Galasifuɛ Mun 1 - NYANMIƐN NDƐ'N 1998

Pɔl Klɛ fluwa nga ko mannin Galasi lɔ Kristfuɛ mun

¹ M Pɔl, Jésus-Krist nin e Si Nyanmiɛn b'ɔ cɛnnin i'n be sunmannin min. N sunmanlɛ sɔ'n fin-man sran, yɛ nán sran fi yɛ ɔ sieli n sɔ-ɔ.

² Min nin e niaan nga e o wa'n e kwlaa, e yɛ e klɛ fluwa nga blɛ Galasi lɔ asɔnun mun-ɔn.

³ Man e Si Nyanmiɛn nin e Min Jésus-Krist be man an nyan ye, yɛ man amun wun jɔ amun fɔuun!

⁴ Kɛ ɔ ko yo nan Krist ɔ'a de é mɛn tɛ kain nga nun'n ti, ɔ fɛ i bɔbɔ wun mannin é sa tɛ'n ti. I sɔ'n ti e Si Nyanmiɛn klun su.

⁵ Man e yi i ayɛ tititi! Man ɔ yo sɔ!

Jasin fɛ'n ti kunngba cɛ

⁶ Kɛ e ´se yɛ'n, amu'an kaci amún sin a si Nyanmiɛn b'ɔ flɛli amun'n ye bɔ Krist yoli amun'n ti'n yɛ amu'an fa jasin uflɛ su-ɔ. I sɔ'n ɔ bo min nuan kpa.

⁷ Nanwlɛ, jasin fɛ uflɛ fi nun-man lɛ, sanngɛ sran wie'm be o lɛ be sanngan amun akunndan, yɛ be klo kɛ be ´kaci Krist i jasin fɛ'n.

⁸ Ɔ man sɛ e bɔbɔ o, sɛ nyanmiɛn su lɔ anz wie o, ɔ wa kan jasin fɛ uflɛ kle amun b'ɔ nin nga e dun mmua kan kleli amun'n ti-man kun'n, man Nyanmiɛn bo i sannzan!

⁹ Ndɛ nga e kan kleli amun laa'n, i kunngba'n yɛ n ´kɛn i ekun yɛ: Sɛ sran wie kan jasin fɛ uflɛ kle amun b'ɔ nin nga an fali su'n ti-man kun'n, man Nyanmiɛn bo i sannzan!

¹⁰ ?Ndɛ nga n ´kɛn i yɛ'n, sran'm be nyrun annzɛ Nyanmiɛn nyrun dunman yɛ n kunndɛ-ɔ? ?N waan n ´yo sɔ nan sran'm be klo min sa? Sɛ n waan n ´yo sɔ nan sran'm be klo min sa'n, wuun n su yo-man Krist i sran.

Jésus-Krist yɛ ɔ sunmannin Pɔl-ɔ

¹¹ Aniaan mun, man n kan ndɛ kun kle amun: jasin fɛ nga n kan kleli amun'n, nán sran mun yɛ be kpɛ wlali min nuan-an.

¹² Nán sran yɛ ɔ kan kleli min-ɔn, yɛ man suɛn-mɛn i sran fi sa nun, sanngɛ Jésus-Krist yɛ ɔ yili i nglo kleli min-ɔn.

¹³ Laa bɔ n tɛ o Zuif'm be Nyanmiɛn sulɛ nun'n, an tili sa nga n yoli'n, n kleli Nyanmiɛn i Asɔnun'n yalɛ lele trali yalɛ klelɛ su, min waan n ´nunnun i.

¹⁴ N wiengu Zuif'm be nun'n n ti Nyanmiɛn sufuɛ dan kpa tra be nun kpanngban kpa, yɛ e nannan'm be nzuɛn'n lo min kpa.

¹⁵ Sanngɛ Nyanmiɛn dun mmua fali min nan min nin a gua min ase, yɛ i klun-ufue'n ti ɔ flɛli min .

¹⁶ Kɛ ɔ klo kɛ ɔ ´yi i Wa'n nglo kle min nan n kɛn i ndɛ'n kle be nga be ti-man Zuif'n, m'an ko kunndɛ-mɛn i wun ngwlɛlɛ sran wie sa nun.

¹⁷ Be nga be o Zerizalɛm lɔ bɔ Nyanmiɛn dun mmua sunmannin be nan ɔ'a sunman min'n, m'an ɔ-man bé sin, sanngɛ n wɔli Arabi. I sin n wɔli Damas ekun.

¹⁸ Kɛ ɔ dili afuɛ nsan'n, n wɔli Zerizalɛm. Sefas i silɛ ti yɛ n wɔli-ɔ. N dili le blu le nnun i wun lɛ.

¹⁹ M'an wun-man be nga Nyanmiɛn sunmannin be'n be wie fi san e Min'n i niaan bian Zak cɛ yɛ n wunnin i ekun-ɔn.

²⁰ Nanwlɛ, ndɛ nga n klɛli i yɛ'n, m bua-man ato, Nyanmiɛn ti n lalofuɛ.

²¹ Kɛ ɔ yoli sɔ'n yɛ n wɔli Siri akpasua'n nin Silisi akpasua'n su-ɔ.

²² I nun sɔ'n nun'n, Krist i asɔnunfuɛ nga be o Zide lɔ'n, be si-man min,

²³ san ngan yɛ be ti i kɛ: «Bian'n bɔ laa ɔ kle e yalɛ'n, siɛn'n ɔ su kan Krist i sulafilɛ ndɛ'n bɔ laa i waan ɔ ´nunnun su'n.»

²⁴ Sa nga Nyanmiɛn yo mannin min'n ti'n, be mɛnmɛn i.