannin famiɛn bia su'n, i afuɛ nnyɔn'n i anglo nso'n i le ablaɔn-nin-kun su'n, Anannganman'n fali ndɛ wlali Aze b'ɔ ti i nuan ijɔfuɛ i nuan.

² I waan: «Se Sealtiɛl wa Zorobabɛl b'ɔ sie Zida'n, nin Zozadak wa Zozie b'ɔ ti Nyanmiɛn nyrun jranfuɛ'm bé su kpɛn'n, ɔ nin Izraɛlfuɛ nga'm be kwlaa kɛ:

³ ‹?Laa, kɛ Anannganman i sua'n i klanman fa ti ju'n, amun nun'n, wan yɛ ɔ wunnin i bɔ i wla tɛ o su-ɔ? ?Yɛ kɛ amun wun i ndɛ'n, ɔ ti sɛ? ?Kɛ amun nian'n, i klanman'n ɔ'a kpɛ-man su yɛ ɔ o lɛ-ɔ ?

⁴ I ti Zorobabɛl, mian ɔ́ nyin, Zozadak wa Zozie, wɔ bɔ a ti min nyrun jranfuɛ'm bé su kpɛn'n, tra wɔ anwlɛn! Amun kwlaa nga amun wo Izraɛl mɛn'n nun'n, amun `tra amun anwlɛn yɛ amun `di junman'n, afin m bɔbɔ min Anannganman bɔ n sie mɛn wunmuan'n, n jin amún sin. M bɔbɔ min yɛ n fua n kle amun sɔ-ɔ.

⁵ Aenguɛ nga kɛ amun fin Ezipt be ´ba bɔ e trali'n, i su yɛ e tɛ wo-ɔ. E nin amun e o nun titi. Nán srɛ kun amun.›

⁶ Afin, Anannganman b'ɔ sie mɛn wunmuan'n wan yoo: ‹Ɔ ka kaan n ´keje nyanmiɛn su lɔ nin asiɛ'n, n ´keje jenvie'n nin asiɛ'n .

⁷ N ´keje aofuɛ'm be nun. Bé bo ninnge kpakpa'm be ´sɔn kpanngbangban. N ´yo man mín sua'n ´nyan nyrun ekun. M bɔbɔ min yɛ n kan sɔ-ɔ.

⁸ Nanwlɛ, jɛtɛ ufue nin sika ɔkwlɛ nga be o mɛn wunmuan'n nun'n be ti m bɔbɔ n liɛ.

⁹ Ɔ man min sua nga i klanman ´tra klikli liɛ'n. Kpɛkuun m ´man amun fɔundi lika nga nun wa. M bɔbɔ min Anannganman b'ɔ n sie mɛn wunmuan'n, min yɛ n fua kle amun-ɔn.› »

Nyanmiɛn nyrun jranfuɛ'm be sa usalɛ

¹⁰ Kɛ Dariis trannin famiɛn bia su'n, i afuɛ nnyɔn i anglo ngwlan'n, i le ablaɔn-nin-nnan su'n, Anannganman b'ɔ sie mɛn'n wunmuan'n, ɔ kannin ndɛ kleli Aze b'ɔ ti i nuan ijɔfuɛ'n.

¹¹ I waan: «Aze, se min nyrun jranfuɛ mun man be kpɛ ndɛ yɛ'n nun.

¹² Usa be kɛ yoo: ‹?Sɛ sran kun fa Anannganman i tɛ nnɛn'n wie sie i tralɛ'n nun'n, nan i sɔ tralɛ liɛ'n ko kan kpaun annzɛ nnya-nnya nga be di'n wie, annzɛ nzan, annzɛ ngo, annzɛ like kwlaa nga be di'n wie nin-ɔn, be ´se kɛ i sɔ like diwa liɛ'n ´yo Anannganman liɛ?› » Kpɛkuun Nyanmiɛn nyrun jranfuɛ'm be waan: «Cɛcɛ.»

¹³ Yɛ Aze usali be ekun kɛ: «?Yɛ sɛ sran wie kan fuɛn, b'ɔ ti kɛ i sɔ sran'n wo fiɛn nun'n, sɛ ɔ ko kan like nga be di'n, wuun ɔ ti kɛ fiɛn'n ɔ'a kɛn i sɔ like liɛ'n wie?» Nyanmiɛn nyrun jranfuɛ'm be tɛli i su kɛ: «Ɛɛn, wuun fiɛn'n ɔ'a kɛn i.»

¹⁴ Yɛ Aze waan: «Yoo! Anannganman'n waan kɛ nvle nga ti sɔ-ɔ. Nvle nga nun sran mun nin be junman nga be di'n, kɛ be ti sɔ-ɔ, be tɛ nga be yi be man min'n ti fiɛn.»

Kɛ ɔ fin ndɛ'n amun `sie amún nyin ase wɛtɛɛ

¹⁵ «Kɛ ɔ fin ndɛ'n, amun `sie amún nyin ase wɛtɛɛ be `nian like ng'ɔ wa ba siɛn'n, nan sɛ amun ´fa yɛbuɛ be ´siesie be wiengu su be bo min sua'n i kplanlɛ bo-ɔ amun a bo.

¹⁶ ?Nguɛ sa yɛ ɔ tɔli amún su laa? ?Kɛ sran kun waan ɔ su ko fa ble kilo ablaɔn'n, nán kilo blu cɛ yɛ ɔ nyɛn i tanngannin'n nun lɔ-ɔ? ?Kɛ i waan ɔ su ko sa nzan litri ablenun nzan sɛ'n nun'n, nán litri ablaɔn cɛ yɛ ɔ nyɛn i-ɔ?

¹⁷ Amun junman nga amun dili'n, n sacili be ngba'n. Amun ninnge nga amun luali be'n, n fali tukpacɛ n yili bé wun, n fali nzraama bɔ kɛ nzue tɔ'n ɔ gua'n n fa sacili be. Sanngɛ amu'an sa-man amun sin mín wun.

¹⁸ Kɛ ɔ fin ndɛ'n, amun `sie bé nyin ase wɛtɛɛ be `nian like ng'ɔ wa ba'n. Cɛn nga be wlali mín sua nga i bo ase'n, yɛlɛ anglo ngwlan'n i cɛn ba ablaɔn-nin-nnan'n su. Man ɔ tran amun klun kpa.

¹⁹ Ble fi nun-man tanngannin'm be nun kun. ?Ato-ɔ? Vinyi, nin figie, nin grenadie ɔ nin olivie'm b'a su-man mlɔnmlɔn. Sanngɛ kɛ ɔ fin ndɛ'n, n ´yo man amun ´di ye.»

Like nga Anannganman waan ɔ ´fa yo Zorobabɛl b'ɔ kpɛli i'n

²⁰ Le kunngba sɔ'n nun, anglo'n i le ablaɔn-nin-nnan'n su'n, Anannganman kannin ndɛ kleli Aze ekun. Ɔ seli i kɛ yoo:

²¹ «Kan kle Zorobabɛl b'ɔ sie Zida'n kɛ: ‹N ´keje nyanmiɛn ng'ɔ la nglo lɔ plaii nin asiɛ'n .

²² N ´yi famiɛn'm be ase. N ´yo man be kwlalɛ'n ´wie. N ´utu kakaklolo mun nin be nun sran mun. N ´yo man nnɛn kpanngɔ'm be ´wu. Be nga be fu bé su'n, be ´kun be wiengu .

²³ I cɛn sɔ nun'n, Sealtiɛl wa Zorobabɛl, wɔ bɔ a ti min sufuɛ, n ´fa wɔ. A ´yo kɛ min sa nzɔliɛ sa, afin wɔ yɛ m'an kpa wɔ-ɔ. M bɔbɔ min Anannganman bɔ n sie mɛn wunmuan'n, yɛ n kɛn i sɔ ndɛ mun-ɔn .› »