Ezekiɛl 4 - NYANMIƐN NDƐ'N 1998

Ezekiɛl waan be wa kpɛ ngblaliɛ sin yia Zerizalɛm

¹ Anannganman'n kɛnnin i ekun kɛ: «Klɔ sran, fa bliki kun fa sie ɔ nyrun nan fa Zerizalɛm klɔ'n i nzɔliɛ'n fa klɛ su.

² Kɛ be nian nzɔliɛ sɔ'n, man ɔ kle weiin kɛ b'a utu klɔ'n, nan b'a fu kunman b'a sin a yiɛ i, b'a si i wun talɛ yɛ b'a fa alɛ ninnge mun b'a siesie i wun sɛsɛsɛ a sin a yia nun.

³ Fa blalɛ paplapa kun fa kpɛ a nin klɔ'n amun afiɛn kɛ talɛ sa. Kpɛ ɔ́ nyin klɔ'n su lɔ, wuun ɔ ti kɛ b'a utu i yɛ ɔ o lɛ-ɔ, wɔ yɛ a utuli i-ɔ. Ɔ ti sa b'ɔ wa ju Izraɛl nvle'n su'n i kan klelɛ nzɔliɛ kun.

⁴ I sin'n, la ɔ́ sa bɛ'n su, blɛ'n kwlaa nga a ´la ɔ́ sa bɛ su sɔ'n, a wa sua Izraɛl famiɛn diwlɛ'n nunfuɛ'm bé sa tɛ mun, yɛ a wa fɛ bé sa tɛ sɔ'm bé su afɛ'n.

⁵ Ɔ fɛlɛ'n i blɛ'n nin afuɛ nga be dili i sa tɛ'n i yolɛ'n nun'n ɔ ´sɛ. A wa sua Izraɛlfuɛ'm be sa tɛ'n i su afɛ'n sɔ lele cɛn ba ya nsan cɛn ba ablangwlan.

⁶ Kɛ a ko di i sɔ cɛn ba liɛ mun b'ɔ ko wie'n, la ɔ́ sa fama'n su siɛn'n, a wa sua Zidafuɛ'm bé sa tɛ liɛ mun cɛn ba ablanan. I sɔ nun'n, cɛn ba kun nga m mian wɔ bɔ a di'n, ɔ nin afuɛ nuan kun bɔ be dili i i sa tɛ yolɛ nun'n be ´sɛ.

⁷ I sin, kpɛ ɔ́ nyin, yɛ tinngɛ ɔ́ sa ngbɛn'n Zerizalɛm klɔ bɔ b'a utu i'n su lɔ nan kan sa kekle ng'ɔ wa ju be su'n kle be.

⁸ N ´fa nyanman n cici wɔ, a su kwla-man ɔ wun kpɛ. A ´ka lɛ sɔ lele san cɛn nga n kleli'n ɔ'a wie.

⁹ Fa ble, nin ɔrz, nin fɛv, nin alowa mma, nin kalɔ, ɔ nin ble fekle, fɛ i kwlaa sɔ'n gua like kun nun, sanngan be nun nan fa yo ɔ kpaun. Ɔ like nga kɛ bɔ a ´la ɔ́ sa kun su cɛn ba ya nsan cɛn ba ablangwlan'n a ´di'n, yɛ ɔ o lɛ-ɔ.

¹⁰ Aliɛ ng'ɔ fata kɛ a di i cɛn kun nan w'a la'n, nán man ɔ ju kilo bue kun. Ng'ɔ fata kɛ a di i blɛ sɔ nun'n yɛ ɔ o lɛ-ɔ.

¹¹ Nzue nga cɛn kun a ´nɔn'n, sunnzun, man ɔ yo litri kun. Nzue nga a ´nɔn i blɛ sɔ'n nun'n, yɛ ɔ o lɛ-ɔ.

¹² Wɔ aliɛ nga a ´di'n, man ɔ yo kɛ kpaun bɔ ɔrz yɛ be fa yoli'n sa. Fa sran waka su fa trɔ sin nan tɔn wɔ aliɛ sɔ'n i sɔ sin'n su, sran'm be kwlakwla be nyrun lɛ.»

¹³ Anannganman seli ekun kɛ: «Kɛ n wa kan be bo n ´gua nvle uflɛ wie'm be nun'n, kɛ be wa di aliɛ tɛtɛ kɛ nga sa .»

¹⁴ Yɛ n seli kɛ: «Ee! Anannganman Nyanmiɛn, n nian di-man like fiɛn le. Kɛ ɔ fɛ i min kaan nun lele b'ɔ ´fa ju yɛ'n, n nian di-man nnɛn ng'ɔ wuli i sa su annzɛ nga i wiengu nnɛn wie kunnin i'n le. Like fiɛn'n i wie nian wlu-man mín nuan nun le .»

¹⁵ Anannganman'n tɛli min su kɛ: «Yoo, n ´fa nannin waka su'n n ´fa kaci sran waka su'n m ´man wɔ nan tɔn ɔ kpaun'n su.»

¹⁶ Ɔ seli min ekun kɛ: «Klɔ sran, n wa saci Zerizalɛm lɔ ninnge bɔ be ti dilɛ ninnge'm be kwlaa. Sɛ be ´di like o, sɛ be ´nɔn nzan o, san be ´sunnzun. Kpɛkuun srɛ wa kun be kpa .

¹⁷ Be su nyan-man kpaun nin nzan kun, bé wla wa bo bé wun kpa. Yɛ be wa yo kokloo bé sa tɛ'm be dunman nun ti.»