Ɛsdras 7 - NYANMIƐN NDƐ'N 1998

Nyanmiɛn nyrun jranfuɛ Ɛsdras i wun ndɛ

¹ I sin, Ɛsdras ɔ wa bali Artaksɛrksɛs b'ɔ ti Pɛrs famiɛn'n i blɛ su. Ɛsdras i si'n yɛlɛ Sɛraza, Sɛraza liɛ'n yɛlɛ Azaria, Azaria liɛ'n yɛlɛ Ilkiza,

² Ilkiza liɛ'n yɛlɛ Salɔm, Salɔm liɛ'n yɛlɛ Zadɔk, Zadɔk liɛ'n yɛlɛ Asitib.

³ Asitib liɛ'n yɛlɛ Amaria, Amaria liɛ'n yɛlɛ Azaria, Azaria liɛ'n yɛlɛ Mɛrazɔt, Mɛrazɔt liɛ'n yɛlɛ Zɛrakza,

⁴ Zɛrakza liɛ'n yɛlɛ Izi, Izi liɛ'n yɛlɛ Biki, Biki liɛ'n yɛlɛ Abisia,

⁵ Abisia liɛ'n yɛlɛ Fine, Fine liɛ'n yɛlɛ Eleazar, yɛ Eleazar liɛ'n yɛlɛ Aarɔn b'ɔ ti Nyanmiɛn nyrun jranfuɛ'm be su kpɛn'n.

⁶ Ɛsdras sɔ'n fin Babilɔni lɔ yɛ ɔ bali-ɔ. Ɔ ti Anannganman b'ɔ ti Izraɛl Nyanmiɛn'n i mmla nga Moiz mannin'n i klefuɛ. Ɔ si mmla sɔ'n kpa sakpa. Anannganman b'ɔ ti i Nyanmiɛn'n jin i sin. Ɔ man like kwlaa ng'ɔ usali famiɛn'n, ɔ fa mɛnnin i.

⁷ Kɛ famiɛn Artaksɛrksɛs trannin bia'n su'n i afuɛ nso su kɛ Izraɛlfuɛ mun nin Nyanmiɛn nyrun jranfuɛ'n, nin Levifuɛ mun, nin jue tofuɛ mun, nin anuan su nianfuɛ mun, ɔ nin Nyanmiɛn sua nun junman difuɛ mun be sa be sin Zerizalɛm,

⁸ Ɛsdras nin be-ɔ. Be juli Zerizalɛm kɛ famiɛn'n trannin bia'n su'n i afuɛ nso'n i anglo i nnun'n su.

⁹ Anglo klikli'n i cɛn klikli'n su yɛ ɔ tuli i bo Babilɔni lɔ-ɔ, kpɛkuun ɔ juli Zerizalɛm anglo nnun'n i cɛn klikli'n su, afin i Nyanmiɛn'n i sa kpa'n wo i su.

¹⁰ Ɛsdras sin bɔ Nyanmiɛn'n ´jran'n yɛlɛ kɛ ɔ nian nun suan Anannganman i mmla'n, yɛ ɔ fa su, yɛ ɔ kle Izraɛlfuɛ mun.

Junman nga famiɛn Artaksɛrksɛs fa mannin Ɛsdras'n

¹¹ Ɛsdras ti Nyanmiɛn nyrun jranfuɛ, i kunngba'n ti mmla klefuɛ, ɔ si mmla nga Anannganman fa mannin Izraɛlfuɛ mun'n. Fluwa nga famiɛn Artaksɛrksɛs fa mɛnnin i'n yɛ:

¹² «Min Artaksɛrksɛs bɔ n ti famiɛn'm be famiɛn'n, min yɛ n klɛ fluwa nga n blɛ wɔ Ɛsdras bɔ a ti Nyanmiɛn nyrun jranfuɛ bɔ a si nglo lɔ Nyanmiɛn'n i mmla'n kpa sakpa nin-ɔn.

¹³ Izraɛlfuɛ mun, nin Nyanmiɛn nyrun jranfuɛ mun, nin Levifuɛ nga be o min mɛn'n nun'n, bɔ be klo kɛ be ´kɔ Zerizalɛm, m mannin be atin kɛ be nin wɔ be wɔ,

¹⁴ afin min bɔbɔ min famiɛn'n, e nin min afɔtuɛ manfuɛ nso'n, y'a man wɔ atin kɛ a ko nian Zerizalɛm nin Zida lɔ nian sɛ be fa ɔ Nyanmiɛn'n i mmla ng'ɔ o ɔ́ sa nun'n su o.

¹⁵ Jɛtɛ ufue nin sika ɔkwlɛ nga e nin min afɔtuɛ manfuɛ mun e klun klo e mannin Izraɛl Nyanmiɛn bɔ i sua'n wo Zerizalɛm'n, kɛ a ´kɔ'n, fa kɔ!

¹⁶ Yɛ fa jɛtɛ ufue nin sika ɔkwlɛ nga a nyɛn i Babilɔni nvle nun'n i kwlaa, ɔ nin be klun klo like nga Izraɛlfuɛ nga be ti Nyanmiɛn nyrun jranfuɛ annzɛ be ti-man Nyanmiɛn nyrun jranfuɛ'm be mannin kɛ be `fa kplan Zerizalɛm lɔ Nyanmiɛn i sua'n.

¹⁷ Fɛ i sɔ sika liɛ'n to nannin tola mun, nin bua nene mun, nin bua nga b'a kpɛ cro'n, nin be su cɛlɛ, ɔ nin be su nzan nga be guɛ i ase'n! Fɛ i kwlakwla sɔ'n yi tɛ amun Nyanmiɛn'n i sɔwlɛ ng'ɔ o Zerizalɛm lɛ'n su.

¹⁸ A nin ɔ niaan mun, amun `fa sika ng'ɔ ka'n be `yo nga amun nian siin ɔ fata kɛ amun yo'n. Amun `fa yo like ng'ɔ ti amun Nyanmiɛn'n i klun su'n.

¹⁹ Nyanmiɛn sua nun kpongbo nga be fa mannin wɔ'n, fa be sie i Zerizalɛm Nyanmiɛn'n i nyrun, man be fa di i sua'n nun junman'n.

²⁰ Like uflɛ kwlaa ng'ɔ fata kɛ a yo i Nyanmiɛn i sua'n wun'n, fɛ i ti sika famiɛn'n i bɔlɛ'n nun.

²¹ M bɔbɔ min famiɛn Artaksɛrksɛs min waan sika siefuɛ nga be o Efrat sin lɔ'n be `fa like kwlaa nga Ɛsdras b'ɔ ti Nyanmiɛn nyrun jranfuɛ'n ɔ nin i mmla'n i klefuɛ'n ɔ usa'n, be `mɛn i.

²² Sɛ bɔ ɔ usa jɛtɛ ufue kilo akpi nsan'n (3.000), annzɛ ble kilo akpi-akpi ablasan'n (30.000), ɔ nin nzan litri akpi nnan'n (4.000), ɔ nin ngo litri akpi nnan'n (4.000), amun `fa mɛn i, sanngɛ njin'n liɛ'n nán amun bo yɛ be sunnzun.

²³ Like kwlaa nga nglo lɔ Nyanmiɛn'n waan be yo'n, amun `nian su yo i tɛɛn. Ɔ'a yo-man sɔ-ɔ, i ya'n ´tɔ min mɛn'n, ɔ nin min bɔbɔ, nin min mma mun ye su.

²⁴ I kun ekun b'ɔ nannan su'n, yɛlɛ Nyanmiɛn nyrun jranfuɛ mun, ɔ nin Levifuɛ mun, ɔ nin jue tofuɛ mun, ɔ nin anuan su nianfuɛ mun, ɔ nin Nyanmiɛn i sua nun junman difuɛ kun nga be lɛ su kpɛn mun, ɔ nin Nyanmiɛn i sua nun junman difuɛ nga'm be kwlaa be liɛ'n, nán be de be lapo fanunfanun'n wie fi.

²⁵ Ɛsdras, wɔ kusu Nyanmiɛn i ngwlɛlɛ'n wo ɔ́ nun. Nian su sie jɔlɛ difuɛ mun, ɔ nin mmla su nianfuɛ mun. Be kwlaa nga be o Efrat'n sin lɔ'n, bɔ be si Nyanmiɛn mmla'n, man be jran su di be jɔlɛ. Be nga be si-mɛn'n be kusu, kle be.

²⁶ Sran kwlaa nga ɔ'a fa-man ɔ Nyanmiɛn i mmla'n su sɛsɛ annzɛ min mmla'n su sɛsɛ'n, man be tu i fɔ. Sɛ ɔ ti kunlɛ-ɔ, man be kun i. Sɛ ɔ ti i mɛn'n nun fuanlɛ-ɔ, man be fuɛn i! Sɛ sika yɛ be ´de i-ɔ, man be de i. Sɛ ɔ ti bisua-a, man be wlɛ i.»

Ɛsdras lali Nyanmiɛn ase

²⁷ «N ´la Anannganman, min nannan'm be Nyanmiɛn'n i ase, afin ɔ'a su famiɛn'n bo kɛ ɔ bu i bɔbɔ i Nyanmiɛn'n i sua ng'ɔ o Zerizalɛm lɔ'n i wun akunndan kpa.

²⁸ Anannganman yoli min ye famiɛn nin i afɔtuɛ manfuɛ mun nin i awlo lɔ sran dandan mun be nyrun. Kɛ n nian bɔ Anannganman min Nyanmiɛn'n jin mín sin'n ti, n fali fanngan nan m'an yiayia Izraɛl kpɛnngbɛn mun, nan e nin be y'a ba.»