Ɛsdras 4 - NYANMIƐN NDƐ'N 1998

Zuif'm be kpɔfuɛ'm be junman'n i jranlɛ

¹ Zidafuɛ mun nin Bɛnzamɛnfuɛ'm be kpɔfuɛ'm be tili kɛ be nga be trali be lomuɛn bɔ be sali be sin be su kplan Anannganman b'ɔ ti Izraɛl Nyanmiɛn'n i sua'n.

² Be wa toli Zorobabɛl nin Izraɛl awlobo kpɛnngbɛn mun nan b'a se be kɛ: «E klo kɛ e nin amun e ´kplan sua'n, afin Nyanmiɛn kunngba nga amun su i'n yɛ e su i-ɔ. Kɛ ɔ fin cɛn bɔ Ezar-Adɔn b'ɔ ti Asiri famiɛn'n ɔ fali ye bali wa'n, e yi tɛ e man Nyanmiɛn .»

³ Zorobabɛl nin Zozie nin awlobo kpɛnngbɛn kun nga'm be tɛli be su kɛ: «Kɛ e nin amun e `kplan e Nyanmiɛn i sua'n, ɔ ti-mɛn i su. E kunngba yɛ e ´kplan Anannganman b'ɔ ti Izraɛl Nyanmiɛn'n i sua nin-ɔn. Siris, b'ɔ ti Pɛrs famiɛn'n yɛ i waan e `yo i sɔ-ɔ.»

⁴ Kɛ ɔ fin lɛ'n, sran sɔ'm bɔ be tran Izraɛl mɛn'n nun lɛ'n, be yoli nga be ko yo nan b'a bubu Zidafuɛ'm bé sa sin'n. Be wlan-wlannin be.

⁵ Kɛ ɔ fɛ i Siris b'ɔ ti Pɛrs famiɛn'n i blɛ su lele b'ɔ ´fa ju Dariis b'ɔ wa yoli Pɛrs famiɛn'n i blɛ su'n, be mannin famiɛn i afɔtuɛ manfuɛ'm be sika kɛ be yo nan Zidafuɛ'm be like sɔ bɔ be waan be ´yo'n, nán man ɔ yo ye .

Zuif'm bé wun abla bɔ be dili kleli famiɛn Asieris

⁶ Kɛ famiɛn Asieris trannin bia'n su'n, ɔ'a cɛ-man, kpɛkuun Izraɛlfuɛ'm be kpɔfuɛ mun be klɛli fluwa kun ko mɛnnin i. Fluwa sɔ nun'n, be di Zerizalɛmfuɛ mun nin Zidafuɛ'm bé bo abla.

⁷ Yɛ Artaksɛrksɛs b'ɔ ti Pɛrs famiɛn'n i blɛ su'n, Bislam, Mitrɛdat, Tabeɛl, ɔ nin be nga be nin be di junman'n, be klɛli fluwa ko mɛnnin i. Fluwa sɔ'n be fali Aramfuɛ'm be aniɛn'n i fluwa mma nga be fa klɛ'n yɛ be klɛli-ɔ. Be klɛli i Aramfuɛ'm be aniɛn'n nun.

⁸ Rɛɔm b'ɔ ti nvle siefuɛ'n, ɔ nin Simsai b'ɔ ti fluwa klɛfuɛ'n, be klɛli Zerizalɛmfuɛ'm be wun fluwa ng'ɔ o yɛ'n ko mannin famiɛn Artaksɛrksɛs. Be klɛli i kɛ:

⁹ «Min Rɛɔm bɔ n ti nvle siefuɛ'n, min nin Simsai b'ɔ ti min fluwa klɛfuɛ'n, e nin be nga e nin be di junman kunngba'n, bɔ be o Dɛn annzɛ Afarsatak, Tarpɛl, Afaras, Erɛk, Babilɔni, Siz, Dea, ɔ nin Elam, e yɛ e klɛ fluwa nga-a.

¹⁰ Ɔsnapar b'ɔ ti sran dan b'ɔ lɛ nyrun'n, ɔ trali sran wie'm be lomuɛn. Ɔ fali be sieli i Samari klɔ'm be su, annzɛ Efrat nzue ba'n i sin lɔ nvle'm be nun. E nin i yɛ e klɛli fluwa sɔ nin-ɔn.»

¹¹ Fluwa sɔ'n i nun ndɛ'n yɛ: «Nannan Artaksɛrksɛs, e bɔ e ti ɔ sufuɛ bɔ e tran Efrat nzue i wia atɔliɛ wa'n, e yɛ e klɛ fluwa nga-a.

¹² E waan e ´se wɔ kɛ Zuif nga be fin ɔ wun lɔ toli ye wa'n, be su kplan Zerizalɛm b'ɔ ti nyin kekle nin sa tɛ yolɛ klɔ'n. Klɔ'n i bo ase bɔ be wlali b'ɔ sacili'n b'a yo i uflɛ, be su kplɛn i talɛ ng'ɔ si i wun'n.

¹³ Nannan, man e kan kle wɔ, sɛ be kplan klɔ nga uflɛ'n, sɛ be kplɛn i talɛ'n, be ko tua-man lapo fanunfanun nga be tua'n, kpɛkuun ɔ sika'n su ´kpɛ.

¹⁴ E kusu, sɛ e ´di njin-ɔn , ɔ fin wɔ awlo lɔ, ɔ man e kwla tran-man lɛ sa man be yo-man ɔ finfin'n e nyrun, i ti yɛ e klɛ wɔ fluwa nga kɛ e ´kan wa jasin'n ´kle wɔ-ɔ.

¹⁵ Man be nian ɔ́ si'm be bia'n i wun ndɛ fluwa'n nun. Sɛ be nian fluwa sɔ nun'n, be ´wun kɛ klɔ sɔ'n ti nyin kekle klɔ kun b'ɔ kleli famiɛn nin siefuɛ'm be yalɛ kpa. I nunfuɛ'm be boli siefuɛ'm be wun jasolɛ bo-ɔ, nán andɛ sa-a. I sɔ'n ti yɛ klɔ sɔ'n nunnunnin nin-ɔn.

¹⁶ Nan i ti'n, nannan, man e kan kle wɔ, klɔ nga, sɛ be kplɛn i uflɛ'n, sɛ be kplɛn i wun talɛ'n, a su nyan-man lika nzue'n sin wa kun.»

Artaksɛrksɛs i su tɛlɛ'n

¹⁷ Famiɛn'n klɛli fluwa ko mannin Rɛɔm b'ɔ ti nvle siefuɛ'n, ɔ nin Simsai b'ɔ ti i fluwa klɛfuɛ'n ɔ nin be nga be nin be di junman kunngba'n, bɔ be o Samari annzɛ nzue'n i bue kun lɔ'n. Ɔ seli be kɛ: «N ´yo amun like.

¹⁸ Fluwa nga amun fa blɛli min'n, be kacili i e aniɛn nun weiin. Be kanngan kleli min.

¹⁹ N yoli man be nian-niannin fluwa'm be nun. Be wunnin kɛ klɔ sɔ'n, kɛ ɔ fin lalafuɛ nun'n yɛ i sufuɛ'm be boli famiɛn'm be wun jasolɛ bo-ɔ. Nyin kekle nin famiɛn'm bé wun jasolɛ'n ɔ ti be nzuɛn tititi.

²⁰ Famiɛn dandan wie'm be trannin lɔ, be sieli nzue'n i sin lɔ lika wunmuan'n, be deli lapo fanunfanun mun, yɛ be deli be nga be sin be mɛn'n nun lɛ'm be sika.

²¹ Nan i ti'n, amun `yo man be tannin sran sɔ'm be kɛ nán be di junman sɔ'n kun. Sɛ m bɔbɔ n nian man-man atin'n, nán be kplan klɔ sɔ'n uflɛ.

²² Nán amun kpa sa sɔ'n i yolɛ'n su mlɔnmlɔn kɛ ɔ ´yo nan b'a kle-man e famiɛn'm be yalɛ'n ti.»

²³ Kɛ be kannin famiɛn Artaksɛrksɛs i fluwa nun ndɛ mun kleli Rɛɔm nin Simsai b'ɔ ti i fluwa klɛfuɛ'n, ɔ nin be nga be nin be di junman kunngba mun cɛ'n, be ɔli Zerizalɛm ndɛndɛ. Be ko toli Zuif mun, be fa utre wlali be sin, be miannin be fii kpa, nan b'a jran junman'n.

Junman'n i su manlɛ

²⁴ Zerizalɛm lɔ Nyanmiɛn sua'n i kplanlɛ'n jrannin. Ɔ jrannin lele juli Dariis b'ɔ ti Pɛrs famiɛn'n i sielɛ'n i afuɛ nnyɔn'n su.