Ezai 52 - NYANMIƐN NDƐ'N 1998

Zerizalɛmfuɛ mun, amun `tinnge

¹ Amun `tinnge! Amun `tinnge! Siɔnfuɛ mun, amun `jran kekle! Zerizalɛmfuɛ mun, amun bɔ amun tran Nyanmiɛn i klɔ'n su'n, amun `wla amun cɛn dilɛ tralɛ mun! Afin be bɔ be wla-man klɛn'n, bɔ be ti fiɛn'n, be su wlu-man wa kun .

² Zerizalɛmfuɛ mun, amun `kplakpla amún wun ndutre'n gua. Amun `jaso nan amun `tran amun tranwlɛ laa'n nun. Siɔnfuɛ mun, amun bɔ amun ti kanga'n, amun `kpɛkpɛ jrɔkɔ'm bɔ be wo amun kɔmin'n be nun gua.

³ Afin Anannganman wan yoo: «Be yoli amun atɛ sa ngbɛn, sika a fite-man amun atɛ yolɛ sɔ'n nun, ɔ man i ti'n, amún ti kpɔlɛ nun'n, be su tannin-man deiin.»

⁴ Yɛ Anannganman Nyanmiɛn ´kɛn i ekun kɛ: «I klikli nun'n, min nvle'n nunfuɛ'm be ɔli Ezipt lɔ fialɛ, i kasiɛn su'n, Asirifuɛ'm be kleli be nyrɛnnɛn ngbɛn.

⁵ ?Yɛ siɛn'n, kɛ bɔ be trali min nvlefuɛ mun lomuɛn sa ngbɛn'n, nzu sa yɛ n wa yo-ɔ?» Anannganman yɛ ɔ usa sɔ-ɔ. «Yɛ be nga be kwlali min nvlefuɛ mun'n, be bo sro, ɔ lɛ-man cɛn bɔ be yo-man min dunman'n i finfin-ɔn .» Anannganman yɛ ɔ se sɔ-ɔ.

⁶ «I sɔ'n ti, cɛn kun n wa kle min nvlefuɛ mun n wafa bɔ n ti'n, be wa si kɛ min yɛ n se kɛ n su ba nin-ɔn .»

Anannganman ɔ ´sɛ i sin ba Zerizalɛm

⁷ Kɛ jasin fɛ bofuɛ'n ɔ fin oka'm be su lɔ ba'n, i ja'm be yo nyɛnmɛn o! Ɔ kan aunjuɛ'n i ndɛ, ɔ kan sran'm be delɛ'n i ndɛ. Ɔ se Siɔnfuɛ'm be kɛ: «Amun Nyanmiɛn'n yɛ ɔ ti famiɛn nin-ɔn !»

⁸ Amun `sie amún su be `tie be bɔ be kpla klɔ'n be nɛn'n, be bo sro likawlɛ, afin be nyinma ta nun wein kɛ Anannganman'n su ba Siɔn.

⁹ Amun Zerizalɛmfuɛ kanngan nga amun ka lɛ'n, amun `bo sro likawlɛ! Afin Anannganman ɔ'a fɔnvɔ i nvle'n nunfuɛ mun, ɔ'a kpɔ Zerizalɛmfuɛ'm bé ti.

¹⁰ Anannganman ɔ'a kle nvle-nvle'm be nunfuɛ'm be kwlaa kɛ ɔ ti kpli. Yɛ kɛ ɔ fɛ i lele ´ju mɛn'n i awieliɛ lɔ'n, sran'm be ´wun delɛ nga Nyanmiɛn de sran'n .

Nyanmiɛn waan be `jaso Babilɔni lɔ

¹¹ Amun bɔ amun sua Anannganman i sulɛ ninnge mun'n, amun `wɔ, amun `wɔ, amun `fite! Nán amun kan ninnge fiɛn fi. Amun `fin Babilɔni lɔ fite, amun `yo amún wun saun !

¹² Nán amun kpli fite, nán man ɔ yo kɛ amun su wanndi sa. Afin Anannganman ´dun mmua amun nyrun! Izraɛl Nyanmiɛn'n ɔ ´ka amún sin lɔ ɔ ´sasa amun.

Anannganman i sufuɛ'n i ndɛ

¹³ Anannganman waan: «Amun `nian, min sufuɛ'n i sa nun ninnge'm be ´yo ye. Ɔ ´yo dan, i dunman'n ´fu, ɔ ´nyan nyrun kpa.

¹⁴ Kɛ sran sunman be wunnin i'n, srɛ kunnin be dan. Afin kɛ a wun i nyrun'n sa'n, a wun-mɛn i sran wlɛ kun, i wafa'n ti-man kɛ sran'm be liɛ'n sa kun.

¹⁵ Sanngɛ siɛn'n, nvle-nvle'm be nunfuɛ kpanngban bé nuan wa bo bé wun i dunman nun. Sɛ famiɛn'm be wun i'n, be su kwla uke-man be nuan be kan-man ndɛ fi, afin nga be ´wun i'n nin i wun ndɛ nga be kan kleli be laa'n, ɔ su yo-man kun. Yɛ sa nga be ´ti'n, be nian ti-mɛn i sɔ laa le .»