Galasifuɛ Mun 4 - NYANMIƐN NDƐ'N 1998

¹ N se kɛ yoo: ba nga ɔ ´di i si i aja'n, kannzɛ like'n kwlaa ti i liɛ'n, kɛ ɔ tɛ yo bakan'n, ɔ nin kanga'n be ti kun.

² Kɛ ɔ tɛ yo bakan sɔ'n, ɔ o sran wie'm bé sa nun, be niɛn i su, yɛ wie'm be kusu be niɛn i ninnge'm be su lele san blɛ nga i si sieli'n ɔ'a ju.

³ E kusu, sɛ e kwla se kɛ ninnge nga e nannan'm be kle'n be ti sran'n, wuun e ´se kɛ kɛ e tɛ yo kɛ bakan sa'n, e ti be akua.

⁴ Sanngɛ kɛ blɛ nga Nyanmiɛn sieli'n juli'n, ɔ sunmɛnnin i Wa'n, bla kun wuli i, ɔ dili mmla'n su.

⁵ Ɔ bali kɛ ɔ ´de be nga be di mmla'n su'n nan e `kaci Nyanmiɛn klun ba mun.

⁶ Nyanmiɛn i mma mun bɔ an ti'n ti'n, ɔ sunmɛnnin i Wa'n i Wawɛ'n kɛ ɔ wa tran ye anwlɛn'n nun, ɔ kpan flɛ Nyanmiɛn kɛ: «Baba!»

⁷ I sɔ'n ti'n, an ti-man kanga mun kun, an ti Nyanmiɛn i mma mun. Kɛ an ti i mma mun'n ti'n, like ng'ɔ ti i liɛ'n ɔ ti amun liɛ.

Pɔl kokoli Kristfuɛ'm be ti

⁸ Laa an si-man Nyanmiɛn, ɔ man an su ninnge nga be nin sulɛ fata-man'n.

⁹ ?Sanngɛ siɛn'n, kɛ amu'an si Nyanmiɛn'n, annzɛ bɔ Nyanmiɛn bɔbɔ a si amun'n, nguɛ ti yɛ an klo kɛ amun ´sa amun sin kɔ ninnge ngbɛn-ngbɛn bɔ be kwla yo-man like fi'n bé sin ekun kɛ amun ´ko yo be akua-a?

¹⁰ An ci cɛn'n wie, nin anglo'n wie, nin le mɔcuɛ'n wie, ɔ nin afuɛ'n wie!

¹¹ Sɛ afɛ nga m'an fɛ i amun ti lelele'n ɔ yo ngbɛn'n, ɔ ´yo n ya.

¹² Aniaan mun, n ´srɛ amun kpa, an `yo amun wun kɛ min sa, afin n kusu m'an yo min wun kɛ amun sa. Amu'an yo-man min tɛ le.

¹³ An si kɛ jasin fɛ bɔ n kan kleli amun kliklikli'n, tukpacɛ'n b'ɔ tɔli min su'n ti yɛ n nyannin min ti n kannin-ɔn.

¹⁴ An fɛli dan min wunnɛn b'ɔ yoli n ya'n ti, sanngɛ m'an yo-man amun kain, amu'an yi-man min blo, an sɔli min nun kɛ Nyanmiɛn i anz sa annzɛ kɛ Krist-Jésus bɔbɔ sa.

¹⁵ Laa amun klun jɔ mín wun kpa. ?Nguɛ yɛ amu'an wun i siɛn nin-ɔn? Afin m boli amun dunman kɛ sɛ ɔ ti kɛ an kwla tu amun nyinma'n man min'n, wuun an tuli.

¹⁶ ?Ndɛ nanwlɛ nga n kan kleli amun'n ti'n, m'an kaci amun kpɔfuɛ?

¹⁷ Minniɛn sɔ'm be yo kɛ be klo amun sa sa, sanngɛ be klun akunndan'n ti-man kpa, be waan be ´yo sɔ nan amun nin min bu, nan an klo be, yɛ an su be su.

¹⁸ Sɛ amun kpa yolɛ ti yɛ amun ndɛ lo be titi'n, bɔ nán kɛ n wo amun wun lɔ'n ngunmin yɛ be yo i sɔ'n, ɔ ti kpa.

¹⁹ Min mma mun, amun ti n su wun nyrɛnnɛn kpa ekun kɛ bla bɔ ɔ'a koto awuliɛ'n sa, n ´wun nyrɛnnɛn sɔ'n lele san be ´wun Krist nzuɛn'n kwlakwlakwla amun nun.

²⁰ Ɔ ka n ngunmin-ɔn kɛ e ´se yɛ'n n wo amun wun lɔ nan m'an koko yalɛ a kle amun, afin amun ti'n, ń wla'n gua-man ase.

Agar nin Sara

²¹ ?Amun bɔ an klo kɛ mmla'n su yɛ amun ´di'n, an ti-mɛn i nun ndɛ'n? An `bua n wie.

²² Afin be klɛli i kɛ Abraam wuli ba yasua nnyɔn, ɔ nin afanniɛn'n be wuli kun, yɛ ɔ nin i yi b'ɔ ti diewa'n be wuli kun .

²³ Nga b'ɔ nin afanniɛn'n be wuli i'n, be wuli i kɛ sran wu ba titi'n sa, sanngɛ nga b'ɔ nin i yi bɔbɔ be wuli i'n, sa bɔ Nyanmiɛn seli kɛ ɔ ´yo'n ti yɛ ɔ wuli i-ɔ.

²⁴ Sa sɔ'n ti kɛ nyanndra sa, afin be kwla fa bla nnyɔn sɔ'n sunnzun aenguɛ wafa nnyɔn nga Nyanmiɛn nin sran'm be trali. Agar ti Sinai Oka b'ɔ o Arabi lɔ'n, i mma'm be ti kanga.

²⁵ Yɛ kɛ ndɛ Zerizalɛm o lɛ'n, ɔ fa bla sɔ'n b'ɔ nin i mma'm be ti kanga'n.

²⁶ Sanngɛ Zerizalɛm ng'ɔ o nyanmiɛn su lɔ'n, ɔ ti kɛ bla'n b'ɔ ti diewa'n sa, i yɛ ɔ ti e nin nin-ɔn.

²⁷ Afin be klɛli i kɛ: «Ɔ bɔ a bo-man akpue le'n, gua ɔ́ wla ase! Ɔ bɔ a nian wun-man ba wulɛ i nyrɛnnɛn le'n, kpan ɔ klun b'ɔ ti jɔwa'n ti, afin bla nga b'a yaci i'n, i mma'm be ´sɔn tra bla ng'ɔ tɛ ti i wun bo'n .»

²⁸ Aniaan mun, amun liɛ'n, an ti kɛ Izaak sa, sa nga Nyanmiɛn seli kɛ ɔ ´yo'n ti yɛ be wuli amun-ɔn.

²⁹ Laa ba nga be wuli i kɛ sran wu ba titi sa'n, ɔ kleli ba nga be wuli i Nyanmiɛn Wawɛ'n i fanngan nun'n i yalɛ, kɛ ɔ ti sɔ ndɛ-ɔ .

³⁰ ?Nyanmiɛn Ndɛ nga be klɛli'n, be klɛli i sɛ? Be klɛli i kɛ: «Fuan afanniɛn'n nin i wa'n, afin afanniɛn ba'n nin diewa bla'n i wa'n be kwla di-man aja kun .»

³¹ I sɔ'n ti'n, aniaan mun, e ti-man afanniɛn bla'n i wa, e ti diewa bla'n i wa.