Ezai 7 - NYANMIƐN NDƐ'N 1998

Famiɛn Akaz i ndɛ nga Anannganman man Ezai kan kleli i'n

¹ Blɛ nga bɔ Ozias i wa Zɔtam i klun ba Akaz ɔ ti Zida famiɛn'n, Rɛzɛn b'ɔ ti Siri famiɛn'n nin i sran'm be bali kɛ be nin Zerizalɛmfuɛ'm be ´kun. Be nin Rɛmalia i wa Pekak yɛ be bali-ɔ. Be waan be ´tɔ Zerizalɛmfuɛ'm be su, be yoli lele ɔ'a yo-man ye.

² Be kan kleli Akaz b'ɔ fin David i osu nun'n nin i awlofuɛ mun kɛ Sirifuɛ'm b'a kpɛ be ngblaliɛ Efraim asiɛ'n su. Kɛ famiɛn'n nin i sran'm be tili ndɛ sɔ'n, be usuli kɛ bo nun lɔ waka mun yɛ aunngban'n su keje be sa.

³ Yɛ Anannganman seli Ezai kɛ: «Fa ɔ́ wa Sear-Zasib nan ko wun Akaz i wun. Ɔ o nglo lɔ fɛtɛ'n i mmuɛ bɔ be yili'n i wun lɛ. Lika sɔ'n ɔ o ble wlafuɛ'm be lika'n i wun lɛ.

⁴ Se i kɛ: ‹Nán srɛ kun wɔ, tran diin, nán ɔ́ wla bo ɔ́ wun Rɛzɛn b'ɔ ti Sirifuɛ'n nin Rɛmalia i wa'n be ya bɔ b'a fa'n ti. Be ti kɛ yiendre nnyɔn yɛ be su kpunngbun sa.

⁵ N si kɛ Sirifuɛ mun be nin Efraimfuɛ mun, ɔ nin Rɛmalia i wa'n be bu ɔ́ wun akunndan tɛ. Be se kɛ:

⁶ E `jaso Zida i wun, e `wla klɔ'n nunfuɛ'm be srɛ, e `saci klɔ'n lele san be ´fa bé wun fa man ye. I sin e ´fa Tabeɛl i wa yasua'n e ´sie be su famiɛn.›

⁷ Ndɛ nga Anannganman Nyanmiɛn kan'n yɛ: ‹I sɔ'n su sie-man su. I sɔ su yo-man ye,

⁸ afin Damas yɛ ɔ ti Siri i klɔ dan nin-ɔn, yɛ Rɛzɛn yɛ ɔ ti Damas i su kpɛn nin-ɔn. Ɔ'a ka afuɛ ablesiɛn-nin-nnun Efraim ´bubu, ɔ su yo-man nvle kun.

⁹ Samari yɛ ɔ ti Efraim i klɔ dan nin-ɔn, yɛ Rɛmalia i wa'n yɛ ɔ ti Samari i su kpɛn nin-ɔn. Sɛ amu'an lafi-man n su kpa'n, amun su jran-man kekle.› »

Emaniɛl

¹⁰ Anannganman kannin ndɛ kleli Akaz ekun, ɔ seli i kɛ:

¹¹ «Usa nzɔliɛ kun min bɔ n ti Anannganman ɔ Nyanmiɛn'n min sa nun b'ɔ ´kle kɛ n ´suan ɔ bo. Sɛ asiɛ'n su wa nzɔliɛ o, se nglo lɔ nzɔliɛ o, ɔ li usa.»

¹² Sanngɛ Akaz tɛli su kɛ: «N su usa-man like fi, n su sa-man Anannganman n nian-man.»

¹³ Nan Ezai ɔ'a se i kɛ: «Wɔ bɔ a nin wɔ awlofuɛ mun amun ti David i osu'n nunfuɛ mun'n, amun `sie amún su! ?Kɛ amun yo bɔ sran'm be di amlin lele be fɛ'n, i sɔ yolɛ'n ɔ ju-man amun, yɛ amun waan amun ´yo nan min Nyanmiɛn'n ɔ `fɛ amlin dilɛ nun ekun-ɔn?

¹⁴ I sɔ'n ti Anannganman bɔbɔ ɔ wa man amun nzɔliɛ kun. Amun `nian, talua'n bɔ si-man bian'n ɔ wa wunnzɛ, ɔ wa wu ba yasua kun. Ɔ ´tɔn i dunman Emaniɛl .

¹⁵ Ɔ ´nɔn nɔnnɔn nin awɛma nzue lele san ɔ ´si like ng'ɔ ti-man kpa'n nin ng'ɔ ti kpa'n be ngbaciɛ.

¹⁶ I sin ka nan ɔ'a si like ng'ɔ ti-man kpa'n nin ng'ɔ ti kpa'n be ngbaciɛ'n, sran'm be ´jaso famiɛn nnyɔn nga be kle wɔ yalɛ'n be mɛn'n nun.

¹⁷ Anannganman man sa tɛ kpa wie ɔ wa ba wɔ nin ɔ nvle'n nunfuɛ'm be su, ɔ ´ba ɔ́ si i awlo'n su. Kɛ ɔ fin cɛn bɔ Efraimfuɛ'm be cuɛnnin bé wun Zidafuɛ'm be lika'n, sa sɔ'n i wunsu nian ju-man le.» Asiri famiɛn'n b'ɔ wa ba'n, i ndɛ yɛ Ezai kan-an.

Ninnge fɛnfuɛ'm be balɛ nin i su nyrɛnnɛn'n i ndɛ

¹⁸ Blɛ sɔ nun'n, Anannganman ɔ ´bo feliman flɛ ngɔnsiɛn nga be o kan Nil nzue'n ɔ ko gua jenvie'n nun lɔ'n, ɔ nin awɛma nga be o Asiri mɛn nun'n.

¹⁹ Be ´ba, be wa tran kongo kploun'n nin yɛbuɛ buɛ'm be nun. Be ´tran susrɛ'm be kwlaa be su, be ´tran kan nnɛn'm be didi lɛ'n kwlaa nun.

²⁰ Blɛ sɔ nun'n, Anannganman ko fa laliɛ lɛman Efrat nzue'n i sin lɔ. Asiri famiɛn'n i ndɛ yɛ ɔ ´kɛn i lɛ-ɔ. Ɔ ´yi amún ti'n nin amun wunnɛn'n su ndrɛ'n kwlaa, ɔ ´yi amun akanza'n wie.

²¹ Blɛ sɔ nun'n, sran kun ɔ ´ta nannin bla kun nin boli bla nnyɔn, sran kun ɔ ta nannin bla kun nin boli bla nnyɔn.

²² Nɔnnɔn nga be ´nyɛn i'n ɔ ´sɔn dan ti be ´nɔn i nyin su ngo'n kpanngban. Be kwlaa nga be ´ka mɛn'n nun lɛ'n, nɔnnɔn i nyin su ngo'n nin awɛma nzue'n yɛ be ´fa ta bé wun-ɔn.

²³ Blɛ sɔ nun'n, vinyi fie bɔ i su vinyi ja'n ti akpi'n, bɔ bé gua kwla ju jɛtɛ ufue akpi'n, be ´ka owie-owie nin flɔn'm be nun.

²⁴ Be ´fa ta nin ta mma mun be ko di koniɛn lɔ. Afin mɛn sɔ'n ɔ ´yo susrɛ ngunmin, yɛ owie-owie mun nin flɔn mun yɛ be ´fifi lɔ-ɔ.

²⁵ Yɛ oka nga be fali tokpo be dili junman be su'n, bé ja su tia-man lɔ kun flɔn nin owie-owie'm be ti. Be ´yaci nannin'm be nun be ´ko didi lɔ, yɛ bua'm be ´kɔ lɔ.