Ɛsdras 5 - NYANMIƐN NDƐ'N 1998

¹ Yɛ Nyanmiɛn nuan ijɔfuɛ Aze ɔ nin Ido i wa Zakari be kannin Nyanmiɛn nuan su ndɛ kleli Zuif nga be o Zerizalɛm nin Zida lɔ'n.

² Yɛ Sealtiɛl i wa Zorobabɛl, ɔ nin Zozadak i wa Zozie, bé bo yoli kun nan b'a man Nyanmiɛn i sua'n b'ɔ o Zerizalɛm'n i kplanlɛ'n su ekun. Nyanmiɛn nuan ijɔfuɛ'm be jrannin be sin yɛ be ukali be .

³ Blɛ kunngba sɔ nun'n, Tatnai b'ɔ ti nzue i bue kun lɔ nvle siefuɛ'n, nin Setar-Bɔznai, nin be nga be nin be di junman kunngba'n, be wa toli be, be usali be kɛ: «?Wan yɛ ɔ mannin amun atin kɛ amun kplan sua nga-a?»

⁴ Be seli be ekun kɛ: «Amun `fa sran nga be kplan sua'n be dunman man ye.»

⁵ Zuif kpɛnngbɛn sɔ'm be Nyanmiɛn'n i wla ɔ'a fi-man be. Ɔ man blɛ bɔ be ko bo su kleli Dariis lele nan ɔ'a tɛ be su'n, b'a se-man be kɛ be jran junman'n.

Zuif'm bé bo abla b'ɔ be di kleli famiɛn Dariis'n

⁶ Fluwa nga Tatnai b'ɔ ti nzue'n sin lɔ nvle'n i siefuɛ'n, nin Setar-Bɔznai, ɔ nin be nga be o Afarsak bɔ be nin be di junman kunngba'n, bɔ be tran nzue'n i bue kun lɔ'n be fa ko mannin Dariis'n,

⁷ i nun ndɛ mun yɛ: «Nannan Dariis, e ´yo wɔ like!

⁸ E ɔli Zida nvle'n nun, kan Nyanmiɛn Kpli'n i sua'n wo lɔ'n. Be su kplan. Be sɛ yɛbuɛ yɛ be fa kplan-an. Be fa waka be wlɛwlɛ i talɛ'n nun. Be su nian nun di junman sɔ'n kpa. Ɔ kɔ i nyrun ndɛndɛ.

⁹ E usali be kpɛnngbɛn'm be kɛ: ‹?Wan yɛ ɔ mannin amun atin kɛ amun kplan sua nga-a?›

¹⁰ E usali be dunman. E waan e ´klɛ be blɛ wɔ nan a si be nga be dun be nyrun mmua'n.

¹¹ Be tɛli e su kɛ: ‹E ti Nyanmiɛn b'ɔ yili nglo nin asiɛ'n i sufuɛ. Nyanmiɛn i sua nga e ´kplɛn i yɛ'n, Izraɛl famiɛn dan kun yɛ ɔ dun mmua kplannin-ɔn. Ɔ wieli i kplan ɔ'a cɛ kpa,

¹² kpɛkuun e nannan'm be klɔklɔli nglo lɔ Nyanmiɛn'n, nan ɔ'a yi i sa be su, nan ɔ'a fa be ɔ'a wla Nɛbikadnɛzar b'ɔ ti Babilɔni famiɛn'n i sa nun. Nɛbikadnɛzar ɔ ti Kaldefuɛ. Famiɛn sɔ'n buli sua sɔ'n, ɔ trali sran mun lomuɛn ɔli Babilɔni, ɔ fali be yoli i kanga,

¹³ kpɛkuun afuɛ nga famiɛn Siris boli Babilɔni i sielɛ bo'n, ɔ mannin atin kɛ be kplan Nyanmiɛn sua sɔ'n.

¹⁴ Yɛ Nyanmiɛn i sua b'ɔ o Zerizalɛm lɔ'n i nun sika ɔkwlɛ nin jɛtɛ ufue ninnge nga Nɛbikadnɛzar yili ko sieli Babilɔni amuɛn sua nun'n, Famiɛn Siris yili be Babilɔni amuɛn sua sɔ'n nun lɔ. Ɔ fali be wlali bian wie bɔ be flɛ i Sɛsbazar'n i sa nun. Ɔ sieli bian sɔ'n kpɛnngbɛn.

¹⁵ Ɔ seli i kɛ ɔ fa ninnge sɔ mun ko sie be Nyanmiɛn i sua b'ɔ o Zerizalɛm lɔ'n i nun, yɛ man be kplan Nyanmiɛn sua sɔ'n i kplanwlɛ laa'n nun.

¹⁶ Yɛ Sɛsbazar bali nan ɔ'a bo Zerizalɛm Nyanmiɛn sua'n i kplanlɛ bo. Kɛ ɔ fɛli lɛ'n yɛ e sɔli i kplanlɛ-ɔ, lele ndɛ e nian wie-mɛn i kplan.›

¹⁷ Ɔ man nannan, sɛ a klo'n, man be nian-nian Babilɔni lɔ fluwa nga be o kan famiɛn'n sie i ninnge kpakpa'm be lɔ'n be nun be nian, sɛ sakpa Famiɛn Siris mannin atin kɛ be kplan Zerizalɛm Nyanmiɛn sua nin o, nan kwlaa nga ɔ waan be `yo'n, famiɛn, man é su ti.»