Ezai 57 - NYANMIƐN NDƐ'N 1998

¹ Sran kpa'm be wu, sanngɛ sran fi ndɛ nun-man be ndɛ nun. Sran kpakpa'm be wu, sanngɛ sran fi wun-mɛn i wlɛ kɛ kɛ ɔ ´yo nan nyrɛnnɛn ɔ'a tɔ-man sran'm be su'n, i ti yɛ man be wu sɔ-ɔ.

² Be nga be nanti sein'n, be klun ´jɔ, be ´la be bɛ'm be su fɔuun.

Sran nga be sɔ amuɛn'n be ijɔlɛ bɔ Nyanmiɛn ijɔ be'n

³ Amun bɔ amun ti bla'n b'ɔ yi wunnzue'n i mma mun'n, amun bɔ amun kunndɛ bla nin bian amún yi nin amún wun'm be bo'n, amun bɔ amun bo tekle'n, amun `wunnge wa.

⁴ ?Wan yɛ amun yo i finfin nin-ɔn? ?Wan yɛ amun tike amún nuan'n gbauun be oto i nin-ɔn? ?Amun ti-man ba bɔ bé nyin ti kekle bɔ be ti ato buafuɛ mun?

⁵ Amun kunndɛ amún wun terebɛnt waka'm bé bo nin waka nga nnya o bé su'n be kwlaa bé bo. Amun kpɛ ba kanngan'm be kɔmin nzue ba'm bé nuan nin yɛbuɛ buɛ'm be nun.

⁶ Izraɛlfuɛ mun, nzue ba'm be nun yɛbuɛ mlɔnnɔn-mlɔnnɔn'm be yɛ be ti amun like kpa nin-ɔn. Amun like liɛ'n yɛ o lɛ-ɔ. Be yɛ amun gua nzan ase man be-ɔ. Tɛ nga be yra be nnɛn'n kɔlikɔli'n, be yɛ amun yi man be-ɔ. ?Kɛ b'ɔ ti sɔ nin-ɔn, n ´fɔnvɔ mín wun sɛ cɛ yɛ ɔ ´yo ye-ɔ?

⁷ Oka fleiin'm bé su yɛ amun sɛ amún bɛ mun-ɔn, bé su yɛ amun fu ko yi sraka mun-ɔn.

⁸ Amun fa amun amuɛn ba mun sie anuan mun nin anuan'm bé ja'm be sin. Amun fia mín wun, amun yi amún wun kplɛn, amun fu amun li'm be su, amun trɛ amún bɛ'm be nun. Kɛ amun nin amun soman mun be la'n, ɔ yo amun fɛ, yɛ amun nian be likɛ'n .

⁹ Amun tu amún ja lele kɔ famiɛn'n i wun lɔ, amun fa ngo tra nun, amun fa parfɛn kpanngban be kɔ. Amun sunman amun sran mun mmua-mmua kpa lɔ. Amun yo man be kɔ lele be ju blɔlɔ lɔ.

¹⁰ Kɛ bɔ amun ´nantili dan sɔ'n ti'n, amun fɛli. Sanngɛ amu'an se-man amún wun kɛ: «E yo-mɛn i sɔ kun!» Amun nyannin wunmiɛn ekun, yɛ amún sa sin a bubu-man amun.

¹¹ ?Wan yɛ srɛ kun amun i wun-ɔn? ?Wan yɛ amun sro i ti yɛ man amun laka min b'ɔ man amún wla kpɛn-man mín su, b'ɔ man amun ndɛ nun-man min ndɛ nun nin-ɔn? M muannin min nuan ɔ'a cɛ kpa. ?I sɔ'n ti yɛ amun sro-man min kun nin-ɔn?

¹² N wa kan amún sa kpa bɔ amun yo i ngboko'n, nin amun junman klanman bɔ amun di i ngboko'n. Sɛ n kan be'n, be su yo-man amún wun sa ye.

¹³ Sɛ amun kpan'n, man amun tete ninnge kpanngban'm be de amun! Aunngban kun wa fita be ngba kɔ, aunngban kun wa man bé su kɔ. Sanngɛ sran ng'ɔ ko fia mín sin'n, mɛn'n ɔ ´kaci i liɛ, yɛ ɔ ´nyan min oka'n .

Nyanmiɛn i nvle'n nunfuɛ'm be kacilɛ b'ɔ ´kaci be'n

¹⁴ Anannganman wa se kɛ: «Amun `tike atin kun, amun `siesie i ye, amun `yi like ng'ɔ kata min nvle'n nunfuɛ'm be atin'n i kwlaa.»

¹⁵ Afin Anannganman b'ɔ o like kwlaa ti su'n, bɔ i lika ng'ɔ tran nun'n lɛ-man bo tuwlɛ'n, bɔ i dunman'n lɛ-man wunsu'n, i wan yoo: «N tran lika nga be o nglo-nglo mmua lɔ'n be nun, yɛ min nzuɛn nin klɔ sran liɛ ti-man kun. Sanngɛ be nga b'a fɛ'n, ɔ nin be nga bé wun a fɔ'n, min nin be e o nun, kɛ ɔ ´yo nan m'an wla be fanngan, nan m'an wla be nga b'a fɛ'n be fanngan wie'n ti .

¹⁶ N su ka-man fɔ bulɛ'n su sa tititi, n su ka-man ya falɛ'n su sa tititi. Sɛ ɔ yo sɔ-ɔ, be nga n yili be'n, be su nyan-man nguan.

¹⁷ Izraɛlfuɛ'm bé sa tɛtɛ nga be yoli be'n, ɔ man ya kunnin min nan m'an tu be fɔ. N fali ya, i ti n kacili ń sin n sili be. Sanngɛ b'a yaci-man bé nyin kekle'n i yolɛ, nga be waan be ´yo'n yɛ be yoli-ɔ.

¹⁸ N wun be nantilɛ wafa'n, sanngɛ n wa kaci be, n ´dun mmua be nyrun, n ´fɔnvɔ be, yɛ n ´fɔnvɔ be nga be nin be o sɛ nun'n mun.

¹⁹ N ´yo man be ´bo sro. Be nga be o mmua o, be nga be o koko o, bé wun ´jɔ be, bé wun ´jɔ be sakpa! N ´kaci be.» Anannganman yɛ se sɔ-ɔ .

²⁰ Sanngɛ be nga be bu-man Nyanmiɛn nin i ndɛ'n be like fi'n, be ti kɛ jenvie'n bɔ aunngban'n keje i b'ɔ kwla jran-man diin, b'ɔ bo ninnge tɛtɛ'm kwlaa gua cenje'n su'n sa.

²¹ Anannganman waan: «Be nga be bu-man min nin min ndɛ'n like fi'n, bé wun jɔ-man be le.»