Ezai 61 - NYANMIƐN NDƐ'N 1998

Sran bɔ Anannganman sunmɛnnin i'n i junman'n nin jasin nga be fa wlɛli i sa nun'n

¹ Anannganman Nyanmiɛn i Wawɛ'n wo mín su, afin Anannganman guali n su ngo kɛ m `bo jasin fɛ'n n kle yalɛfuɛ mun. Ɔ sunmannin min kɛ n wa cici be nga be anwlɛn'n ɔ'a kpɔtɔ be klun'n be wla, nan n `kan kle be bɔ be trali be lomuɛn'n kɛ be ´nyan be ti, yɛ n `se be nga be ti bisuafuɛ'm be kɛ be ´nyan alaje .

² I waan n wa kan afuɛ nga Anannganman ɔ ´yo sran'm be ye'n nin cɛn ng'ɔ ´tu i klunngbɔ i kpɔfuɛ'm be su'n, be ndɛ. I waan n wa fɔnvɔ be nga be o sɛ nun'n mun .

³ I waan nán Siɔnfuɛ bɔ be o sɛ nun'n be fa nzuɛn gua bé ti'n su kun. I ti i waan m blɛ be kle klanman. I waan nán be tran aunnvuɛ-aunnvuɛ kun. I ti i waan m blɛ be ngo fannin. I waan nán bé wla bo kun. I ti i waan m blɛ be cɛn dilɛ tralɛ. I liɛ'n, be ´flɛ be kɛ Sɛsɛ Yolɛ Waka Mun. Yɛ be ´flɛ be ekun kɛ Fie B'ɔ Yi Anannganman i Nyrun Nyannyan'n i Nglo.

⁴ Be ´kplan lika nvuɛn'm be uflɛ, be ´yo lalafuɛ sua nga be sacili mun'n ekun, be ´kplan klɔ'm bɔ be bubuli ɔ'a cɛ'n be uflɛ.

⁵ Aofuɛ mun yɛ be wa nian amun nnɛn'm be su be ´man amun-ɔn. Sran nga be fin lika wie'n be yɛ be wa tutu amun kacɛ'm be ´man amun-ɔn. Yɛ be yɛ be wa ta amun vinyi mun be ´man amun-ɔn.

⁶ Sanngɛ amun liɛ'n, be ´flɛ amun kɛ Anannganman i Nyrun Jranfuɛ mun. Be ´se kɛ amun liɛ'n, amun ti Nyanmiɛn'n i junman difuɛ mun. Amun ´di nvle-nvle'm be nunfuɛ'm bé bo ninnge'm bé su. Yɛ be nyrun bɔ be lɛ i'n, ɔ ´kaci amun liɛ .

⁷ «Nyannzuɛn su kun-man amun, sanngɛ amun ´nyan nyrun kpa. Amún nyin su gua-man ase, sanngɛ amun klun ´jɔ like kpa bɔ amun ´nyɛn i'n ti. Amun ´nyan aja ninnge sɔ kpɛ nnyɔn amun mɛn'n nun. Yɛ amun klun wa jɔ anannganman-anannganman.

⁸ Afin min Anannganman n klo sa nga be yo i i nuan su'n. N ciliɛ yɛlɛ awie'n nin sa tɛtɛ'm be yolɛ'n. Like nga amun yo'n, m ´man amun i ti akatua ng'ɔ nin i fata'n. E nin amun e ´tra aenguɛ kun b'ɔ ti anannganman.»

⁹ Sran'm be ´si amun osu nunfuɛ mun nvle-nvle'm be kwlaa be nun. Yɛ be ´si amun anunman mun mɛnmɛn'm be nun. Sran nga be ´wun amun'n, be ´si kɛ amun ti osu kun bɔ Anannganman i sa kpa'n wo amún su.

Ye silɛ jue

¹⁰ N klun'n ɔ jɔ dan Anannganman ti, mín wun'n ɔ blibli min kpa min Nyanmiɛn'n ti. Afin sɛ sran'm be delɛ'n ti tannin'n, wuun n ´se kɛ ɔ fa katali mín wun. Yɛ sɛ sa nga be yo i nuan su'n ti tralɛ'n, wuun n ´se kɛ ɔ fa wlali min wun. M'an yo kɛ atɔnvlɛ yasua b'ɔ wla kle klanman'n sa. M'an yo kɛ atɔnvlɛ bla b'ɔ wlawla i afle kpakpa mun'n sa.

¹¹ Kɛ ijre'n nin waka mma'm be fa fifi asiɛ wun'n, yɛ kɛ ninnge nga be lua be'n be fa fifi fie'm be su'n sa'n, i kunngba nin-ɔn, sɛ sa nga be yo i nuan su'n nin Nyanmiɛn manmanlɛ'n be ti ijre annzɛ waka mma'n, wuun n ´se kɛ Anannganman Nyanmiɛn'n ɔ ´yo man be ´fifi nvle-nvle'm be nunfuɛ'm be nyrun be ´wun i.