Galasifuɛ Mun 5 - NYANMIƐN NDƐ'N 1998

Jasin fɛ b'ɔ man sran di alaje'n

¹ Alaje dilɛ ti yɛ Krist kpɔli é ti-ɔ. I sɔ'n ti'n, an `jran kekle, nán an fa amun wun wla kanga'n nun.

² An `tie ndɛ bɔ m Pɔl m ma kan kle amun'n. Ndɛ sɔ'n yɛ, sɛ amun man be wla amun klɛn'n, Krist su yo-man like fi man-man amun.

³ N ´kan kle be kwlaa nga be waan be ´wla klɛn mun'n kpa ekun kɛ san be ´fa mmla'n kwlakwlakwla su.

⁴ Amun bɔ amun waan amun ´fa mmla'n su nan Nyanmiɛn bu amun sran kpa'n, amun nin Krist amu'an bu, yɛ ye nga Nyanmiɛn yo sran'n, ɔ'a to a fuan amun.

⁵ E liɛ'n, é wla o Nyanmiɛn su kpa kɛ ɔ ´bu ye sran kpa i su bɔ i Wawɛ'n man e lafi'n ti, e minndɛ kɛ ɔ ´yo e sɔ.

⁶ Kɛ e nin Krist-Jésus y'a kaci sran wunmuan'n, sɛ e wla klɛn o, sɛ y'a wla-man klɛn o, nɛ́n i li yɛ be nian-an, sanngɛ klolɛ bɔ e fa klo sran nin Nyanmiɛn'n i su bɔ e lafi'n i li yɛ be nian-an.

⁷ Laa an boli manndrɛn kpa. ?Wan yɛ man an jrannin b'ɔ man an lafi-man ndɛ nanwlɛ'n su kun-ɔn?

⁸ Ndɛ nga be kan kleli amun'n, ɔ fin-man Nyanmiɛn b'ɔ flɛli amun'n.

⁹ Kpaun ayre kaan'n bɔ be fa guɛ i kpaun nzuɛn nun'n yɛ man i wunmuan'n wla-a .

¹⁰ Sran wunmuan bɔ e nin e Min'n y'a kaci'n ti'n, ń wla wo amun su kpa kɛ an su bu-man akunndan uflɛ. Sanngɛ sran ng'ɔ sanngan amun akunndan'n, sɛ ɔ ti sɛ ti sɛ o, Nyanmiɛn ´tu i fɔ.

¹¹ ?Sanngɛ n liɛ'n, aniaan mun, sɛ lele ndɛ n tɛ kan klɛn wlalɛ ndɛ'n, nguɛ ti yɛ be tɛ kle n yalɛ-ɔ? Sɛ n tɛ yo sɔ'n, Krist i waka'n su bobolɛ ndɛ bɔ n kan'n, ɔ su yo-man sran ngasi kun.

¹² Be nga be sanngan amun akunndan'n, man be wla klɛn lelele be `sɛ bé wun!

¹³ Aniaan mun, Nyanmiɛn flɛli amun kɛ an nyan amún ti, sanngɛ amún ti bɔ amun nyɛn i sɔ'n ti'n, nán an yo klɔ sran nyoliɛ'n, sanngɛ an `bu amun wun kɛ an ti amun wiengu kanga, an `uka amún wun klolɛ bɔ an klo amun wun'n ti.

¹⁴ Afin be boli mmla'n kwlaa kpɔlɛ ndɛ kun nun seli kɛ: «Klo ɔ wiengu kɛ a fa klo ɔ bɔbɔ wun'n sa .»

¹⁵ Sanngɛ sɛ an kaka amun wun bɔ an titi amun wiengu sa bui'n, an `nian amún wun kpa, sɛ ɔ ti-man sɔ'n, amun wiengu saci amun.

Sa nga Nyanmiɛn Wawɛ'n kle sran kɛ ɔ yo'n

¹⁶ N se kɛ yo, an `yo sa nga Nyanmiɛn Wawɛ'n kle amun'n yɛ an su yo-man like nga klɔ sran konvi sɔ i'n kun.

¹⁷ Like nga klɔ sran klo i'n, Nyanmiɛn Wawɛ'n klo-mɛn i, yɛ like nga Nyanmiɛn Wawɛ'n klo i'n, klɔ sran klo-mɛn i, be nnyɔn'n bé nuan sɛ-man, ɔ man sa nga an klo kɛ amun ´yo'n, an kwla yo-man .

¹⁸ Sɛ an fa atin nga Nyanmiɛn Wawɛ'n kle amun su'n, Nyanmiɛn jran-man mmla'n su yɛ ɔ ´sie amun-ɔn.

¹⁹ E si klɔ sran i nzuɛn'n kpa, yɛlɛ bla nin bian kunndɛlɛ, sa tɛtɛ yolɛ, wlaka bolɛ,

²⁰ amuɛn sɔlɛ, bae dilɛ, sran kpɔlɛ, ɔ nin utre. Bé nyin ci be wiengu, be fa ya, bé bo ti-man kun, be bubu bé wun nun,

²¹ be lɛ konvi, be nɔn nzan bo, be yo sa finfin mun, yɛ be yo i sin sa wie mun ekun. Ndɛ kunngba nga n kan kleli amun laa'n, n ´kan kle amun ekun. Be nga be yo i sɔ sa'n, be su tran-man be nga Nyanmiɛn sie be'n be nun mlɔnmlɔn.

²² Sanngɛ sa nga Nyanmiɛn Wawɛ'n man sran yo'n yɛ: ɔ man be klo Nyanmiɛn nin sran, be klun jɔ, bé wla gua ase, be tra be anwlɛn, be yo sran ye, be yo aklunye, be di nanwlɛ,

²³ be yo wɛtɛɛ, yɛ be yo sa i nuan su. B'a sie-man ninnge sɔ'm be su mmla fi.

²⁴ Be nga be ti Krist-Jésus liɛ'n, be boboli be waka'n su, ɔ man b'a wla be konvi'n i ase, yɛ bé nyin blo-man ninnge'm be su kun.

²⁵ Sɛ Nyanmiɛn Wawɛ'n man y'a nyan nguan'n, man e yo like ng'ɔ kle ye'n kusu.

²⁶ Nán man e kunndɛ dunman, nán man e yo sa b'ɔ kun e wiengu ya, yɛ nán man e fa é nyin ci e wiengu.