Ezai 6 - NYANMIƐN NDƐ'N 1998

Ezai i flɛlɛ

¹ Afuɛ nga bɔ famiɛn Ozias wuli nun'n, n wunnin Anannganman, ɔ ti famiɛn bia kun b'ɔ ti nglo-nglo kpa'n su. I tralɛ dan'n i nuan'n ɔ bubu gua asiɛ wun yɛ ɔ yi i sua dan'n .

² Serafɛn'm be o i ti'n su. Kun lɛ ndɛwa nsiɛn kun lɛ ndɛwa nsiɛn: be fa nnyɔn be kata be nyrun, be fa nnyɔn be kata bé ja'm be su, yɛ be fa nnyɔn be tu.

³ Be kpan be se be wiengu kɛ: «Anannganman b'ɔ sie mɛn wunmuan'n, i nzuɛn'n nin klɔ sran liɛ'n ti'a kun, ɔ ti'a kun, ɔ ti'a kun. I anyrunnyan ɔ'a de asiɛ'n wunmuan'n .»

⁴ Kɛ be ´kpan'n, sua'n i anuan'm be keje sa gbugbugbu, yɛ sin wɛnsrɛn yili sua'n piɛ .

⁵ Yɛ n seli kɛ: «M'an wu o! M'an mlin o, afin n ti sran kun bɔ min nuan bui'm be ti fiɛn, yɛ nvle'n bɔ n tran nun'n, i nun sran'm bé nuan bui'm be ti fiɛn, yɛ min nyinma ɔ'a wun Famiɛn'n, m'an wun Anannganman b'ɔ sie mɛn wunmuan'n.»

⁶ Serafɛn'm be nun kun tu bali min wun lɛ. Kɛ ɔ ´ba'n, pɛnsi kun wo i sa nun, yɛ ɔ fa fali sɛnmlɛn ba kun Nyanmiɛn sɔwlɛ'n su.

⁷ Ɔ fa kannin mín nuan'n yɛ ɔ seli kɛ: «Nga ɔ'a kan ɔ́ nuan bui mun, ɔ́ sa tɛ'n ɔ'a wie, b'a yaci ɔ fɔnlɛ mun b'a cɛ wɔ.»

⁸ N tili Anannganman i aniɛn'n, ɔ usali kɛ: «?Wan yɛ n ´sunmɛn i-ɔ? ?Yɛ wan yɛ ɔ ´dun mmua e nyrun-ɔn? ?Wan yɛ ɔ ´ijɔ e nuan-an?» Nan m'an tɛ su kɛ: «Min-ɔn, sunman min.»

⁹ Yɛ ɔ seli kɛ: «Kɔ nan ko se nvle nga nunfuɛ'm be kɛ: ‹Kannzɛ amun sie amún su'n, amun su ti-man ndɛ fi, kannzɛ amun tike amun nyinma'n be nian'n, amun su wun-man like fi.

¹⁰ Kete sran sɔ'n be anwlɛn'n, tannin bé su mun, yɛ kata be nyinma mun kɛ ɔ ´yo nan b'a wun-man ase, nan b'a ti-man sa, nan be akunndan'n i su ɔ'a kata nan b'a kaci-man be nzuɛn'n, nan b'a yo-man juejue'n ti .› »

¹¹ Yɛ n usali kɛ: «?Anannganman, lele cɛn onin yɛ sa sɔ'm be ´wie-ɔ?» Yɛ ɔ tɛli su kɛ: «Ɔ ´yo sɔ lele san klɔ'm be ´wie saci. Ɔ ´yo sɔ lele san klɔ mun nin sua'm be nun sran'm be ´wie, san asiɛ ng'ɔ sacili'n i su ´tɔ koun.»

¹² Ɔ ´yo sɔ lele san Anannganman ɔ ´fa sran mun kɔ mmua, yɛ mɛn'n ɔ ´ka lɛ ngbɛn.

¹³ Sɛ sran kanngan ka lɛ'n, sin ´di be. Kɛ be bu waka dandan mun bɔ bé bo'm be ka lɛ'n, i kunngba nin-ɔn, sran wie'm be wa jaso su sran sɔ'm be osu'n nun, be ´yo Anannganman i sran.