Ezai 60 - NYANMIƐN NDƐ'N 1998

Kpajalɛ uflɛ a tran Zerizalɛm klɔ'n nun

¹ Zerizalɛm, sɛ a ti sran'n, wuun n ´se kɛ: «Jaso.» Sɛ a ti kannin'n, wuun n ´se kɛ: «Kpaja kpa, afin ɔ lika b'ɔ kpaja weiin'n ɔ su fite, yɛ Anannganman i nyrun nyannyan'n, ɔ su fite nglo ɔ́ su .»

² Afin aosin'n ɔ kata asiɛ'n su, lika tuun ɔ dun sran'm be su, sanngɛ ɔ liɛ'n, Anannganman kpaja ɔ su, i nyrun nyannyan'n ɔ fite nglo ɔ́ su .

³ Nvle-nvle'm be nunfuɛ'm be wa nanti ɔ lika b'ɔ kpaja weiin'n nun, yɛ famiɛn wie'm be ´nanti ɔ lika b'ɔ kpaja weiin sɔ'n i nun wie.

⁴ Nian-nian sin yia nun, nian, ɔ mma'm be kwlaa b'a yia be su ba ɔ́ sin. Ɔ mma yasua'm be fin mmua lɔ be su ba, sran'm be fa ɔ mma bla mun bé sa su yɛ be ba-a.

⁵ Sɛ a wun be'n, ɔ́ wun wa kpaja wɔ, ɔ wun wa nyrɛn wɔ, ɔ klun wa jɔ kpa, yɛlɛ kɛ jenvie'n nuan lɔ anyanbeun'n ɔ ´kaci ɔ́ su wa, yɛ nvle-nvlefuɛ'm be anwlɛn su ninnge kpakpa'm be kusu be kaci ɔ su wa wie.

⁶ Nyɔnngɔnmɛn bɔ bé wiasin'n lɛ kpɔlɛ nnyɔn'n, sran'm be ´fa kpanngban kpa be ba, nnɛn sɔ'm be ´yi ɔ mɛn'n, yɛ nga bɔ bé wiasin'n lɛ kpɔlɛ kunngba'n, be ´fa wie kusu fin Madian nin Efa be ´ba. Sebafuɛ'm be ´fa sika ɔkwlɛ nin ansans be ´ba. Nyanmiɛn i sa dandan ng'ɔ yoli be'n be su jue tolɛ ti yɛ be fa ba sɔ-ɔ .

⁷ Be ´fa Kedar lɔ nnɛn'm be ´ba, be ´tian bé nuan wa, Nɛbazɔt lɔ bua nene'm be ´yo ɔ liɛ. Be ´fa nnɛn sɔ mun ´yi tɛ nga be yra be nnɛn'n kɔlikɔli'n. Be ´yi tɛ sɔ'm min sɔwlɛ'n su. Tɛ sɔ'm be wa jɔ min klun, yɛ n ´yi min nyrun nyannyan'n i nglo mín sua'n nun.

⁸ ?Wan yɛlɛ sran nga mun bɔ be ba kpuu kɛ nyanmiɛn ble'n sa, bɔ be ba kɛ okunmomo bɔ be su tu ba be lawlɛ'n sa-a?

⁹ Be nga be tran jenvie'n nuan mmua mmua lɔ'n, bɔ be lafi min su'n, be yɛ be ba-a. Tarsis lɔ mmeli'm be dun mmua be nyrun, be sua ɔ mma bɔ be o mmua mmua lɔ'n mun ba. Be jɛtɛ ufue'n nin be sika ɔkwlɛ'n wo mmeli sɔ'm be nun wie. Be ba Anannganman ɔ Nyanmiɛn'n i manmanlɛ, afin ɔ yo man a nyan nyrun.

¹⁰ Mɛn uflɛ nun mma'm be yɛ be ´kplan ɔ́ wun talɛ'n i uflɛ-ɔ, yɛ be famiɛn'm be wa su wɔ, kɛ n fali ya dan'n ti, n tuli wɔ fɔ, sanngɛ kɛ bɔ n yo sran'm be ye'n ti, n si wɔ aunnvuɛ.

¹¹ Wɔ anuan'm be ´la su titi, kɔnguɛ nin wia nun'n, be su nyin-man be, i liɛ'n, be ´fa mɛnmɛn'm be nun ninnge kpakpa mun nin be famiɛn mun, ɔ nin famiɛn sɔ'm be sufuɛ mun ´ba .

¹² Yɛ nvle nin famiɛn diwlɛ bɔ be nunfuɛ'm be waan bé su-man wɔ'n, be ´saci sekeseke kpan, be ´nunnun mlɔnmlɔnmlɔn.

¹³ Siprɛs waka mun nin pɛn waka mun, ɔ nin bui waka mun, b'ɔ man Liban mɛn'n ɔ lɛ nyrun'n, be ´fɛ i kwlaa sɔ'n be ba ɔ́ sin wa. Be ´fa yo min sua'n i klanman, yɛ n ´yo man min sua sɔ'n bɔ n tran nun'n, ɔ ´nyan nyrun.

¹⁴ Be nga be yoli wɔ tɛtɛ'n, be mma'm be ´ba ɔ nyrun, yɛ be ´kluklu bé ti'n, yɛ be kwlaa nga be yoli wɔ finfin'n, be ´koto ɔ́ bo, be ´flɛ wɔ kɛ Anannganman i Klɔ, be ´flɛ wɔ ekun kɛ Izraɛl Nyanmiɛn'n i Siɔn'n .

¹⁵ Sran'm b'a nian-man ɔ nyrun kun, be kpɔli wɔ, b'a nian-man ɔ osu kun. Sanngɛ ɔ su yo-man sɔ kun, n wa yo man be ´fa wɔ di bé nuan cɛn'n kwlaa, yɛ be klun ´jɔ ɔ dunman nun tititi.

¹⁶ A wa nɔn nvle'm be nun nɔnnɔn'n, famiɛn'm be wa ta wɔ. I liɛ'n, a wa wun i wlɛ weiin kɛ n ti Anannganman, nan min yɛ n de wɔ-ɔ, yɛ min yɛ n kpɔ ɔ́ ti-ɔ, yɛ kusu n ti Zakɔb i Nyanmiɛn, n kwla.

¹⁷ Sika ɔkwlɛ yɛ n ´fa blɛ wɔ-ɔ, n su fa-man aaba. Jɛtɛ ufue yɛ n ´fa blɛ wɔ-ɔ, n su fa-man blalɛ. Aaba yɛ n ´fa blɛ wɔ-ɔ, n su fa-man waka. Blalɛ yɛ n ´fa blɛ wɔ-ɔ, n su fa-man yɛbuɛ. Sɛ n ´kwla se'n, like nga n ´fa man b'ɔ ´nian ɔ su'n, yɛlɛ aunjuɛ'n, yɛ like nga n ´fa man b'ɔ ´sie wɔ'n, yɛlɛ sa nga be yo i i nuan su'n.

¹⁸ Sa kekleekle tɛtɛ bɔ be yo'n, be su ti-man be ngan ɔ mɛn'n nun kun. Be su ti-man like sacilɛ'n i ngan ɔ nin awlaboɛ ndɛ mun ɔ́ mɛn'n nun kun. A wa tɔn talɛ ng'ɔ sin yia wɔ'n i dunman kɛ Bé Ti Nyanlɛ Talɛ. Yɛ a wa flɛ wɔ anuan'm be kɛ Nyanmiɛn i Manmanlɛ.

¹⁹ Nán wia'n yɛ ɔ wa kpaja ɔ́ su wia'n nun kun-ɔn, nán anglo'n yɛ ɔ wa ta ɔ́ su kɔnguɛ kun-ɔn, sanngɛ Anannganman yɛ ɔ ´yo kɛ ɔ kannin sa tititi-ɔ. Ɔ Nyanmiɛn'n yɛ ɔ ´yo kɛ like b'ɔ kpaja ɔ su sa-a .

²⁰ Wia'n su tɔ-man kun, anglo'n su yaci-man talɛ kun, afin Anannganman ɔ ´yo ɔ kannin. A su tran-man sɛ nun kun.

²¹ Be nga be o ɔ mɛn'n nun'n, be ´yo sran kpa ngunmin kokoko, be yɛ be ´sie mɛn nin-ɔn. Be ti kɛ waka bɔ n tali be'n sa, be ti mín sa nuan like. N yili be kɛ be manman min.

²² Be nun kaan'n i osu nunfuɛ'm be ´trɛ lele be ´ju sran akpi, be nun kaan kpa'n, i osu'n ɔ kaci nvle dan kpa kun. Sɛ sa sɔ'm be blɛ'n ju'n, m bɔbɔ min Anannganman'n, n ´kan mín wun n ´yo be.