Ɛsdras 3 - NYANMIƐN NDƐ'N 1998

Nyanmiɛn sɔwlɛ'n i kplanlɛ

¹ Anglo nso su'n, Izraɛlfuɛ mun bɔ be o be klɔ'm be su'n, bé nuan yoli kun yɛ be yiali Zerizalɛm lɔ.

² Zozadak i wa Zozie, ɔ nin i niaan Nyanmiɛn nyrun jranfuɛ mun, be nin Sealtiɛl i wa Zorobabɛl nin i niaan mun be bo yoli kun kɛ be ´kplan Izraɛl Nyanmiɛn sɔwlɛ'n. Be waan be ´kplan nan be ´yi tɛ nga be yrɛ i nnɛn'n kɔlikɔli'n i su kɛ Moiz b'ɔ ti Nyanmiɛn i sran'n i mmla fluwa'n waan be yo'n sa.

³ Srɛ kunnin be, be nga be fali be mɛn'n be trannin nun'n be ti, sanngɛ ɔ nin sɔ ngba'n, be kplannin Nyanmiɛn i sɔwlɛ'n, be kplɛnnin i i takawlɛ laa'n nun. Be yili tɛ nga be yrɛ i nnɛn'n kɔlikɔli'n be mannin Anannganman. Be yoli i sɔ nglɛmun kwlaa nin nnɔsua kwlaa.

⁴ I sin be dili tannin sua'm be cɛn'n kɛ be klɛli i kɛ be di'n sa. Cɛn kwlaa, nnɛn nga be kleli'n, be niɛn i nuan'n su be kun be. Be fa yi tɛ nga be yrɛ i nnɛn'n kɔlikɔli'n.

⁵ Kɛ ɔ fɛ lɛ'n, cɛn kwlaa be yi tɛ nga be yrɛ i nnɛn'n kɔlikɔli'n, ɔ nin anglo le kun tɛ mun, ɔ nin tɛ nga be yi i Anannganman i cɛn dilɛ'n be kwlaa nun'n, ɔ nin be klun klo tɛ nga be yi'n .

⁶ Anglo nso su'n i cɛn klikli'n nun yɛ be boli Anannganman i tɛ nga be yrɛ i nnɛn'n kɔlikɔli'n i yilɛ bo-ɔ. Kɛ ɔ ´yo sɔ'n, wuun be nian bo-man Anannganman i sua'n i bo ase wlalɛ'n i bo.

⁷ Be fali sika mannin yɛbuɛ sɛfuɛ nin sua su bofuɛ mun. Be mannin Sidɔnfuɛ nin Tirfuɛ mun be ninnge diwa, nin nzan, ɔ nin ngo. Be waan be sua sɛdri waka jenvie nyin su Liban lɔ be ko guɛ i Zafo man be. Siris b'ɔ ti Pɛrs famiɛn'n yɛ ɔ mannin be atin kɛ be yo i sɔ-ɔ.

⁸ Kɛ be sali be sin Zerizalɛm bɔ lɛ yɛ Nyanmiɛn i sua'n wo'n, be afuɛ nnyɔn i anglo nnyɔn su'n, Sealtiɛl i wa Zorobabɛl nin Zozadak i wa Zozie, nin be niaan Nyanmiɛn nyrun jranfuɛ mun, ɔ nin Levifuɛ mun, ɔ nin be kwlaa nga be trali be lomuɛn bɔ be sali be sin'n, be boli junman'n bo. Be sieli Levifuɛ nga b'a di afuɛ ablaɔn annzɛ afuɛ ablaɔn ɔ'a tra'n kɛ be nian Anannganman i sua kplanlɛ junman'n su.

⁹ Zozie nin i mma nin i niaan mun, Kadmiɛl nin i mma mun bɔ be ti Zida awlo'n nunfuɛ'm be kwlaa bé bo yoli kun be niannin be nga be di Nyanmiɛn sua'n su junman'n be su. Enadad i mma mun nin i niaan Levifuɛ'm be ukali be.

¹⁰ Kɛ sua kplanfuɛ'm be wlali Anannganman i sua'n i bo ase'n, be flɛli Nyanmiɛn nyrun jranfuɛ mun kɛ be wa trɛn i bo. Be ´ba'n, be tralɛ'n wla be wun, be awɛ'n wo bé sa nun. Levifuɛ nga be ti Azaf awlo'n nunfuɛ'm be kusu be jue tolɛ ninnge ng'ɔ ti kɛ ndɛ sa'n wo bé sa nun. Be wa manmannin Anannganman kɛ Famiɛn David kleli kɛ be `yo'n sa.

¹¹ Nyanmiɛn i ayɛ yilɛ nin i manmanlɛ jue ng'ɔ o yɛ'n, be ´to'n wuun be ´sɔ su. Be se kɛ: «Anannganman ti kpa, afin i klun-ufue'n ng'ɔ yo Izraɛlfuɛ mun'n wo lɛ tititi.» Nzrafuɛ'm be kpannin kekle kpa, afin be klun ti jɔwa, be manmannin Anannganman i sua'n i bo ase bɔ be su wla'n ti.

¹² Nyanmiɛn nyrun jranfuɛ, nin Levifuɛ, nin awlobo kpɛnngbɛn bɔ be ti kaklaakla, bɔ be wunnin Nyanmiɛn sua laa liɛ'n, bé sunman be o lɛ, kɛ be wunnin sua'n i bo ase bɔ be su wla'n, be tikeli bé ti be sunnin kekle kpa. Kɛ ɔ ´yo sɔ'n, wuun sran sunman kpa be ´kpan be klun b'ɔ ti jɔwa'n ti.

¹³ Be aklunjuɛ kpanlɛ nin be sunlɛ'n, be lɛ-man ngbaciɛ, i kwlakwla sanngan nun kunngba. Nganniɛn dan b'ɔ Izraɛlfuɛ'm be yoli'n be ti i mmua lɔ.