Ɛsdras 8 - NYANMIƐN NDƐ'N 1998

Be nga be nin Ɛsdras ɔli'n

¹ Awlobo kpɛnngbɛn nga be nin min fin Babilɔni bali Zerizalɛm Artaksɛrksɛs blɛ su'n, be nin be osu mun yɛ:

² Gɛrsɔm, ɔ fin Fine osu'n nun. Daniɛl, ɔ fin Itamar osu'n nun. Atis, ɔ fin David osu'n nun yɛ Sɛkania i osu'n nunfuɛ kun.

³ Zakari, ɔ fin Parɛɔs osu'n nun. Sran yasua ya kun sran ablenun be o i sin.

⁴ Ɛlzɔenai, ɔ fin Pasat-Moab osu'n nun. Sran yasua ya nnyɔn be o i sin.

⁵ Zasaziɛl i wa Sɛkania, ɔ fin Zati osu'n nun. Sran yasua ya nsan be o i sin.

⁶ Zonatan i wa Ebɛd, ɔ fin Adɛn osu'n nun. Sran yasua ablenun be o i sin.

⁷ Atalia i wa Ezai, ɔ fin Elam osu'n nun. Sran yasua ableso be o i sin.

⁸ Mikaɛl i wa Zɛbadia, ɔ fin Sɛfatia osu'n nun. Sran yasua ablaɔcuɛ be o i sin.

⁹ Zɛiɛl i wa Abdias, ɔ fin Zoab osu'n nun. Sran yasua ya nnyɔn sran blu-nin-mɔcuɛ be o i sin.

¹⁰ Zozifia i wa Sɛlɔmit, ɔ fin Bani osu'n nun. Sran yasua ya kun sran ablesiɛn be o i sin.

¹¹ Bebai i wa Zakari, ɔ fin Bebai osu'n nun. Sran yasua ablaɔn-nin-mɔcuɛ be o i sin.

¹² Akatan i wa Zosanan, ɔ fin Azgad osu'n nun. Sran yasua ya sran blu be o i sin.

¹³ Elifelɛt nin Zɛiɛl, nin Sɛmaɛza, be nsan'n be ti Adɔnikam i osu'n nunfuɛ kasiɛn mun. Sran yasua ablesiɛn be o be sin.

¹⁴ Itai nin Zabid, be fin Bigvai osu'n nun. Sran yasua ableso be o be sin.

Zerizalɛm kɔlɛ'n i wun akunndan bulɛ

¹⁵ N yiali bé nzue ba ng'ɔ sonji kɔ Aava'n i wun lɔ. E lali lɛ le nsan. N nian-niannin Nyanmiɛn nyrun jranfuɛ nin Izraɛlfuɛ kun nga'm be nun, m'an wun-man Levifuɛ ba kun.

¹⁶ Yɛ n flɛli kpɛnngbɛn bɔ be o yɛ mun: Eliezɛr, Ariɛl, Sɛmaɛza, Ɛlnatan, Zarib, Ɛlnatan, Natan, Zakari nin Mɛsilam. N flɛli Zozarib nin Ɛlnatan be wie. Be ti mmla nun yiyifuɛ.

¹⁷ N sunmannin be Kazifia lɔ Izraɛl kpɛnngbɛn bɔ be flɛ i Ido'n i sin. Ndɛ nga be ko kan ko kle Ido nin i niaan nga be nin i di junman'n, n fa wlali bé nuan. N waan be blɛ e sran nga be ko di e Nyanmiɛn sua'n nun junman'n.

¹⁸ Kɛ Nyanmiɛn'n jin e sin'n ti'n, be ´ba-a, be nin Serebia nin i mma nin i niaan mun yɛ be bali-ɔ. Be kwlaa be ti sran yasua blu-nin-mɔcuɛ. Serebia ti sran ngwlɛlɛfuɛ, ɔ ti Makli osu'n nunfuɛ. Makli i nannan yɛlɛ Levi, yɛ Levi kusu i si yɛlɛ Zakɔb .

¹⁹ Be nin Asabia b'ɔ ti Mɛrari osu'n nunfuɛ'n, nin i niaan nin be mma mun, nin Ezai be bali. Be ti sran ablaɔn.

²⁰ Be nin Nyanmiɛn sua'n nun junman difuɛ nga David nin Izraɛl famiɛn i awlo lɔ sran dandan'm be sieli be kɛ be uka Levifuɛ mun'n be bali wie. Be ti sran ya nnyɔn sran ablaɔn. Be kwlakwla be dunman'n klɛ fluwa kun nun.

²¹ Aava nzue ba nuan lɛ'n, n yoli man e kpɛli srɛ nun. E kannin é wun ase e Nyanmiɛn'n i nyrun. Yɛ e srɛli i kɛ ɔ yo nan ye ajalɛ tulɛ nun'n, nán sa fi ju e nin e mma nin e ninnge'm be su.

²² Kɛ n se famiɛn'n kɛ ɔ man ye sonja nga be nanti bé ja'n, ɔ nin nga be fu nnɛn kpanngɔ'n nan be `sasa ye e kpɔfuɛ'm be lika'n, ɔ yo min nyannzuɛn, afin e dun mmua seli famiɛn'n kɛ e Nyanmiɛn'n ti be nga be fa bé wun mantan i'n be sasafuɛ, sanngɛ ya ng'ɔ fɛ i be nga be kaci be sin si i bé wun'n ɔ yo sro.

²³ Ɔ man e kpɛli srɛ nun e srɛli e Nyanmiɛn'n kɛ ɔ `sasa ye, kpɛkuun ɔ tili e srɛwa'n.

²⁴ Yɛ n flɛli Nyanmiɛn nyrun jranfuɛ kpɛnngbɛn blu-nin-nnyɔn, ɔ nin Serebia nin Asabia , ɔ nin be niaan blu.

²⁵ Be nyrun lɛ n sunnzunnin Nyanmiɛn i sua'n i su cɛlɛ'n nga be mannin toe su. N sunnzunnin jɛtɛ ufue nin sika ɔkwlɛ, ɔ nin kpongbo nga famiɛn'n nin i afɔtuɛ manfuɛ nin i mma'm be mannin'n. N sunnzunnin nga Izraɛlfuɛ bɔ be o lɛ'n be mannin'n wie.

²⁶ N fali ninnge nga be o yɛ mun n fa wlali bé sa nun: jɛtɛ ufue tɔnun ablaɔn, ninnge nga be fa jɛtɛ ufue kpakpa yɛ be yoli'n tɔnun nsan, sika ɔkwlɛ tɔnun nsan,

²⁷ sika ɔkwlɛ klowa ablaɔn b'ɔ nin sika ɔkwlɛ kpɔlɛ akpi sɛ, nin aaba sɛ nglannglan nnyɔn, be ti klanman kpa kɛ sika ɔkwlɛ sɛ sa.

²⁸ Yɛ n seli be kɛ: «Amun ti Anannganman liɛ mlɔnmlɔn. Ninnge nga'm be ti Nyanmiɛn liɛ klonglo. Jɛtɛ ufue nin sika ɔkwlɛ'n ti be klun klo cɛlɛ yɛ be fa mannin Anannganman b'ɔ ti amun nannan'm be Nyanmiɛn nin-ɔn.

²⁹ Amun `fa sie kpa, sɛ amun ju Zerizalɛm, amun `sunnzun i Nyanmiɛn nyrun jranfuɛ kpɛnngbɛn mun, nin Levifuɛ mun, nin Izraɛl awlobo kpɛnngbɛn'm be nyrun. Amun `sunnzun i Anannganman i sua'n nun lɔ sua ba'm be nun.»

³⁰ Yɛ Nyanmiɛn nyrun jranfuɛ nin Levifuɛ'm be fali ninnge sɔ'm bɔ be sunnzunnin'n, i jɛtɛ ufue o, i sika ɔkwlɛ o, i kpongbo mun o, be fali be kɛ be ´fa kɔ Zerizalɛm, Nyanmiɛn i sua'n nun.

Ajalɛ tulɛ nin Zerizalɛm lɔ julɛ

³¹ E jasoli Aava nzue ba nuan lɛ anglo klikli'n i le blu le nnyɔn'n su, e fali Zerizalɛm atin'n. E Nyanmiɛn'n jin é sin ɔ man e kpɔfuɛ mun ɔ nin sran'm bé bo ninnge fɛnfuɛ bɔ be fiafia atin nun'n, b'a nyan-man ye.

³² Kɛ e juli Zerizalɛm'n, e deli wunmiɛn le nsan.

³³ I le nnan'n su'n, e sunnzunnin jɛtɛ ufue'n nin sika ɔkwlɛ'n, nin kpongbo mun e Nyanmiɛn'n i sua'n nun nan y'a fa be y'a wlɛ i Mɛremɔt b'ɔ ti Nyanmiɛn nyrun jranfuɛ b'ɔ ti Iri i wa'n i sa nun. Ɔ yoli Fine i wa Eleazar, ɔ nin Zozie b'ɔ ti Levifuɛ'n i wa Zozabad, nin Binii i wa Nɔadia be nyrun.

³⁴ Be kali ninnge'n kwlaa, be sunnzunnin be nan b'a klɛ be kilo'n fluwa kun nun.

³⁵ Izraɛlfuɛ nga be trali be lomuɛn bɔ be sali be sin'n, be yili tɛ mun be mannin Izraɛl Nyanmiɛn'n. Izraɛl wunmuan'n i dunman nun, be mannin nannin tola blu-nin-nnyɔn, nin bua nene ablangwlan-nin-nsiɛn, nin bua nga b'a kpɛ cro'n ableso-nin-nso, be fa yili tɛ nga be yrɛ i nnɛn kɔlikɔli'n. Be mannin boli kpakpuɛ blu-nin-nnyɔn, be fa yili Nyanmiɛn i kpatalɛ tɛ. Nnɛn sɔ'n kwlakwla be yrali be nnɛn kɔlikɔli be mannin Anannganman.

³⁶ I sin be kannin famiɛn'n i ngaliɛ'n kleli be nga be jran famiɛn'n ja nun Efrat'n sin lɔ'n, ɔ nin lɔ nvle siefuɛ'm be kwlaa. Be kusu be yoli i ng'ɔ fata'n be ukali Izraɛl Nyanmiɛn'n i sua'n i kplanlɛ'n.