Ɛsdras 1 - NYANMIƐN NDƐ'N 1998

Siris man Izraɛlfuɛ'm be sali be sin be mɛn'n nun

¹ Kɛ Siris b'ɔ ti Pɛrs mɛn'n i famiɛn'n, ɔ trannin bia'n su'n, i afuɛ klikli nun'n, Anannganman waan ɔ ´yo nan ndɛ ng'ɔ fa wlɛli i nuan ijɔfuɛ Zeremi nuan kɛ ɔ kan'n, i nuan ɔ `yia. Ɔ dili junman famiɛn Siris i akunndan'n nun . Ɔ suli i bo man ɔ boli ndɛ kun jɔ sinnin kan ɔ sie ju lɛ'n i lika'n kwlaa. I sin ɔ klɛli fluwa nannannin su. Ɔ klɛli i kɛ

² «M bɔbɔ min Siris bɔ n ti Pɛrs famiɛn'n, min wan yoo: Anannganman b'ɔ ti nglo lɔ Nyanmiɛn'n fali asiɛ'n su famiɛn diwlɛ'm be kwlaa mannin min. Yɛ ɔ seli min kɛ n `kplɛn i sua kun Zerizalɛm, Zida nvle nun .

³ Amun nun sran kwlaa nga be ti Nyanmiɛn i nvle nunfuɛ'n, man Nyanmiɛn `jran be sɔfuɛ'm be sin nan be wɔ Zerizalɛm, Zida mɛn'n nun lɔ, be ko kplan Anannganman b'ɔ ti Izraɛl Nyanmiɛn'n, bɔ be su i Zerizalɛm lɔ'n, i sua'n.

⁴ Kan kwlaa nga Izraɛlfuɛ'm be o lɛ'n, man lɛfuɛ'm be man be jɛtɛ ufue, nin sika ɔkwlɛ, nin ninnge uflɛ mun ekun, ɔ nin nnɛn mun. Yɛ man be man be klun klo ninnge mun b'ɔ ti Nyanmiɛn sua ng'ɔ o Zerizalɛm lɔ'n i liɛ.»

⁵ Zida nin Bɛnzamɛn akpasua'm be nun awlobo kpɛnngbɛn mun, nin Nyanmiɛn nyrun jranfuɛ mun, nin Levifuɛ mun, ɔ nin be kwlaa nga Anannganman Nyanmiɛn'n suli be bo kɛ be ko kplɛn i sua'n Zerizalɛm'n, be siesieli be wun.

⁶ Be tranfuɛ'm be kwlaa be ukali be. Be mannin be jɛtɛ ufue, nin sika ɔkwlɛ ninnge mun, nin ninnge uflɛ mun, nin ninnge uflɛ b'ɔ be ti kpakpa mun ekun, ɔ nin nnɛn mun. Be mannin be be klun klo ninnge mun ekun.

⁷ Anannganman i sua'n nun ninnge kpakpa nga Nɛbikadnɛzar fali be Zerizalɛm ɔ wa sieli be i amuɛn'm bé sua'n nun'n, famiɛn Siris fali be mannin.

⁸ Famiɛn'n man Mitrɛdat b'ɔ ti bɔlɛ siefuɛ'n ɔ yili be fiteli nan ɔ'a fa be ɔ'a man Sɛsbazar b'ɔ ti Zida kpɛnngbɛn'n.

⁹ Ninnge sɔ'm be yɛ: sika ɔkwlɛ kpongbo ablasan, jɛtɛ ufue kpongbo akpi kun, laliɛ ablaɔn-nin-ngwlan,

¹⁰ sika ɔkwlɛ klowa ablasan, jɛtɛ ufue klowa ya nnan jɛtɛ ufue klowa blu, yɛ ninnge uflɛ akpi.

¹¹ Kɛ be kan sika ɔkwlɛ ninnge nin jɛtɛ ufue ninnge'm be kwlaa bo nun'n, be ti akpi nnun ninnge ya nnan (5.400). Kɛ Izraɛlfuɛ'm b'a yo-man kanga kun, bɔ be fin Babilɔni be ´ba Zerizalɛm'n, Sɛsbazar fɛli kwlaa bali.