Ezai 5 - NYANMIƐN NDƐ'N 1998

Anannganman i vinyi fie'n

¹ Min waan n ´to jue m bo flɛ min aenguɛ'n. Min aenguɛ'n ɔ nin i vinyi fie bé wun jue yɛ min waan n ´to-ɔ . Min aenguɛ'n ɔ lɛ i vinyi fie kun, i vinyi fie sɔ'n wo kpɔlɛ wie bɔ i asiɛ'n ti kpa'n su.

² Ɔ dili asiɛ'n su junman, ɔ yiyili i nun yɛbuɛ mun, ɔ tali nun vinyi nglanman nglanman mun. Ɔ kplannin akpa fleiin kun fie'n i afiɛn. Ɔ kpɛli kunman kun. Kunman sɔ'n ɔ ti vinyi mma nzue cuɛnwlɛ. Ɔ bu i kɛ vinyi'n ɔ wa su mma kpa, kpɛkuun ɔ ´su-ɔ, mma tɛtɛ yɛ ɔ'a su-ɔ.

³ Zerizalɛmfuɛ mun, amun nin Zidafuɛ mun, amun `di e nin min vinyi fie'n ye afiɛn ndɛ sɔ'n!

⁴ ?Like onin cɛ yɛ ɔ fata kɛ n yo i min vinyi fie sɔ'n su bɔ m'an yo-man-an? ?Yɛ ɔ yo sɛ ti yɛ n lafili su tankaan kɛ ɔ wa su mma kpa bɔ mma tɛ yɛ ɔ suli nin-ɔn?

⁵ Ɔ man yoo, n wa kle amun like nga n wa fa yo min vinyi fie'n. M ´bubu i wun talɛ'n, yɛ nnɛn'm be wa di vinyi nga n tali'n. N ´saci awa ng'ɔ si i wun'n, yɛ be nga be ´sin'n be ´tiatia vinyi'n su.

⁶ N ´saci i, be su kpɛkpɛ-man vinyi'n su kun, be su tutu-man fie'n nun kun. Flɔn nin owie'm be ´fifi nun, yɛ n ´se nzue ng'ɔ mlan'n kɛ nán ɔ tɔ su.

⁷ Anannganman b'ɔ sie mɛn wunmuan'n, i vinyi fie'n yɛlɛ Izraɛl osu'n. Yɛ waka b'ɔ tali b'ɔ klo be kpa'n yɛlɛ Zidafuɛ mun. Anannganman bu kɛ be wa yo sa mun i nuan su, sanngɛ sa tɛtɛ mun yɛ be yo be-ɔ. Ɔ bu i kɛ be wa fa mmla'n su, sanngɛ nyrɛnnɛnfuɛ'm be kpanlɛ'n yɛ be ti i lika'n kwlakwla-a.

Be nga be klɔklɔ Anannganman i ya'n

⁸ Sran nga be kplan sua uka sua su'n, be nga be di fie uka fie su'n b'ɔ man lika fi ka-man lɛ'n, be yako! Be ngunmin yɛ be lɛ tranwlɛ mɛn'n nun-ɔn.

⁹ Amun `nian, sa nga Anannganman b'ɔ sie mɛn wunmuan'n ɔ kan kleli min'n yɛ, i waan: «Sua kpanngban nga'm be wa bubu. Sran su tran-man sua dandan nglanman-nglanman nga'm be nun kun. Sa sɔ'm be ´yo sɔ sakpa!

¹⁰ Sɛ be ta vinyi ɛktar nsan'n, nzan litri ablenun yɛ be ´nyɛn i nun-ɔn. Yɛ sɛ be gua ble kilo ya'n, be ´kpɛ ble kilo blu cɛ.»

¹¹ Be nga bɔ nglɛmun ndɛ kpa'n be ko kunndɛ nzan kekleke be nɔn'n, be yako! Be nga kɔnguɛ be la-man'n, bɔ nzan yɛ be nɔn i kɛ be ´fa kan bé wun nglɛ'n, be yako!

¹² Kɛ be ´bo jru'n, nin aluku'n, ɔ nin klɛn, ɔ nin blo'n, wuun be ´nɔn nzan'n be ´bo. Be nian-man sa nga n yo be'n, be nian-man junman nga n di be'n.

¹³ I sɔ'n ti be wa fa be kɔ mɛn uflɛ nun, afin be wun-man sa wlɛ. Awe'n ´kun be nun sran kpakpa mun, be ´wu. Yɛ nzue we'n ´kun be kun nga mun.

¹⁴ I sɔ'n ti, wie'n ɔ'a trɛ i nuan'n nun, ɔ'a trɛ nun dan kpa. Zerizalɛmfuɛ mun, be kpakpa mun o, be kun nga mun o, ɔ nin trulɛ nga be ´tru be ´di cɛn'n lɛ'n, be ´ko tɔ wie'n i nuan sɔ'n nun.

¹⁵ I sɔ'n ti, be wa kan sran'm be ase, yɛ be wa gua be nyin ase. Sran nga be ti wun tufuɛ'n, be ´kan be ase.

¹⁶ Anannganman b'ɔ sie mɛn wunmuan'n, ɔ ti dan, afin ɔ yo sa i nuan su. Ɔ ti saun, i nzuɛn'n nin klɔ sran liɛ'n ti-man kun, afin ɔ nian mmla'n su yɛ ɔ yo i sa liɛ mun-ɔn.

¹⁷ Bua'm be wa didi klɔ nvuɛn'n nun kɛ be fa yo i be didiwlɛ'n nun'n sa. Yɛ boli ba nga be ta be bé sa nun'n, be ´didi kan anyanbeunfuɛ'm be ninnge'm be o lɛ laa bɔ be sacili'n.

¹⁸ Be nga be fa gblɛ kpɛlɛ'n yo kɛ nyanman sa be fa cuɛn fɔnlɛ'n, be nga be cuɛn sa tɛ'n kɛ be fa cuɛn kakaklolo sa'n, be yako!

¹⁹ Be se kɛ: «Man Anannganman ɔ kɛn i wun yo i junman'n ndɛndɛ nan e ´wun i. Man Izraɛl Nyanmiɛn'n i sa b'ɔ jaja be'n, ɔ yia be nuan nan e ´wun be!»

²⁰ Be nga be flɛ sa kpa'n kɛ sa tɛ'n, bɔ be flɛ sa tɛ'n kusu kɛ sa kpa'n, be yako! Like ng'ɔ ti tuun'n yɛ be waan ɔ ti weiin-ɔn, like ng'ɔ yo fɛ'n yɛ be waan ɔ yo wi-ɔ, yɛ like ng'ɔ yo wi'n yɛ be waan ɔ yo fɛ-ɔ.

²¹ Be nga be bu bé wun kɛ be si sa'n, bɔ be bu bé wun kɛ be ti ngwlɛlɛfuɛ'n, be yako!

²² Be nga nzan nɔnlɛ'n yɛ ɔ ti be yasua like'n, be nga be waan be `se kɛ be yɛ be ti nzan kekle yifuɛ'm be klikli'n, be yako!

²³ Sɛ sran kun yo sa tɛ'n, kɛ ɔ man be adi'n, kpɛkuun b'a di i ndɛ'n klanman. Sɛ sran wie i ndɛ'n yo fɛ'n, be bu ndɛ'n be yi su.

²⁴ I sɔ'n ti, sɛ be ti waka'n, wuun n ´se kɛ, kɛ sin'n ɔ fa yra awie ja'n sa'n, kɛ sin'n ɔ fa di ijre kee'n sa'n, be olui'n ɔ ´saci, yɛ be nyrɛ'n be ´yo munkun-munkun be ´kaci kɛ ndutre sa. Afin be yili Anannganman b'ɔ sie mɛn wunmuan'n i mmla'n i ase, yɛ be yoli Izraɛl Nyanmiɛn'n i nuan ndɛ'n i finfin.

Anannganman i ya'n bɔ i waan ɔ ´yo i su sa'n

²⁵ I sɔ'n ti Anannganman fali ya i sran'm bé wun. I sa kannin be. Oka'm be kejeli, sran'm be saka'm be tru klɔ'n nun atin'm be nun kɛ wla sa. Sanngɛ ɔ nin i sɔ'n ngba'n, Anannganman i ya'n ɔ'a jɔ-man, ɔ nin be tɛ nyɛn i tititi.

²⁶ Anannganman ɔ'a man nzɔliɛ kun su ɔ'a man nvle nga be o muamua lɔ'n. Ɔ bo feliman flɛ be nun kun kɛ be wo asiɛ'n i bue kun'n su lɔ'n. Yɛ amun `nian, ɔ su kɛn i wun ba ndɛndɛ kpa. Ɔ tu glaunglaun yɛ ɔ ba-a.

²⁷ I sran'm be liɛ'n, ɔ lɛ-man kɛ b'a fɛ, be cuɛn-cuɛn-man like ase. Be tɔ-man ngwlɛ, be lafi-man, bé bo kplo'n kwlaa ɔ ci bé bo, bé ja ngbabua'm be nyanman'n kwlaa ti ciciwa.

²⁸ Bé ta mma'm be ti piembiembie, b'a cuɛn bé ta'm be kwlaa be nun b'a sie. Be nnɛn kpanngɔ'm bé ja bo'm be ti kɛ yɛbuɛ san sa. Kɛ a wun be kakaklolo'm bé ja bɔ be ´kpɛ be wun'n, ɔ waan seke yɛ ɔ su tu sa.

²⁹ Be kpanlɛ nga be kpan'n, ɔ ti kɛ asɔmɔli bla'm be liɛ'n sa, be kpan kɛ asɔmɔli ba mun sa. Be kpan, be tra be nnɛn'n, be fa kɔ, sran fi kwla de-mɛn i be sa nun.

³⁰ I cɛn sɔ nun'n, nganniɛn dan kun ɔ ´tɛ sran sɔ'm be dunman nun wie, ɔ ´tɛ kɛ jenvie yɛ ɔ su bo sa. Kɛ be ´nian mɛn'n, aosin tuun yɛ be ´wun i-ɔ. Nyanmiɛn ble likiliki kpa kun ´kata wia'n i nyrun.