Ɛsdras 9 - NYANMIƐN NDƐ'N 1998

Nvle nun bla jafuɛ'm be ndɛ

¹ I sin Izraɛl famiɛn i awlo lɔ sran dandan'm be wa seli min kɛ: «Nyanmiɛn nyrun jranfuɛ mun, nin Levifuɛ mun, nin Izraɛlfuɛ'm be nin nvle nga be tran mɛn nga nun wa'n, ngbaciɛ ɔ'a tran-man be afiɛn, afin tete like nga Kanaanfuɛ nin Ɛtfuɛ, nin Ferezfuɛ, nin Zɛbisfuɛ, nin Amɔnfuɛ, nin Moabfuɛ, nin Eziptfuɛ, nin Amɔrfuɛ'm be yo'n i wie yɛ be yo-ɔ,

² afin b'a ja nvle sɔ'm be nun mmla mun. B'a ja wie b'a man be mma mun. Ɔ man b'a fa Nyanmiɛn i nvle b'a sanngan nvle sɔ'm be nun. Famiɛn i awlo lɔ sran dandan nin jɔlɛ difuɛ'm be yɛ be kleli be atin tɛ sɔ nin-ɔn .»

³ Kɛ n tili ndɛ nga'n, n titili tralɛ nga be wla mín wun'n be nun. N tutuli mín ti ndrɛ'n ɔ nin min akanza'n, yɛ n trannin ase awlaboɛ b'ɔ kunnin min kpo'n ti .

⁴ Be kwlaa nga Anannganman i ndɛ'n i wun srɛ o be klun'n, sa tɛ nga Izraɛlfuɛ nga be fin kanga'n nun bali'n be yoli'n ti, be wa yiali min wun lɛ. N trannin sɔ lele nnɔsua tɛ yilɛ dɔ'n juli.

Ɛsdras srɛ Nyanmiɛn mannin be nga be fɔnnin'n

⁵ Nnɔsua tɛ yilɛ dɔ'n su'n, n fali min wun tralɛ titiwa mun, n fin min awlaboɛ'n nun n jasoli, nan m'an koto m'an man mín sa'n su nglo Anannganman min Nyanmiɛn'n i nyrun.

⁶ Yɛ n srɛli i n seli kɛ: «Min Nyanmiɛn, nyannzuɛn'n ti dan, m man mín ti'n su n nian ɔ nyrun-ɔn, ɔ yo-man ye. E sa tɛ'm b'a sɔn dan, b'a tra e su fuun! E fɔnlɛ'n ɔ'a tra fɔnlɛ su ɔ'a fu lele ɔ'a ju nyanmiɛn su lɔ.

⁷ Kɛ ɔ fɛ e nannan'm be blɛ su lele b'ɔ ´fa ju ndɛ'n, sa tɛ nga y'a yo i ɔ́ wun'n ti dan. I ti yɛ man mɛn'n nun famiɛn'm be trali ye, nin e famiɛn, nin e Nyanmiɛn nyrun jranfuɛ mun e lomuɛn nin-ɔn. Yɛ i ti man alɛ ɔ'a di ye, y'a kaci kanga, e o be nga be fɛn sran'm be bo ninnge'm bé sa nun, nyannzuɛn'n ɔ'a kun ye kpo. I wie yɛ e tɛ o nun ndɛ yɛ.

⁸ Yɛ ndɛ Anannganman e Nyanmiɛn, w'a si ye aunnvuɛ man e nvle nunfuɛ wie'm b'a nyan atin b'a sa be sin. W'a man e kpata kan kplanwlɛ wɔ lika kpa'n nun, w'a kpaja e nyrun man y'a wun atin'n, w'a man e nguan kan e kanga yolɛ'n nun,

⁹ afin e ti kanga, sanngɛ e Nyanmiɛn, w'a yi-man ye ase e kanga yolɛ'n nun. A fali wɔ aunnvuɛ silɛ'n wlali Pɛrs famiɛn'm be nun kɛ ɔ ´yo nan y'a wu-man, nan y'a kwla kplan wɔ bɔ a ti e Nyanmiɛn'n ɔ sua b'ɔ buli'n, nan y'a nyan fiawlɛ Zerizalɛm klɔ'n, ɔ nin Zida nvle nun'n ti.»

¹⁰ «?E Nyanmiɛn, e ´kɛn sɛ yɛ e ´kle wɔ-ɔ? E yili ɔ mmla'm be blo.

¹¹ Ɔ mmla sɔ'n, a fa wlali ɔ́ nuan ijɔfuɛ'm bɔ be ti ɔ sufuɛ'n be nuan kɛ be kan kle ye. A kannin kɛ: ‹Mɛn nga amun ´wlu nun bɔ amun wa tran nun yɛ'n, ɔ ti fiɛn. Sran nga be tran nun'n be ninnge nga be yo'n be ti fiɛn, be yo tete like mun be fa wlu i kɔtɔkakɔtɔka'n kwlaa nun.

¹² I ti nán amun fa amun mma bla'm be man be mma yasua mun, yɛ nán amun ja be mma bla mun man amun mma yasua mun. Nán amun bu be anyanbeun nin be alaje bɔ be di'n i like. I liɛ'n, amun ´nyan fanngan, amun ´di mɛn nga nun ninnge kpakpa mun. Yɛ mɛn sɔ'n ´yo amun osu nunfuɛ'm be liɛ tititi.›

¹³ E Nyanmiɛn, e nyoliɛ tɛtɛ mun nin e fɔnlɛ ngbli-ngbli'm be ti yɛ sa'm be juli ye su-ɔ, sanngɛ w'a nian-man e sa tɛ sɔ'm be su w'a tu-man e fɔ. ?Yɛ ndɛkɛn bɔ w'a yo man e nun sran wie'm b'a nyan atin b'a sa be sin'n

¹⁴ yɛ e wa saci ɔ mmla mun ekun-ɔn? ?E ´fa e wun mantan nvle nga be ti tete bofuɛ mun ekun? ?Sɛ a fa ya'n, a ko nunnun-man ye mlɔnmlɔn siɛn ?

¹⁵ Anannganman, Izraɛl Nyanmiɛn, ɔ klun ti ufue ti yɛ e nun wie e nyin tɛ osu-ɔ. E ti sa tɛ yofuɛ yɛ e o ɔ nyrun wa yɛ. E nin ɔ nyrun jranlɛ fata-man.»