Ezai 9 - NYANMIƐN NDƐ'N 1998

¹ Sran nga be wo aosin nun'n, be wunnin kɛ lika kpaja'n dan kpa, be nga be tran mɛn ng'ɔ wo aosin tuun kpa nun'n, lika'n kpajali be su .

² Anannganman, wɔ man be klun jɔli, wɔ man bé wun kpajali be dan. Kɛ be ba ɔ sua nun'n, be klun jɔ kɛ be nga be su kpɛ ble'n sa, bé wun kpaja be kɛ be nga be su cɛ alɛ nun ninnge nga be nyannin be'n be nun'n sa.

³ Afin sielɛ wafa nga sran wie'm be fa sie be'n b'ɔ ti kɛ trɔ sa'n, a yili i be su. Waka nga be fa bo be'n, a bubuli be nun. Ngble nga be fa kle be nyrɛnnɛn'n, a kpɛkpɛli be nun. Like nga a fa yoli Madianfuɛ mun laa'n, i kunngba'n yɛ a yoli-ɔ.

⁴ Be kpɔfuɛ'm be ngbabua nga be sili be ase gbugbu be fa ko kunnin alɛ'n nin tralɛ nga be kondoli mmoja nun'n, sin yɛ ɔ ´di be-ɔ, be ´yra kɔlikɔlikɔli.

⁵ Afin b'a wu ba kun b'a man ye, b'a fa ba yasua kun b'a man ye. Nyanmiɛn fali sielɛ'n wlɛli i sa nun. Be ´flɛ i kɛ Abonuan, Sa'm be siesiefuɛ, Nyanmiɛn b'ɔ kwla, Siɛ b'ɔ o lɛ titi, Aunjuɛ wlengbi .

⁶ Ɔ ´yo man i sielɛ'n ɔ ´trɛ, yɛ ɔ man fɔundi'n ´tran lɛ tititi. Ɔ ´yo man David i sielɛ'n nin i famiɛn diwlɛ'n be ´yo kpa, yɛ be ´taka. Mmla'n i su falɛ'n nin sa nuan su yolɛ'n, be yo sielɛ sɔ'n nin famiɛn diwlɛ sɔ'n bé bo bia lele yɛ ɔ ´yo kɛ ɔ ´fa yo nin-ɔn. Anannganman b'ɔ sie mɛn wunmuan'n i klolɛ'n ti sa ng'ɔ wa yo'n yɛ ɔ o lɛ-ɔ .

Anannganman i ya'n bɔ i waan ɔ ´yo i su sa'n

⁷ Sa nga Anannganman ´fa wla Zakɔb i osu'n nunfuɛ'm be nun'n, ɔ kan kleli be. Sa sɔ'n ɔ'a tɔ Izraɛlfuɛ'm be su.

⁸ Sran'm be kwlaa be wa si nun. Efraimfuɛ mun nin Samarifuɛ mun be ´si nun. Bé wun tulɛ'n nin bé nuan dilɛ'n ti be se kɛ:

⁹ «Talɛ'm be bliki'm b'a tɔ, sanngɛ e ´fa yɛbuɛ nga be sɛli'n e ´fa kplan be uflɛ! Janvlɛ'm b'ɔ be ti sikomɔr waka'n, be kpɛkpɛli be, sanngɛ e ´fa janvlɛ bɔ be ti sɛdri waka'n e ´kaci be.»

¹⁰ Anannganman man Rɛzɛn i kpɔfuɛ'm be ´jaso be kusu bé wun. Ɔ ´wla be nga be nin be lɛ'n be fanngan.

¹¹ Sirifuɛ'm be ´jranjran wia afiliɛ lɔ, Filistifuɛ'm be ´jranjran be liɛ wia atɔliɛ lɔ, be ´wie be di weiin, sanngɛ ɔ nin i sɔ'n ngba'n, Anannganman i ya'n ɔ su jɔ-man, ɔ nin be ´nyɛn i tititi.

¹² Sanngɛ sran'm be sa-man bé sin Anannganman b'ɔ tuli be fɔ'n i sin. Yɛ be kunndɛ fa-man bé wun mantan-man Anannganman b'ɔ sie mɛn wunmuan'n.

¹³ I sɔ'n ti, sɛ e ´kwla e se'n, aliɛ ba kunngba nun'n, Anannganman ´kpɛ Izraɛl'n i ti'n nin i lua'n, ɔ ´kpɛ mme'n i nnya'n nin ndɛ mma'n .

¹⁴ Kpɛnngbɛn'n nin awlo bo kpɛn'n be yɛ be ti i ti nin-ɔn. Yɛ wunnzue yifuɛ'm bɔ ato bualɛ'n yɛ ɔ ti be junman'n, be yɛ be ti i lua nin-ɔn.

¹⁵ Be nga be ti sran nga'm be nyrun dunfuɛ'n, be mlinlɛ yɛ be mlinnin be-ɔ. Be nga be kplin be su kɛ be dun be nyrun mmua'n, be fa atin tɛ'n.

¹⁶ I sɔ'n ti, Anannganman i klun su kwla jɔ-man be gbanflɛn'm bé wun. Yɛ ɔ su kwla si-man be aika mma mun nin be angboti mmla'm be aunnvuɛ. Afin be wie fi sro-mɛn i, be kwlaa be ti sa tɛ yofuɛ mun ngunmin kokoko. Ndɛ ng'ɔ fin be nuan fite'n, ɔ ti tɛtɛ ngunmin. I sɔ'n ti, Anannganman i ya'n ɔ su jɔ-man, ɔ nin be ´nyɛn i tititi.

¹⁷ Afin sa tɛ'n ɔ jue kɛ sin b'ɔ yra susrɛ mun nin owie mun'n sa. Sin sɔ'n, ɔ man bo'm be sɔ, yɛ sin wɛnsrɛn'n ɔ ´fu nyanmiɛn su lɔ lukuu.

¹⁸ Anannganman b'ɔ sie mɛn wunmuan'n, i ya dan'n ti mɛn'n ɔ'a sɔ kɛ sin sa. Sɛ e ´kwla se'n, sin'n ɔ'a di sran mun. Sran fi yaci-mɛn i wiengu lɛ.

¹⁹ Sɛ be tɔ fama su-ɔ, be kpɛ be di, sanngɛ awe yaci-man be kunlɛ. Sɛ be nyɛn i bɛ su lɔ-ɔ, be su di, sanngɛ be ku yi-man. Sran kun nyɛn i bɔbɔ i sa nin-ɔn, ɔ su di i nnɛn'n.

²⁰ Manase yo-man Efraim blɛblɛ, Efraim kusu ɔ nyan Manase-ɔ, ɔ yaci-mɛn i lɛ. Yɛ be bue nnyɔn'n be di gua Zida su. Sanngɛ ɔ nin i sɔ'n ngba'n, Anannganman i ya'n ɔ su jɔ-man, ɔ nin be ´nyɛn i tititi.