Ezai 59 - NYANMIƐN NDƐ'N 1998

Ble b'ɔ wo amun nin Nyanmiɛn amun afiɛn'n

¹ Nanwlɛ, Anannganman i sa'n ɔ ti-man tika b'ɔ kwla fa de-man amun-ɔn, yɛ i su'n ti-man tre b'ɔ kwla ti-man ndɛ nga amun kan kle i nin-ɔn.

² Sanngɛ amún sa tɛtɛ'm bɔ amun yo be'n be ti kɛ talɛ yɛ ɔ ja amun nin amun Nyanmiɛn'n amun afiɛn sa. Amún sa tɛ'n ti yɛ ɔ nian-man amun nyrun nin-ɔn, i ti yɛ ɔ sie-mɛn i su ti-man ndɛ nga amun kan nin-ɔn.

³ Afin amún sa'm be su ti sran'm be mmoja ngunmin, yɛ sɛ n ´kwla se'n, sa tɛtɛ'm b'a yo amun sama'm be fiɛn. Kɛ amun tike amún nuan, ato yɛ amun fa amun nuan sɔ'n bua-a, yɛ gblɛ yɛ amun fa kpɛ-ɔ.

⁴ Gblɛ sa'm be su yɛ amun kwlaa amun jran be sanman be wiengu-ɔ. Yɛ amun kwlaa amun bua ato jɔlɛ difuɛ'm be nyrun. Amun lafi ninnge ngbɛn-ngbɛn'm be su yɛ amun kan ndɛ bɔ ti-man ndɛ nin-ɔn. Amun bu klunwi yolɛ'n i akunndan, kpɛkuun i agualiɛ su'n, sa tɛtɛ'n yɛ amun yo-ɔ.

⁵ Sɛ amun ti anunman'n, wuun n ´se kɛ amun utu ɔnda klenzua su. Sɛ amun ti akɛndɛwa'n, wuun n ´se kɛ amun to ndɛnndɛn. Sran ng'ɔ di amun klenzua wie'n, ɔ wu. Sɛ be bo klenzua sɔ'n kun'n, ɔnda yɛ ɔ fin nun fite-ɔ.

⁶ Ndɛnndɛn bɔ amun to'n, be kwla fa wu-man tannin nan se kɛ be ´kata. Amun yo sa nga be nin yolɛ fata-man'n. Yɛ amun fa amún sa be yo sa kekleekle bɔ be ti tɛtɛ'n mun.

⁷ Amun wanndi ndɛndɛ ko yo sa tɛ'n, amun kɔ ndɛndɛ be ko kun sran kpa'n. Sa nga be nin yolɛ fata-man'n yɛ amun yo be-ɔ. Lika kwla nga amun sin lɛ'n, san amun ´saci like lɛ, san amun ´yo sa tɛtɛ.

⁸ Amun si-man aunjuɛ'n i atin'n, amun yo-man sa b'ɔ ti sein ajalɛ nga amun fa'n be nun. Ajalɛ nga amun fa'n be ti gblɛgblɛ ngunmin, sran kwlaa ng'ɔ nian amun liɛ'n su'n, i wun su jɔ-mɛn i .

Nyanmiɛn i nvle'n nunfuɛ'm be wun be fɔnlɛ mun

⁹ I sɔ'n ti yɛ Nyanmiɛn ɔ sisi i bo b'ɔ nian-man e lika nin-ɔn. I sɔ'n ti yɛ ɔ de-man ye nin-ɔn. E kunndɛ kɛ lika b'ɔ kpaja weiin ɔ bla, sanngɛ aosin'n yɛ ɔ ba-a. E kunndɛ kɛ aliɛ'n ɔ cɛn, sanngɛ lika tuun'n nun yɛ e nanti-ɔ.

¹⁰ Kɛ e ´nanti'n, e fuafua é sa kɛ anyansifuɛ wie b'ɔ fuɛfuɛ i sa talɛ wun'n sa, e fuafua é sa kɛ sran bɔ i nyinma'n ɔ'a bo'n sa. Wia klengle kpa nun'n, é ja kpla kɛ lika tuun kpa nun'n sa. E ti juejue, sanngɛ fuɛn'm be nyrun ba nyan tra ye.

¹¹ E bo wowo kɛ nnɛn ngble bɔ be flɛ i kɛ urs'n sa. E konviabo'n klu kɛ okunmomo sa tititi. E bu i kɛ Nyanmiɛn wa nian e lika, sanngɛ like fi, e bu i kɛ ɔ wa de ye, sanngɛ ngbɛn-ɔn.

¹² Afin Anannganman, a wun e sa tɛtɛ kpanngban bɔ e yo be'n. E sa tɛ sɔ'm be bu e fɔ, sɛ be ti sran'n, wuun n ´se kɛ be mantan e wun. E si e fɔnlɛ bɔ e fɔn'n.

¹³ E nyin yi-man Anannganman, e kpɛ i gblɛ, e kan ndɛ kekleekle bɔ be ti tɛtɛ'n, e jaso i wun, gblɛ kpɛlɛ'n yɛ ɔ wo e nun-ɔn, ɔ man e bua ato.

¹⁴ E yo-man sa ng'ɔ ti i nuan su'n kun, e yo-man sa kpa'n kun. Nanwlɛ dilɛ'n nun-man klɔ'n i lika fi nun kun, ndɛ wein-wein kanlɛ'n nun-man lɛ kun.

¹⁵ Nanwlɛ nun-man lɛ kun, sran nga i waan ɔ yo-man sa tɛ'n, be fɛn i bo ninnge mun. Anannganman wunnin sa ng'ɔ juli'n kwlakwla. Kɛ sran'm be bu-man nanwlɛ'n i like fi kun'n, i sɔ'n ɔ'a yo-mɛn i fɛ.

Sa nga Anannganman ɔ wa yo'n

¹⁶ Ɔ wunnin kɛ sran fi nian-man ndɛ sɔ'n nun kan-man, kɛ bɔ sran fi bua-man nun'n, i sɔ'n ɔ boli i wla. Yɛ i bɔbɔ fɛli i sa wlali nun-ɔn, kpɛkuun kɛ b'ɔ ti nanwlɛfuɛ'n ti, ɔ nyannin i su wunmiɛn yoli .

¹⁷ Sɛ e ´kwla se'n, ɔ wla sa ng'ɔ ti i nuan su'n kɛ like kokloko nga be fa kata be wue su'n sa. Sɛ e ´kwla se'n, ɔ fa delɛ b'ɔ de sran mun'n wlɛ i ti kɛ kpongbo kle sa. Ɔ fa klunngbɔ bɔ be tu'n wla i wun kɛ tralɛ sa. Ɔ fa anwlɛn bɔ be fa kun alɛ'n wla i wun kɛ tralɛ dan sa .

¹⁸ Kɛ sran kun i nyoliɛ'n ti ju'n, ɔ ´mɛn i nuan like, ɔ ´fa ya yɛ ɔ nin be nga be nun-mɛn i sin'n be ´yia nun. Like ng'ɔ nin i kpɔfuɛ mun fata'n, ɔ ´fa man be. Be nga be tran jenvie nuan mmua mmua lɔ'n, ɔ man be kusu be like liɛ'n ng'ɔ nin be fata'n.

¹⁹ I liɛ'n, kɛ ɔ fɛ i wia afiliɛ lɔ lele b'ɔ ´fa ju wia atɔliɛ lɔ'n, be ´sro Anannganman i dunman'n nin i nyrun b'ɔ ti nyannyan'n. Sɛ i kpɔfuɛ'm be ba kɛ nzue dan sa bɔbɔ'n, i Wawɛ'n ɔ kan bé bo .

²⁰ Sran kun su ba, ɔ wa de Siɔnfuɛ mun, ɔ wa de Zakɔb osu'n nunfuɛ'm bɔ be kaci bé sin si bé sa tɛtɛ bɔ be yo be'n. Anannganman yɛ ɔ kan sɔ-ɔ.

²¹ Anannganman kan gua su ekun kɛ: «Min Anannganman min liɛ'n, nda nga n ´ta be'n yɛ: Min Wawɛ'n ɔ ´tran be su, yɛ min ndɛ bɔ n fa wlali bé nuan'n, ɔ su jaso-man bé nuan nun, ɔ su jaso-man be mma'm bé nuan nun, ɔ su jaso-man be anunman'm bé nuan nun. Kɛ ɔ fin ndɛ'n, ɔ ´yo sɔ tititi .»