Galasifuɛ Mun 6 - NYANMIƐN NDƐ'N 1998

Be wiengu bo suanlɛ

¹ Aniaan mun, sɛ an wun kɛ amun niaan kun su yo sa wie b'ɔ ti-man kpa'n, amun bɔ Nyanmiɛn Wawɛ'n sie amun'n, an `kle i atin ng'ɔ ti kpa'n amanniɛn su. Sanngɛ an `nian amun bɔbɔ amun wun nan amu'an yo-man sa kunngba sɔ'n wie.

² Sɛ an wun amun niaan kun bɔ i trɔ'n su ti i'n, an `ukɛ i. Sɛ an yo i sɔ'n, wuun amu'an wie Krist mmla'n su fa.

³ Sɛ sran kun bu i wun kɛ ɔ ti sran dan b'ɔ ti-man sɔ'n, wuun ɔ'a lɛkɛ i bɔbɔ wun.

⁴ Man sran kun niɛn i bɔbɔ i nyoliɛ'n, sɛ ɔ wun kɛ ɔ ti kpa'n, ɔ ´yo i fɛ, ɔ man ɔ su fa-man sran uflɛ liɛ'n sunnzun-mɛn i liɛ'n.

⁵ Afin sran kun bɔbɔ yɛ ɔ ´suɛ i trɔ nin-ɔn.

⁶ Sran nga be kle i Nyanmiɛn ndɛ'n, i like kpakpa'n kwlaa ng'ɔ lɛ i'n, man ɔ mɛn i like klefuɛ'n wie.

⁷ Nán an laka amun wun. Be kwla yo-man Nyanmiɛn finfin, afin like nga sran kun lua'n yɛ ɔ ti-ɔ.

⁸ Sɛ sran kun lua like nga i bɔbɔ klun klo'n, i mma nga b'ɔ ti'n yɛlɛ i bɔbɔ i klun sa bɔ i agualiɛ yɛlɛ wie'n. Sanngɛ sɛ ɔ lua like nga Nyanmiɛn Wawɛ'n klo i'n, i mma nga Wawɛ sɔ'n man ɔ ti'n yɛlɛ anannganman nguan'n.

⁹ Nán man é sa sin bubu ye sa kpa yolɛ'n nun, afin sɛ y'a fɛ-man'n, cɛn wie e ´nyɛn i nuan like.

¹⁰ Ɔ man sɛ e nyɛn i wun alaje'n, man e yo sran'm be kwlaa be ye, sanngɛ man e dun mmua yo man e niaan nga e nin be e lafi Krist su'n.

Be afɔtuɛ manlɛ nin i nuan yralɛ

¹¹ An `nian, m bɔbɔ yɛ n fa min sa n klɛ ng'ɔ o yɛ fuɛ nin-ɔn. I sɔ'n ti, fluwa mma'm be ti dandan.

¹² Be nga be klo kɛ sran'm be bu be sran'n, be yɛ be mian amun kɛ an wla klɛn nin-ɔn. Be waan be ´yo i sɔ nan b'a kle-man be yalɛ Krist i waka'n ti.

¹³ Be nga be wla klɛn sɔ'n, be bɔbɔ be fa-man mmla'n su, sanngɛ be klo kɛ an wla klɛn nan like nga be yoli i amún kplo'n su sɔ'n, be ´fa di bé nuan.

¹⁴ N liɛ'n, n su fa-man like fi di-man min nuan mlɔnmlɔn san e Min Jésus-Krist i waka'n, i waka sɔ'n ti n ti kɛ sran bɔ ɔ'a wu b'ɔ nin mɛn'n ɔ'a bu'n sa, yɛ mɛn'n kusu ti kɛ sran bɔ ɔ'a wu b'ɔ nin min a bu'n sa.

¹⁵ Sɛ be wla klɛn o, sɛ b'a wla-man klɛn o, nɛ́n i li yɛ be nian-an, nga be nian'n yɛlɛ uflɛ bɔ Nyanmiɛn bo ye'n.

¹⁶ Be kwlaa nga be fa ndɛ sɔ'n su'n, nin Izraɛlfuɛ nga be ti i liɛ sakpa'n, man Nyanmiɛn wun be aunnvuɛ nan bé wun jɔ be fɔuun !

¹⁷ Kɛ ɔ fin ndɛ'n, nán man sran fi kle n yalɛ kun, afin kannvuɛn ng'ɔ o min wun'n kle kɛ n ti Jésus i akua.

¹⁸ Aniaan mun, man e Min Jésus-Krist b'ɔ ti aklunyefuɛ'n nin amun tran! Man ɔ yo sɔ!