Galasifuɛ Mun 3 - NYANMIƐN NDƐ'N 1998

Mmla'n nin Nyanmiɛn su lafilɛ

¹ Galasifuɛ sinnglinfuɛ mun! ?Amun bɔ be kannin Jésus-Krist i wulɛ ndɛ'n i weiin kleli amun b'ɔ man ɔ yoli kɛ ɔ yoli amun nyrun sa'n, wan yɛ ɔ wa lakali amun-ɔn?

² Sa kunngba nga n klo kɛ n ´usa amun'n yɛlɛ kɛ: ?Mmla'n bɔ an fali su'n ti yɛ Nyanmiɛn fɛ i Wawɛ'n mannin amun-ɔn, annzɛ jasin fɛ'n bɔ an tili an fali su'n ti yɛ ɔ fa mannin amun-ɔn?

³ ?Kɛ an ti sinnzin sa? An boli i bo Nyanmiɛn Wawɛ'n i fanngan nun. ?An klo kɛ amun ´guɛ i bo amun bɔbɔ amun fanngan nun siɛn'n?

⁴ ?Sa ng'ɔ tɔli amun su yɛ'n, i kwlaa'n ɔ ´yo ngbɛn? Nanwlɛ, ɔ kwla yo-man ngbɛn!

⁵ ?Nyanmiɛn b'ɔ fɛli i Wawɛ'n mannin amun b'ɔ yo sa kekleekle man amun'n, mmla'n bɔ an fa su'n ti yɛ ɔ yo i sɔ-ɔ, annzɛ jasin fɛ'n bɔ an tili an fali su'n ti-ɔ?

⁶ Kɛ Abraam liɛ'n yoli sɔ-ɔ: ɔ lafili Nyanmiɛn su, i su b'ɔ lafili sɔ'n ti yɛ ɔ buli i sran kpa nin-ɔn .

⁷ I sɔ'n ti'n, be nga be lafi Nyanmiɛn su'n, be ti Abraam wa .

⁸ Yɛ be boli su Nyanmiɛn Ndɛ nga be klɛli'n nun kɛ cɛn wie be nga be ti-man Zuif bɔ be lafi Nyanmiɛn su'n, ɔ ´bu be sran kpa, ɔ man ɔ boli ndɛ fɛ sɔ'n su kleli Abraam, ɔ seli i kɛ: «Ɔ ti'n, n ´yo nvle-nvle'm be kwlaa be nunfuɛ'm be ye .»

⁹ I sɔ'n ti'n, be nga be lafi Nyanmiɛn su'n, ɔ ´yo be ye kɛ Abraam b'ɔ lafili i su'n i liɛ'n sa.

¹⁰ Afin be kwlaa nga be fa bé wla gua mmla'n su falɛ su'n, bé wun su jɔ-man be le, afin be klɛli i kɛ: «Sran kwlaa ng'ɔ fa-man ndɛ nga be klɛli i mmla fluwa nun'n i kwlaa su titi'n, i wun jɔ-mɛn i le .»

¹¹ E si weiin kɛ mmla'n ti Nyanmiɛn su bu-man sran fi sran kpa, afin e kɛnngɛn i kɛ: «Sran ng'ɔ lafi Nyanmiɛn su bɔ man ɔ kaci sran kpa'n, ɔ ´nyan nguan .»

¹² Mmla'n fin-man Nyanmiɛn su bɔ sran lafi'n mlɔnmlɔn, sanngɛ e kɛnngɛn i kɛ: «Sran ng'ɔ fa mmla'n nun ndɛ'm bé su'n, ɔ ´nyan nguan .»

¹³ Kɛ Krist kacili sran bɔ Nyanmiɛn boli i sannzan e ti'n, ɔ fɛli i wun kpɔli é ti sannzan nga Nyanmiɛn boli ye mmla'n bɔ y'a fa-man su'n ti, afin be klɛli i kɛ: «Sran kwlaa nga be bo i kɔmin'n, wuun Nyanmiɛn boli i sannzan ti-ɔ .»

¹⁴ Ɔ yoli sɔ nan ye nga Nyanmiɛn seli Abraam kɛ ɔ ´yo i'n Jésus-Krist ti, ɔ ´yo man be nga be ti-man Zuif'n, nan e kusu e ´nyan Nyanmiɛn Wawɛ'n bɔ i waan ɔ ´fa man ye'n i su bɔ e lafi'n ti.

Mmla'n nin sa nga Nyanmiɛn waan ɔ ´yo'n

¹⁵ Aniaan mun, m ma kan sa kun bɔ sran'm be yo i titi'n kle amun. Sɛ sran nnyɔn bé nuan sɛ sa kun su'n, sran uflɛ kwla kaci-mɛn i, yɛ ɔ kwla uka-man su.

¹⁶ Nyanmiɛn seli Abraam kɛ ɔ ´yo like wie mɛn i nin i osufuɛ kun. Ɔ'a se-mɛn i kɛ ɔ ´yo mɛn i nin i osufuɛ mun. Nán sran kpanngban ndɛ yɛ ɔ kan-an, sanngɛ kɛ ɔ se kɛ ɔ nin wɔ osufuɛ kun, ɔ kan sran kun ndɛ. Sran sɔ'n yɛlɛ Krist .

¹⁷ An `nian ndɛ nga n waan n ´kan kle amun'n yɛ: sa nga Nyanmiɛn seli kɛ ɔ ´yo man sran'n, kɛ ɔ dili afuɛ ya nnan afuɛ ablasan bɔ mmla'n bali'n, ɔ man be kwla fa-man mmla'n kaci-man sa nga Nyanmiɛn waan ɔ ´yo'n kɛ be ´fa nunnun su .

¹⁸ Sɛ like nga Nyanmiɛn seli kɛ be nyɛn i'n, be nyɛn i mmla'n ti'n, wuun nán sa nga Nyanmiɛn seli kɛ ɔ ´yo'n ti yɛ be nyɛn i-ɔ. Sanngɛ sa ng'ɔ seli Abraam kɛ ɔ ´yo mɛn i'n ti yɛ ɔ yoli i ye-ɔ .

¹⁹ ?Sɛ ɔ ti sɔ'n, mmla'n yo i liɛ nzu? Nyanmiɛn sieli i kusu nan be wun kɛ sa tɛ'n ti tɛ, yɛ be dili su lele fa juli Abraam osufuɛ nga ti yɛ Nyanmiɛn seli kɛ ɔ ´yo like wie mɛn i'n i balɛ. Anz mun yɛ be fa wlali sran kun b'ɔ jran sran'm bé nuan'n i sa nun yɛ ɔ fa bali-ɔ.

²⁰ Sɛ sran kun waan ɔ ´yo like man sran'n, ɔ yi-man sran kɛ ɔ `ko se i nan bé nuan sɛ su, kɛ Nyanmiɛn liɛ'n yoli sɔ-ɔ.

Sa ti bɔ mmla'n wo lɛ'n

²¹ ?Like nga Nyanmiɛn waan ɔ ´yo'n, mmla'n ti ɔ yo-mɛn i kun? Ɔ ti-man sɔ mlɔnmlɔn! Sɛ Nyanmiɛn kwla fa mmla kun man sran b'ɔ man be ´nyan nguan'n, wuun ɔ mannin, yɛ mmla sɔ'n su falɛ'n ti ɔ ´bu sran'n i sran kpa.

²² Sanngɛ e kɛnngɛn i Nyanmiɛn Ndɛ nga be klɛli'n nun kɛ sa tɛ'n ti mɛnmɛnfuɛ'm be kwlaa be nzuɛn. Ɔ yoli sɔ nan like nga Nyanmiɛn waan ɔ ´yo man sran'n, be nga be fa ndɛ sɔ'n su'n be nyɛn i Jésus-Krist bɔ be lafi i su'n ti.

²³ I nun bɔ blɛ nga sran kwla lafi Krist su'n nian ju-man'n, e ti kɛ bisuafuɛ bɔ be niɛn i su kpa'n sa, mmla'n ti yɛ man e ti sɔ-ɔ. E kali lɛ sɔ lele nan Nyanmiɛn yi i sulafilɛ sɔ'n nglo kle ye.

²⁴ Ɔ man mmla'n ti kɛ sran kun b'ɔ kleli ye atin nga e fa su'n, lele Krist bali nan Nyanmiɛn a bu ye sran kpa i su bɔ e lafi'n ti.

²⁵ Kɛ blɛ nga e kwla lafi Krist su'n juli'n, ɔ man e nun-man sran b'ɔ kle ye atin'n i sa nun kun.

²⁶ Afin Krist-Jésus bɔ an lafi i su'n ti, amun kwlaa an ti Nyanmiɛn wa.

²⁷ Amun kwlaa bɔ kɛ an yoli batɛm'n amun nin Krist amu'an kaci sran wunmuan'n, amun nzuɛn liɛ'n ɔ'a fɛ i liɛ'n.

²⁸ Ɔ man ɔ lɛ-man Zuif nin Grɛk, ɔ lɛ-man kanga nin diewa, ɔ lɛ-man yasua nin bla, afin amun kwlaa an ti kun sran wunmuan bɔ amun nin Krist-Jésus amu'an kaci'n ti.

²⁹ Sɛ an ti Krist liɛ'n, wuun an ti Abraam anunman, ɔ man like nga Nyanmiɛn waan ɔ ´fa mɛn i sran mun'n, amun ´nyan wie.