Ndɛ Nga Nyanmiɛn I Nuan Ijɔfuɛ Aze Kannin'n 1 - NYANMIƐN NDƐ'N 1998

Anannganman i sua kplanlɛ blɛ'n nian ju-man

¹ Kɛ Dariis trannin famiɛn bia su'n, i afuɛ nnyɔn'n i anglo nsiɛn'n i cɛn klikli'n su'n, Anannganman kannin ndɛ kleli Aze b'ɔ ti i nuan ijɔfuɛ'n. I waan ɔ `se Sealtiɛl wa Zorobabɛl b'ɔ sie Zida'n ɔ nin Zozadak wa Zozie b'ɔ ti Nyanmiɛn nyrun jranfuɛ'm bé su kpɛn'n be kɛ:

^2-3 «Anannganman wan yoo: ‹Sran'm be waan: Anannganman i sua'n kplanlɛ blɛ'n nian ju-man.

⁴ B'a wlawla bé sua liɛ'm be nun ninnge kpakpa mun, sanngɛ m bɔbɔ min Anannganman mín sua liɛ'n ɔ'a bubu. ?Kɛ be yo i sɔ lɛ'n, ɔ nin i fata?› »

⁵ Anannganman b'ɔ sie mɛn'n wan yoo: «Ajalɛ nga amu'an fa'n, amun `bu i akunndan be `nian.

⁶ Amun fie'm bé su ninnge nga amun luali'n, ɔ'a sɔn-man ngowa, sanngɛ be su mma nga amun tili'n ti kaan sa. Aliɛ nga amun nyɛn i be di'n, ɔ ju-man amun. Nzan nga amun nyɛn i be nɔn'n, ɔ ju-man amun. Tralɛ nga amun nyɛn i be wla'n, ɔ kwla tu-man amún wun ayrɛ'n. Amun junman difuɛ'm be sika'n ɔ ti kɛ sika bɔ b'a fa sie bɔlɛ bɔ i bo ti fitiwa'n nun sa.»

⁷ Anannganman b'ɔ sie mɛn wunmuan'n waan: «Ajalɛ nga amu'an fa'n, amun `bu i akunndan be `nian.

⁸ Amun `fu oka'm be su be `ko kpɛ waka be bla nan amun `wa kplan min sua'n. I liɛ nɛnnɛn nga amun ´di min'n, min klun ´jɔ su. M bɔbɔ min Anannganman'n yɛ n kan sɔ-ɔ.

⁹ Amun buli kɛ amun wa nyan aliɛ kpanngban, kpɛkuun amun nyannin kaan sa. Nga amun fa ɔli klɔ'n, kɛ n fitali su'n, ɔ bo sanndili. ?Ɔ yo sɛ ti yɛ ɔ yoli sɔ-ɔ?» Anannganman b'ɔ sie mɛn waan: «Mín sua'n ɔ'a bu kusu wuun amun su kplin bé nyin be si amún sua liɛ mun.

¹⁰ I ti yɛ man bɔlɛ kaan sa ɔ'a fin-man nyanmiɛn su lɔ ɔ'a kpɛntɛn-man asiɛ wun wa, bɔ kusu ninnge nga amun luali be fie'm be su'n b'a yo-man kpa nin-ɔn.

¹¹ N yoli man ngua wa lika'n nin oka lika'm be wuli kee. Ble fie mun nin vinyi fie, nin olivie fie mun, ɔ nin fie wafa-wafa'n kwlaa, wie fi ɔ'a yo-man ye. Sran nin nnɛn'm be kwlaa be fɛli. Sran'm be junman'n, wie fi ɔ'a yo-man ye.»

¹² Sealtiɛl wa Zorobabɛl nin Zozadak wa Zozie b'ɔ ti Nyanmiɛn nyrun jranfuɛ'm be su kpɛn'n, ɔ nin Izraɛlfuɛ'm be kwlaa be fali Anannganman be Nyanmiɛn'n i nuan su ndɛ ng'ɔ fa wlali i nuan ijɔfuɛ Aze nuan kɛ ɔ `kan kle be'n su. Ɔ man srɛ kunnin be Anannganman wun.

¹³ Anannganman kannin ndɛ kleli Aze b'ɔ ti sran b'ɔ sunmɛn i'n, yɛ i kusu niannin su kan kleli be-ɔ. I waan: «N jin amún sin, m bɔbɔ min Anannganman yɛ n fua n kle amun sɔ-ɔ.»

¹⁴ Anannganman'n mannin Zorobabɛl b'ɔ sie Zida'n nin Zozie b'ɔ ti Nyanmiɛn nyrun jranfuɛ'm be su kpɛn'n, ɔ nin Izraɛlfuɛ'm be kwlaa be wunmiɛn kɛ laa'n sa nan be kwlaa b'a bo be Nyanmiɛn'n b'ɔ sie mɛn'n wunmuan'n i sua'n i kplanlɛ bo

¹⁵ afuɛ kunngba sɔ'n i anglo nsiɛn'n i le ablaɔn-nin-nnan su.