Ezekiɛl 6 - NYANMIƐN NDƐ'N 1998

Ndɛ nga Nyanmiɛn kan kle amuɛn sɔfuɛ mun'n

¹ Anannganman seli min kɛ yoo:

² «Klɔ sran, kpɛ ɔ́ nyin Izraɛl oka'm be su lɔ nan kan sa kekleekle ng'ɔ wa ju be nga be tran lɔ'n bé su'n.

³ Se kɛ: ‹Izraɛl oka'm be su tranfuɛ mun, an `sie amún su tie Anannganman Nyanmiɛn i nuan su ndɛ'n. Anannganman Nyanmiɛn wan yoo: Oka nin kpɔlɛ'm bé su tranfuɛ mun, kongo kanngan nin kongo dandan'm be nun tranfuɛ mun, an `nian, n wa fa alɛ n ´yi amun su nan n ´saci amun sraka yiwlɛ lika bɔ be o kpɔlɛ'm be su mun.

⁴ Amun sraka yiwlɛ'm be wa tɔ srolo, amun ansans yrawlɛ'm be ´bubu, n ´yo man amun nun sran kpanngban kpa be ´wu amun amuɛn'm be nyrun lɛ .

⁵ N ´fa Izraɛlfuɛ'm be saka mun n ´tru be amuɛn'm be nyrun lɛ sa trutrɛɛ. N ´trutru be owie'm be nun n ´sin yia amun sraka yiwlɛ mun.

⁶ Lika kwlaa nga an tran lɛ'n, amun klɔ'm be ´bubu kpɛkuun amun sraka yiwlɛ'm bɔ be o kpɔlɛ'm be su'n be ´tɔ srolo. Amun sraka yiwlɛ'm be ´bubu, be su yo-man be nun like fi kun. Be ´saci amun amuɛn mun, be ´nunnun be osu'n mlɔnmlɔn, amun ansans'm be yrawlɛ'm be ´saci, amuɛn nga amun takali be'n be kwlaa be ´saci mlɔnmlɔn.

⁷ Amun nun sran kpanngban kpa be ´wu. Kpɛkuun amun wa si jrɛiin kɛ min yɛ n ti Anannganman nin-ɔn.

⁸ Sanngɛ amun nun wie'm be ´ka lɛ, alɛ su di-man amun ngba, be nga be ´ka lɛ sɔ'n be ´bo sanndi mɛn wie'm be nun.

⁹ Be nga be ka lɛ'n, kɛ be o mɛn nga be ´tra be lomuɛn kɔ nun'n be nun'n, bé wla wa kpɛn min su. Afin be wla ɔ wa kpɛn wafa nga n fa tuli be fɔ'n su be anwlɛn tɛ nga be fa bo tekle bɔ be nin min buli'n ti. Bé wun ´yo be bɔbɔ be tɛ bé sa tɛtɛ nin be tete sa nga be yoli'n be ti.

¹⁰ Be wa si jrɛiin kɛ min yɛ n ti Anannganman nin-ɔn, nan ndɛ nga n kannin'n, m'an kɛn-mɛn i ngbɛn. Kɛ n seli be kɛ n wa fa nyrɛnnɛn n ´yi be su'n, nán ijɔlɛ ngbɛn yɛ n ijɔli-ɔ.›

¹¹ Anannganman Nyanmiɛn'n wan yoo: ‹Fin ɔ sa klun, kplo! Si ɔ́ ja ase nan bo awuyomo se kɛ: Ɔo! Izraɛlfuɛ'm be aeliɛ tɛtɛ nin be tete sa'm bɔ be yo be'n ti, alɛ'n ɔ wa di be, awe wa kun be lele be wie wu, tukpacɛ b'ɔ sa ndɛndɛ'n wa nunnun be.

¹² Sran ng'ɔ o mmua'n, tukpacɛ b'ɔ sa ndɛndɛ'n yɛ ɔ ´kun i-ɔ, sran ng'ɔ o koko'n, alɛ yɛ ɔ ´di i-ɔ. Sran ng'ɔ ka klɔ'n nun lɛ'n, sɛ be utu klɔ'n, awe yɛ ɔ ´kun i yɛ ɔ wu-ɔ. N ´yi min ya tɛtɛ kpa'n i nglo n kle be.

¹³ Kɛ sran'm be fuɛn'm be ´tɔ be amuɛn'm be afiɛn'n, bɔ fuɛn wie'm be ´lala sin yia be sraka yiwlɛ mun'n, bɔ wie ´tɔ kpɔlɛ'm bé su, nin oka'm be ti afiɛn'n, nin waka mɔnnɛn'm bé bo, nin susrɛ'm bé bo'n, ɔ nin lika nga be yra ansans lɛ be man be amuɛn mun be kwlaa be nun'n, kpɛkuun amun wa si jrɛiin kɛ min yɛ n ti Anannganman nin-ɔn.

¹⁴ N ´yi min kwlalɛ bɔ n kwla'n i nglo bé su, kpɛkuun n ´kle be nun. N ´saci be mɛn'n i lika nga sran'm be tran lɛ'n, be kwlaa be ´tɔ sa srololo, sran su tran-man nun kun. Ɔ ´bo i bo ngua lɔ aawlɛ flɛnnɛn'n nun lɔ lele ɔ ´fa to klɔ nga be flɛ i Ribla b'ɔ o mɛn'n i nglo lɔ lika'n nun'n. Sran'm be kwlaa be wa si jrɛiin kɛ min yɛ n ti Anannganman nin-ɔn.› »