Ezai 51 - NYANMIƐN NDƐ'N 1998

Delɛ bɔ Anannganman de sran mun'n, ɔ ti-man le kunngba liɛ

¹ Amun nga bɔ amun kunndɛ nanwlɛ'n, bɔ amun fa amún wun mantan Anannganman'n, amun `tie ndɛ nga n kan'n! Sɛ amun ti yɛbuɛ'n, wuun n ´se kɛ amun `nian yɛbuɛ nga bɔ i nun yɛ be sɛli amun'n, yɛ amun `nian kunman nga be fali amun nun'n.

² Amun `nian Abraam b'ɔ ti amún si'n nin Sara b'ɔ wuli amun'n. Afin kɛ n ´flɛ Abraam'n, wuun ɔ lɛ-man ba. N yoli i ye, yɛ n yoli man i osu'n ɔ trɛli.

³ Anannganman wa fɔnvɔ Siɔnfuɛ mun, be lika'm bɔ be bubuli'n ti be ´yo i annvɔ. Ɔ ´yo man be lika nga ɔ'a kaci kɛ aawlɛ flɛnnɛn sa'n, ɔ ´yo kɛ Edɛni lika'n sa. Yɛ ɔ ´yo man lika kee sɔ'n ɔ ´kaci kɛ i bɔbɔ Anannganman i fie'n sa. Siɔnfuɛ'm be ´bo sro, be klun ´jɔ. Be ´to Nyanmiɛn manmanlɛ jue mun, yɛ be ´bo ninnge nga be tɛ mun be ´fa yi Nyanmiɛn i ayɛ.

⁴ Anannganman waan: «Min sran mun, amun `sie amun su mín nuan bo! Min nvle'n nunfuɛ mun, amun `tie ndɛ bɔ n kan'n! Afin n wa sie mmla. N wa di jɔlɛ, jɔlɛ dilɛ sɔ'n, ɔ ´yo kɛ nvle-nvle'm be like b'ɔ kpaja'n sa.

⁵ Min nanwlɛ dilɛ cɛn'n ɔ'a mantan. Sran'm bɔ min waan n ´de be'n, bé ti nyanlɛ blɛ'n su wa ju. N wa di nvle-nvle'm be jɔlɛ. Be nga be tran jenvie nuan mmua mmua lɔ'n, be ´fa bé wla gua mín su, be ´fa bé wun wla min sa nun.

⁶ Amun `man amún nyin'n su be `nian nglo lɔ, amun `kan amún ti ase be `nian asiɛ'n. Afin nyanmiɛn'n su ɔ ´kpɛ wiaa kɛ sin wɛnsrɛn b'ɔ wie'n sa. Asiɛ'n ɔ ´saci kɛ tralɛ b'ɔ titi'n sa, yɛ i su sran'm be ´wu kɛ ngɔnsiɛn'm be sa. Sanngɛ delɛ nga n ´de sran mun'n, ɔ su yo-man le kunngba liɛ, n ´yo i sɔ tititi. Yɛ n su yaci-man sa kpa'n i yolɛ le .

⁷ Amun nga amun si nanwlɛ'n, amun nga min mmla'n wo amun anwlɛn'n nun'n, amun `sie amún su mín nuan'n bo! Nán amun sro kputulɛ bɔ sran'm be ´kputu amun'n, sɛ be kpɛ amun nzowa'n, nán amun usu.

⁸ Afin be agualiɛ'n ɔ ´gua be kɛ tralɛ bɔ nvɔlɛ ɔ'a di'n sa, yɛ ɔ ´gua be kɛ bua ndrɛ tralɛ bɔ kakaa'm b'a saci i'n sa. Sanngɛ n ´yo sa kpa'n tititi, yɛ delɛ nga n ´de sran mun'n, ɔ su yo-man le kunngba liɛ, n ´yo i sɔ blɛ'n kwlakwla.»

Min Min, jaso

⁹ Min Min, jaso! Jaso ndɛndɛ! Sɛ ɔ fanngan'n ti kɛ tralɛ sa'n, wuun n ´se kɛ a `wlɛ i kɛ laa'n sa! Jaso kɛ laa blɛ nun'n sa! Jaso kɛ sran laa'm bé blɛ'n su'n sa! ?Nán wɔ yɛ a yili Eziptfuɛ'm be ase nin-ɔn? ?Nán wɔ yɛ a boli jenvie nun dragɔn i kannin nin-ɔn?

¹⁰ ?Nán wɔ yɛ a yoli man jenvie dan sɔ'n i nun nzue'n wieli nun wein nin-ɔn? ?Nán wɔ ekun yɛ a yili atin kun jenvie i bo lɔ kploun nun, bɔ be nga a kpɔli bé ti'n be sinnin nun nin-ɔn?

¹¹ Be nga Anannganman deli be'n, be ´sa bé sin, be ´wlu Zerizalɛm wa, wuun be ´to jue kekle kpa, be klun'n ɔ ´jɔ tititi, bé wun ´kpaja be, bé wun ´nyrɛn be, kpɛkuun be klunngbɔ'n nin be kplinlɛ'n be wie .

?Min sran mun, nguɛ like yɛ amun sro i-ɔ?

¹² M bɔbɔ min yɛ n fɔnvɔ amun-ɔn. ?Min nvle'n nunfuɛ mun, nguɛ ti yɛ amun sro sran nin-ɔn? Ɔ ti wie'n i nnɛn, ɔ ti klɔ sran, bɔ i agualiɛ'n ɔ wa guɛ i kɛ ijre'n i liɛ sa.

¹³ Anannganman b'ɔ yili amun'n, b'ɔ tinngɛli nglo lɔ ng'ɔ la plaii'n nun kɛ bɛ sa'n, b'ɔ wlali asiɛ'n i bo ase'n, amún wla fi i su. Cɛn kwlaa amun usu, srɛ b'ɔ kun amun be nga be tin amun su'n be ya bɔ be fa'n ti, ɔ waan be su wa nunnun amun sa! ?Sanngɛ be ya sɔ'n bɔ be fa'n, ɔ yo nzu ye?

¹⁴ Ɔ cɛ kan'n, bisuafuɛ'n b'ɔ ɔ'a fɛ'n, ɔ ´nyɛn i ti. Ɔ su wu-man kunman'n nun lɔ, yɛ ɔ su mian-man aliɛ'n i sa kun.

¹⁵ N ti Anannganman amun Nyanmiɛn, min yɛ n keje jenvie'n nun yɛ man i nzue ɔ bo nin-ɔn. Min dunman'n yɛlɛ Anannganman b'ɔ sie mɛn wunmuan'n.

¹⁶ N ´fa min ndɛ'n n wla amún nuan. N ´fa mín sa'n i fɔnvɔ'n n kata amún su, nan n ´tinngɛ nyanmiɛn'n b'ɔ la nglo lɔ plaii'n nun kɛ bɛ sa, nan n ´wla asiɛ'n i bo ase. N se Siɔnfuɛ'm be kɛ: «Amun ti min nvle'n nunfuɛ mun .»

Zerizalɛmfuɛ mun, amun `kpinndin amún wun

¹⁷ Amun `tinnge, amun `tinnge! Zerizalɛmfuɛ mun, amun `tinnge! Sɛ Anannganman i ya'n ti nzan'n, wuun n ´se kɛ ɔ fa mannin amun'n, amun nɔnnin. Amun nɔnnin i lele ɔ wieli klowa'n nun, yɛ amún nyin su kpɛli amun .

¹⁸ Amun mma nga amun wuli be'n, be nun kun sa ɔ'a dun-man mmua amun nyrun a kle-man amun atin. Ba nga amun tali be'n, be nun kun sa a tra-man amún sa.

¹⁹ Sayalɛ nnyɔn kannin amun: amún bo ninnge'n i fɛnlɛ, nin lika'n i bubulɛ b'ɔ bubuli'n, yɛ alɛ nin awe'n. ?Wan yɛ ɔ ´koko amun-ɔn? ?Wan yɛ ɔ ´fɔnvɔ amun-ɔn?

²⁰ Amun mma'm be lala klɔ'n nun anngɔnda'm be kwlaa su, be o lɛ, be keje-man bé wun. B'a yo kɛ wannzannin bɔ aya ɔ'a trɛ i'n sa. Anannganman i ya'n wo be su, ɔ kan ndɛ kekle kle be.

²¹ I sɔ'n ti, Zerizalɛmfuɛ mun, amun bɔ amun ti nyrɛnnɛnfuɛ'n, amun bɔ amu'an bo'n bɔ sanngɛ nán nzanboɛ'n, amun `tie.

²² Amun Min Anannganman Nyanmiɛn'n, b'ɔ jin i nvle'n nun sran'm be sin'n, i waan: «Min ya b'ɔ ti kɛ nzan b'ɔ bo sran sa'n, n ´de i onga b'ɔ ka'n amún sa nun. Amun su nɔn-mɛn i kun.

²³ Be nga be kle amun nyrɛnnɛn'n, bɔ be se amun kɛ: ‹Amun `la man e sin amún su,› n ´fa n ya sɔ'n gua be su. Amun fali amun wunnɛn'n mannin, yɛ sran'm be fa yoli kɛ klɔ'n nun atin'm bɔ be sin nun'n sa, be nantili su.»