Ɛsdras 6 - NYANMIƐN NDƐ'N 1998

Famiɛn Dariis i su tɛlɛ

^1-2 Famiɛn Dariis man be nian-niannin fluwa siewlɛ sua bɔ be fa ninnge kpakpa mun gua nun'n b'ɔ o Babilɔni lɔ'n nun. Be wunnin fluwa kun Medi bue liɛ'n su lɔ klɔ nga talɛ si i wun bɔ be flɛ i Akmɛta'n su lɔ. Fluwa sɔ nun'n, be klɛli i kɛ: «Wla kpɛnlɛ like.

³ Afuɛ klikli nga famiɛn Siris sieli Pɛrs'n, ɔ kannin Nyanmiɛn sua'n b'ɔ o Zerizalɛm lɔ'n i wun ndɛ ng'ɔ o yɛ'n, i wan yoo: Man be kplan sua'n nan be `yi tɛ nun. Man be kplɛn i kplanwlɛ laa'n nun. Man i bo ase wlalɛ'n ɔ yo kekle kpa. Man i nglo-nglo'n yo mɛtri ablasan, yɛ i tɛtrɛ nun'n yo mɛtri ablasan.

⁴ Man be sɛ yɛbuɛ yɛ be fa kplan-an. Sɛ be sie yɛbuɛ nyanman nsan'n, be `kplan waka nyanman kun sɔ trilili. Famiɛn'n i sika yɛ be fa kplan-an!

⁵ Zerizalɛm Nyanmiɛn i sua'n nun sika ɔkwlɛ nin jɛtɛ ufue ninnge nga Nɛbikadnɛzar fa ɔli Babilɔni'n, man be fɛ i kwlaa'n wɔ i osu Zerizalɛm Nyanmiɛn i sua'n nun lɔ.»

⁶ Ɔ man Dariis klɛ fluwa ko mannin be kɛ: «Tatnai, wɔ bɔ a ti Efrat i sin lɔ nvle'n i siefuɛ'n, a nin Setar-Bɔznai, ɔ nin Afarsakfuɛ nga amun nin be di junman'n bɔ be tran nzue'n sin lɔ'n, ndɛ sɔ'n, nán amun ndɛ su-ɔ.

⁷ Amun `yaci be nun man be kplan Nyanmiɛn sua sɔ'n. Man Zuif'm be nvle'n i siefuɛ mun, ɔ nin be kpɛnngbɛn mun be kplan sua sɔ'n i kplanwlɛ laa'n nun.

⁸ Nga n usa kɛ amun yo be man Zuif'm be kpɛnngbɛn mun nan b'a kwla kplan sua sɔ'n, yɛlɛ kɛ Efrat sin lɔ lapo nga be tua blɛ min'n, i nun yɛ amun `fa ng'ɔ fata'n fa man be-ɔ. Nán junman'n jran.

⁹ Yɛ like ng'ɔ fata kɛ be fa yi tɛ man nglo lɔ Nyanmiɛn'n, man i nyrun jranfuɛ'm be klekle amun. Sɛ nannin nga ɔ'a kpɛ cro o, sɛ bua nene annzɛ bua nga ɔ'a kpɛ cro bɔ be fa yi tɛ nga be yrɛ i nnɛn'n kɔlikɔli'n nin o, sɛ ble o, sɛ njin o, sɛ nzan annzɛ ngo o, amun `fa man Nyanmiɛn nyrun jranfuɛ mun cɛn kwlakwla, nán cɛn kun sa tu nun.

¹⁰ Man be yi tɛ ng'ɔ bɔn fannin'n fa man nglo lɔ Nyanmiɛn'n, nan be srɛ be man famiɛn nin i mma mun.

¹¹ Sran kwlaa ng'ɔ fa-man ndɛ nga su'n, man be yi i sua'n nun waka'n kun be kplan, nan be `fɛ i sran su. I sin man be bubu i awlo'n, nan ɔ kaci ufuɛ.

¹² Famiɛn kwlaa, ɔ nin nvle kwlaa ng'ɔ fa-man ndɛ nga su, b'ɔ jaso kɛ ɔ ´bu Zerizalɛm Nyanmiɛn sua'n, man Nyanmiɛn bɔ Zerizalɛm lɔ yɛ i waan ɔ yi i wun nglo weiin'n, ɔ yi i sɔ famiɛn'n i ase, annzɛ ɔ saci i sɔ nvle liɛ'n. M bɔbɔ min Dariis yɛ m man mmla nga-a. Man be nian su sɛsɛsɛ be yo.»

¹³ Tatnai b'ɔ ti nzue'n sin lɔ nvle'n i siefuɛ'n, nin Setar-Bɔznai, ɔ nin be nga be nin be di junman kunngba'n, be niannin famiɛn Dariis i ndɛ'n su seiin be yoli.

Nyanmiɛn sua'n i nglo yilɛ

¹⁴ Zuif kpɛnngbɛn'm be kplannin sua'n ɔ wieli weiin. Nyanmiɛn nuan ijɔfuɛ Aze, ɔ nin Ido i wa Zakari be ndɛ nga Nyanmiɛn fa wlali be nuan'n, ɔ wlali be fanngan. Be wieli sua'n kplan kɛ Izraɛl Nyanmiɛn'n kannin'n sa. Be fali Siris nin Dariis, nin Artaksɛrksɛs bɔ be ti Pɛrs famiɛn'n bé nuan ndɛ'n su.

¹⁵ Sua'n wieli Adar anglo'n i le nsan'n su. Kɛ famiɛn Dariis trannin bia'n su'n i afuɛ nsiɛn'n su-ɔ.

¹⁶ Izraɛlfuɛ mun nin Nyanmiɛn nyrun jranfuɛ mun, nin Levifuɛ mun, ɔ nin be kwlaa nga be fin kanga'n nun bali'n, be yili Nyanmiɛn sua'n i nglo aklunjuɛ nun.

¹⁷ Sua'n i nglo yilɛ sɔ nun'n, be kunnin nannin tola ya, bua nene ya nnyɔn'n, bua nga b'a kpɛ cro ya nnan. Yɛ kɛ Izraɛlfuɛ'm be akpasua i nuan'n fa ti'n, be niannin su be kunnin boli blu-nin-nnyɔn bé fa yili Izraɛlfuɛ'm be wunmuan be ti tɛ.

¹⁸ Kɛ Nyanmiɛn nyrun jranfuɛ'm bé sa su'n fa ti'n, kɛ Levifuɛ'm be akpasua'n fa ti'n, Izraɛlfuɛ'm be niannin su yɛ be siesieli be junman ng'ɔ fata kɛ be di man Nyanmiɛn Zerizalɛm lɔ nin-ɔn. Be niannin ng'ɔ ti klɛwa Moiz i fluwa'n nun'n su yɛ be yoli-ɔ.

Delɛ-cɛn'n i dilɛ

¹⁹ I afuɛ kun ekun b'ɔ ´ju'n, be kwlaa nga be trali be lomuɛn bɔ be sali be sin, be dili Delɛ-cɛn'n anglo klikli'n i le blu le nnan'n su.

²⁰ Nyanmiɛn nyrun jranfuɛ nin Levifuɛ'm be kwlaa be yoli be wun saun. Sran kun ɔ'a ka-man. Be kunnin Delɛ-cɛn'n i bua bɔ b'a kpɛ cro'm be mannin Izraɛlfuɛ nga be fin lɔ bali'n, ɔ nin be niaan Nyanmiɛn nyrun jranfuɛ mun, ɔ nin be bɔbɔ.

²¹ Izraɛlfuɛ nga be trali be lomuɛn bɔ be sali be sin'n, be dili Delɛ-cɛn'n. Be niaan nga be yili bé wun mɛn nunfuɛ'm be sa tɛtɛ bɔ be yo be i nun'n, be kusu be dili wie, afin be nin be nga mun bé bo yoli kun be suli Anannganman b'ɔ ti Izraɛl Nyanmiɛn'n.

²² Be klun ti jɔwa, be dili kpaun nga kpaun ayre nun-man nun'n i cɛn'n le nso aklunjuɛ nun. Anannganman man be klun jɔli, afin ɔ dili junman Asiri famiɛn'n i anwlɛn'n nun ɔ man ɔ wlali be fanngan blɛ nga be ´kplan Izraɛl Nyanmiɛn'n i sua'n.