Ɛsdras 10 - NYANMIƐN NDƐ'N 1998

Zuif'm be su fuan bé yi nga be ti-man Zuif'n

¹ Kɛ Ɛsdras kotoli Nyanmiɛn i sua'n nyrun lɛ b'ɔ ´srɛ Nyanmiɛn'n, b'ɔ ´kpɛtɛ i, wuun ɔ ´sun. Izraɛlfuɛ kpanngban kpa, yasua nin bla, nin ba kanngan'm be wa yiɛli i wun lɛ. Be kwlaa be sunnin kpa.

² Yɛ Zɛiɛl i wa Sɛkania b'ɔ ti Elam awlo'n nunfuɛ'n, ɔ seli Ɛsdras kɛ: «Nvle nga be nin ye tran wa'n be nun bla nga e jali'n, ɔ ti fɔnlɛ yɛ e fɔnnin Anannganman wun-ɔn, sanngɛ Izraɛlfuɛ'm be ´kwla fin nun fite.

³ Man e ta Nyanmiɛn i nda kɛ e ´fuan nvle nun bla sɔ mun ɔ nin ba nga e nin be e wuli be'n. Min min, afɔtuɛ nga a nin be nga bé wun blibli be'n Nyanmiɛn i mmla i su falɛ nun amun kan'n, e fa su. Man e yo kɛ i mmla'n kle i sa.

⁴ Jaso, wɔ yɛ a nin sa sɔ'n i siesielɛ fata-a. Mian ɔ nyin, yo ng'ɔ fata'n, e jin ɔ́ sin.»

⁵ Ɛsdras jasoli, ɔ yoli man Nyanmiɛn nyrun jranfuɛ kpɛnngbɛn mun, nin Levifuɛ kpɛnngbɛn mun, ɔ nin Izraɛl kpɛnngbɛn'm be kwlaa be tali nda kɛ be ´nian nga be kannin'n su be ´yo.

⁶ Ɛsdras jasoli Nyanmiɛn sua'n nyrun lɛ, ɔ ɔli Eliasib i wa Zosanan i sua lɔ. Kɛ ɔ ɔli'n, ɔ'a di-man like, ɔ'a nɔn-man nzue, afin Izraɛlfuɛ nga be fin kanga nun bali'n be Nyanmiɛn wun fɔnlɛ'n ti i wla'n boli i wun kpa.

⁷ I sin be boli ndolo sinnin Zerizalɛm nin Zida mɛn'n nun kɛ be kwlaa nga be fin kanga'n nun bali'n be `yia Zerizalɛm lɔ.

⁸ Nan sran ng'ɔ ´ju cɛn nsan nan ɔ'a ba-man'n, famiɛn i awlo lɔ sran dandan mun nin siefuɛ'm be waan be `de i bo ninnge mun be `sie. Yɛ be `fuɛn i bɔbɔ'n Izraɛl nvle'n nun.

⁹ Kɛ cɛn nsan'n juli'n, anglo ngwlan'n i le ablaɔn su'n, Zida nin Bɛnzamɛn nun yasua'm be kwlaa be bali Zerizalɛm. Be kwlaa be yiali Nyanmiɛn sua'n i awlo klun lɔ. Be lɛ usulɛ, sa nga ti bɔ be flɛ be'n ti, ɔ nin nzue b'ɔ tɔ'n ti.

¹⁰ Ɛsdras b'ɔ ti Nyanmiɛn nyrun jranfuɛ'n jasoli, nan ɔ'a se be kɛ: «Amu'an fɔn Nyanmiɛn i wun nvle nun bla bɔ amun jali'n ti. Amu'an fa sa tɛ b'a uka Izraɛlfuɛ'm be sa tɛ'n su.

¹¹ Siɛn'n, amun `di amún sa tɛ'm be nanwlɛ kle Anannganman amun nannan'm be Nyanmiɛn'n, nan amun `yo i klun sa. Nán amun nin nvle nga be o wa'm be nunfuɛ'm be nanti kun. Amun `yaci nvle nun bla mun.»

¹² Sran'm be kwlaa be mannin be nɛn'n su yɛ be tɛli su kɛ: «I yɛ a ´kɛn lɛ-ɔ, ɔ fata kɛ e fa nga a kan'n su,

¹³ sanngɛ e sɔnnin, yɛ e o nzue blɛ nun, e tran gua su wa-a, ɔ yo-man ye, kusu nán le kun annzɛ le nnyɔn ndɛ yɛ, afin e nga e yoli sa'n e sɔnnin.

¹⁴ Man e kpɛnngbɛn'm be jran e kwlakwla é nuan. Man be kle klɔ kunngun kwlaa bé cɛn nan be kwlaa nga be jali nvle nun bla'n, kɛ cɛn'n ko ju'n, be nin be kpɛnngbɛn mun nin be jɔlɛ difuɛ'm be bla. E ´siesie ndɛ sɔ'n kwlakwla e ´guɛ i lɔ weiin lele san e Nyanmiɛn i ya dan bɔ ɔ'a fa'n ɔ'a kan ase.»

¹⁵ Azaɛl i wa Zonatan, nin Tikva i wa Zakzia be kunngba yɛ be waan nán be yo i sɔ-ɔ. Mɛsilam ɔ nin Sabtai b'ɔ ti Levifuɛ'n be jin be sin.

¹⁶ Izraɛlfuɛ kun nga'm be kplinnin su. Ɛsdras b'ɔ ti Nyanmiɛn nyrun jranfuɛ'n, ɔ fali akpasua'n kwlaa nun awlobo kpɛnngbɛn wie mun, be boboli bé dunman kunngunngun. Nan be sɔfuɛ'm b'a yia anglo blu'n i cɛn klikli'n su, nan b'a siesie sran'm be ndɛ'n.

¹⁷ Anglo klikli'n i cɛn klikli'n, be wieli be kwlaa nga be jali nvle nun bla'n be ndɛ'n siesie.

Be nga be jali nvle nun bla'n be dunman mun

¹⁸ Nyanmiɛn nyrun jranfuɛ nga be jali nvle nun bla mun yɛ: Maazeza, Eliezɛr, Zarib, ɔ nin Gɛdalia. Be wie ti Zozadak i wa Zozie i mma mun, be wie kusu ti i niaan mun.

¹⁹ Be tali nda kɛ be ´yaci bé yi sɔ mun, nan be ´fa bua nene kun ´yi tɛ be ´kpata Nyanmiɛn.

²⁰ Imɛr i anunman'm be nun'n, Anani nin Zɛbadia, be o nun wie.

²¹ Arɔm i anunman'm be nun'n, Maazeza, Eli, Sɛmaɛza, Zɛiɛl, ɔ nin Ozias, be o nun wie.

²² Pasir i anunman'm be nun'n, Ɛlzɔenai, Maazeza, Ismaɛl, Nɛtaneɛl, Zozabad, ɔ nin Eleaza, be o nun wie.

²³ Levifuɛ nga be o be nun'm be yɛ: Zozabad, Simɛi, ɔ nin Kelaza bɔ be flɛ i ekun kɛ Kɛlita'n, ɔ nin Pɛtakza, nin Zida, ɔ nin Eliezɛr.

²⁴ Jue tofuɛ'm be nun'n, Eliasib o nun wie. Anuan su nianfuɛ'm be nun'n, Salɔm nin Telɛm, ɔ nin Iri, be o nun wie.

²⁵ Izraɛlfuɛ kun nga be o be nun'm be yɛ: Parɛɔs i anunman'm be nun'n, Ramia, Ziziza, Malkiza, Mizamɛn, Eleazar, Malkiza, ɔ nin Bɛnaza, be o nun wie.

²⁶ Elam i anunman'm be nun'n, Matania, Zakari, Zɛiɛl, Abdi, Zɛremɔt, ɔ nin Eli, be o nun wie.

²⁷ Zati i anunman'm be nun'n, Ɛlzɔenai, Eliasib, Matania, Zɛremɔt, Zabad, ɔ nin Aziza, be o nun wie.

²⁸ Bebai i anunman'm be nun'n Zosanan, Anania, Zabai, ɔ nin Atlai, be o nun wie.

²⁹ Bani i anunman'm be nun, Mɛsilam, Malik, Adaza, Zasib, Seal, ɔ nin Ramɔt, be o nun wie.

³⁰ Pasat-Moab i anunman'm be nun'n, Adna, Kɛlal, Bɛnaza, Maazeza, Matania, Bɛzaleɛl, Binii, ɔ nin Manase, be o nun wie.

³¹ Arɔm i anunman'm be nun'n, Eliezɛr, Zisiza, Malkiza, Sɛmaɛza, Simeɔn,

³² Bɛnzamɛn, Malik, ɔ nin Sɛmaria, be o nun wie.

³³ Asɔm i anunman'm be nun'n, Matnai, Matata, Zabad, Elifelɛt, Zɛremai, Manase, ɔ nin Simɛi, be o nun wie.

³⁴ Bani i anunman'm be nun'n, Maadai, Amram, Iɛl,

³⁵ Bɛnaza, Bedia, Kɛlii,

³⁶ Vania, Mɛremɔt, Eliasib,

³⁷ Matania, Matnai, Zaazai,

³⁸ Bani, Binii, Simɛi,

³⁹ Selemia, Natan, Adaza,

⁴⁰ Maknadbai, Sasai, Sarai,

⁴¹ Azareɛl, Selemia, Sɛmaria,

⁴² Salɔm, Amaria, ɔ nin Zozɛf, be o nun wie.

⁴³ Nɛbo i anunman'm be nun'n, Zɛiɛl, Matitia, Zabad, Zɛbina, Zadai, Zoɛl, ɔ nin Bɛnaza, be o nun wie.

⁴⁴ Sran nga be o lɛ'm be kwlaa be jali nvle nun bla. Be nun sunman be nin be yi sɔ'm be wuli ba.