Ezekiɛl 3 - NYANMIƐN NDƐ'N 1998

¹ Sran ng'ɔ kan ndɛ'n kle min'n seli min kɛ: «Klɔ sran, di fluwa nyɔnnyɔnwa nga n ´fa man wɔ yɛ'n, nan ko kan ndɛ kle Izraɛlfuɛ mun.»

² N ukeli mín nuan'n, yɛ ɔ yoli man n dili fluwa sɔ'n.

³ Yɛ ɔ seli ekun kɛ: «Klɔ sran, fluwa nga n ´fa man wɔ yɛ'n, di man ɔ ku yi .» Yɛ n dili-ɔ, ɔ yoli mín nuan nun nɛnkɛn-nɛnkɛn kɛ awɛma nzue sa.

⁴ Ɔ seli min ekun kɛ: «Klɔ sran, kɔ Izraɛlfuɛ'm bé wun lɔ, ko kan mín nuan su ndɛ kle be.

⁵ Nán nvle nga be kan aniɛn uflɛ bɔ i tilɛ yo ya'n i sin yɛ n ´sunman wɔ-ɔ, Izraɛlfuɛ'm bé sin yɛ n ´sunman wɔ-ɔ.

⁶ Sɛ nvle kpanngban nga be kan aniɛn uflɛ bɔ i tilɛ ti kekle'm bé wun lɔ bɔ yɛ n sunman wɔ'n, kannzɛ bɔ a ti-man be aniɛn'n, san be ´sie bé su be tie ɔ ndɛ nga a kan'n.

⁷ Sanngɛ Izraɛlfuɛ'm be liɛ'n, be su tie-man ɔ ndɛ'n, afin be kunndɛ-man kɛ be ´ti mín nuan nun ndɛ'n, yɛlɛ kɛ bé nyin su ti kekle, yɛ be nzuɛn'n ti tɛ.

⁸ N kusu n wa yo nan a ´jran kekle kɛ be sa wie, kpɛkuun ɔ́ ti'n wa yo kekleke kɛ be liɛ'n sa wie.

⁹ N wa yo wɔ kekleke kɛ diaman sa, ɔ kekleke bɔ a ´yo'n, ɔ wa tra yɛbuɛ. I sɔ'n ti, nán srɛ kun wɔ bé wun, kannzɛ bɔ nvle sɔ'n i nunfuɛ'm bé nyin su ti kekle'n, nán srɛ kun wɔ .»

¹⁰ Ɔ kɛnnin ekun kɛ: «Ezekiɛl, fa ndɛ nga n ´kɛn i yɛ'n sie ɔ klun, fa ɔ́ su sie ndɛ'n nga n wa kɛn i yɛ'n kwlaa i bo.

¹¹ Kpɛkuun ko to ɔ niaan nga be trali be lomuɛn ɔli mɛn wie nun'n, kan ndɛ kle be, sɛ be tie o, sɛ b'a tie-man o, se be kɛ: Anannganman Nyanmiɛn'n wan yoo.»

¹² Wawɛ'n mannin min su nglo, kpɛkuun n tili nganniɛn dan nga mín sin lɔ, be kan kɛ: «Man be manman Anannganman'n i anyrunnyan b'ɔ lɛ i i tranwlɛ'n nun lɔ'n ti.»

¹³ N tili nnɛn sɔ'm be ndɛwa'm be kplalɛ'n blɛ bɔ be ´finfin be wiengu'n, yɛ n tili kondokaa'm be kplalɛ liɛ'n bé wun lɛ wie. Nganniɛn'n yoli dan.

¹⁴ Wawɛ ng'ɔ mannin min su nglo'n fali min ɔli. Kɛ n ´kɔ'n, min akunndan sanngannin, mín wla ti-man ase guawa, afin Anannganman'n i fanngan ng'ɔ o mín su'n ti dan yɛ n kwla suɛn-mɛn i bo.

¹⁵ N juli Tɛl-Abib, sran nga be trali be lomuɛn ɔli Kɛbar nzue ba'n i nuan lɔ'n bé wun lɛ. N kali bé wun lɛ cɛn ba nso, min nuan boli min wun dan kpa afɛ dan'n ti.

Nyanmiɛn ɔ'a sie Ezekiɛl Izraɛl nvle'n su kɛ gladi difuɛ sa

¹⁶ Kɛ cɛn ba nso sɔ'n sinnin'n, Anannganman seli min kɛ:

¹⁷ «Klɔ sran, n ´fa wɔ n sie Izraɛl nvle'n su kɛ gladi difuɛ sa. Tie ndɛ nga n kan kle wɔ'n, bo su kle Izraɛlfuɛ mun .

¹⁸ Sɛ n se sa tɛ yofuɛ kun kɛ ɔ su wa wu'n, sɛ w'a kan kle-mɛn i'n, sɛ w'a se-mɛn i kɛ ɔ kaci i nzuɛn tɛ'n nan ɔ'a fite nun'n, sa tɛ yofuɛ sɔ'n ɔ ´wu i sa tɛ'n nun. Sɛ ɔ wu i sa tɛ'n nun kusu'n, e nin wɔ e lɛ i.

¹⁹ Sanngɛ sɛ a se sa tɛ yofuɛ'n nan ɔ'a di-man su ɔ'a kaci-mɛn i nzuɛn tɛ'n nin i klunwi aeliɛ'n, ɔ ´wu i sa tɛ nun, kpɛkuun ɔ liɛ'n a ´fite nun.

²⁰ Sɛ sran kpa kun yaci sa kpakpa'm be yolɛ nan ɔ yo sa tɛtɛ mun'n, n ´suɛ i bo aya, kpɛkuun ɔ ´wu. Sɛ w'a se-mɛn i kɛ ɔ `kaci i sa'n, ɔ ´wu i sa tɛ nun. I sa kpakpa ng'ɔ yoli be laa'n, mín wla su kpɛn-man bé su kun. Yɛ wɔ yɛ e nin wɔ e lɛ i-ɔ.

²¹ Sanngɛ sɛ a kan kle i kpa kɛ nán ɔ yo sa tɛ'n, nan ɔ'a yo-man'n, ɔ ´nyan nguan, yɛ ɔ kusu kɛ bɔ a dun mmua bo su kleli i'n ti a ´fite nun.»

Nyanmiɛn waan Ezekiɛl muɛn i nuan kan

²² Anannganman'n i fanngan'n wluli min nun. Ɔ seli min kɛ: «Jaso kɔ kongo'n nun lɔ, n klo kɛ n ´kan ndɛ n kle wɔ lɔ.»

²³ Yɛ n fali kongo nun atin'n yɛ n wɔli lɔ-ɔ. Anannganman'n i nyrun nyannyan ng'ɔ yili i nglo'n, ɔ ti kɛ nga n wunnin i Kɛbar nzue ba'n nuan lɔ'n sa. N tɔli yɛ n utuli mín nyin ase.

²⁴ Yɛ Nyanmiɛn wawɛ'n wluli min nun-ɔn, nan ɔ'a man min su nan m'an jran nglo. Ɔ seli min kɛ: «Wlu ɔ́ sua'n nun lɔ nan nyin ɔ́ sin anuan.

²⁵ Klɔ sran, nian, be wa fa nyanman be gua ɔ su kpɛkuun be ´fa ci wɔ. A su kwla-man nzra nun fite kun.

²⁶ N ´yo man ɔ taaman'n ´mantan ɔ́ nuan'n nun kpɛkuun a ´yo bobo. A su kwla ijɔ-man be, afin be ti sran nyin keklefuɛ mun.

²⁷ Sanngɛ sɛ min waan n ´fa min ndɛ'n n ´wla ɔ́ nuan nan a kan'n, n ´tike ɔ́ nuan'n kpɛkuun a ´kwla ijɔ. Kpɛkuun se be kɛ: ‹Anannganman'n Nyanmiɛn wan yoo.› Sran nga i waan ɔ ´ti'n, ɔ ´ti. Sran nga i waan ɔ ti-man'n, ɔ su ti-man, afin be ti sran nyin keklefuɛ.»