Ezai 49 - NYANMIƐN NDƐ'N 1998

Anannganman i sufuɛ'n

¹ Amun nga amun tran lika nga be o jenvie nuan mmua lɔ'n, amun `tie ndɛ nga n kan'n! Amun nga amun tran mmua-mmua lɔ'n, amun `sie amún su kpa! Kɛ n tɛ o mín nin klun lɔ'n, yɛ Anannganman flɛli min-ɔn. Kɛ n fin mín nin klun n fiteli cɛ'n, yɛ ɔ boli min dunman-an.

² Ɔ yoli man ndɛ ng'ɔ fin mín nuan fite'n ɔ kaci kɛ tokofi b'ɔ la kpa'n sa. Ɔ fɛli i sa'n i fɔnvɔ'n katali min su. Ɔ yoli man n kacili kɛ ta mma b'ɔ ti piembie kpa'n sa. Sɛ n ´kwla se'n, ɔ fali min fiali i ta'n i bua'n nun.

³ Ɔ seli min kɛ: «Izraɛlfuɛ mun, amun bɔ n fa amun n fa yi min nyrun bɔ n lɛ i'n i nglo'n, amun ti min sufuɛ .»

⁴ Sanngɛ n liɛ'n, n seli kɛ n kleli mín wun yalɛ ngbɛn, n fali min wunmiɛn'n n dili junman ngbɛn, m'an nyan-man nun like fi. Like ng'ɔ ti min liɛ'n wo Anannganman sa nun, min akatua'n wo Nyanmiɛn wun lɔ.

⁵ Anannganman b'ɔ dun mmua siesieli min mín nin klun lɔ kɛ ɔ ´yo nan m'an yo i sufuɛ'n, nan m'an fa Zakɔb i osu'n nunfuɛ mun m'an blɛ i'n, nan m'an fa Izraɛlfuɛ mun m'an tian be nuan i wun lɛ'n, ɔ kannin ndɛ siɛn'n. Anannganman bu min sran, Nyanmiɛn yɛ ɔ man min wunmiɛn-ɔn.

⁶ Ɔ seli min kɛ: «Kɛ a ti min sufuɛ'n, bɔ min waan a man Zakɔb osu'n nunfuɛ'm be su'n, nan Izraɛlfuɛ nga bé nyin o su'n a `fa be sa bé sin'n, i sɔ'n ɔ ju-man. N ´yo man a ´kpaja nvle-nvle'm be nyrun, ɔ ti sran'm be ´nyan be ti lele ju asiɛ'n i awieliɛ'n, be ´wun delɛ bɔ n de sran'n .»

Be nga be fali be ɔli mɛn wie nun'n bé sin salɛ

⁷ Anannganman b'ɔ kpɔ i nvle'n nunfuɛ'm bé ti'n, b'ɔ ti Izraɛl Nyanmiɛn'n, ɔ kan ndɛ kle amun bɔ be yo amun finfin'n, bɔ be kpɔ amun'n, bɔ be nga be sie sran mun kekle su'n be fa amun yo be kanga'n. I waan: «Min Anannganman bɔ n ti nanwlɛfuɛ'n, bɔ n ti Izraɛl Nyanmiɛn'n, min bɔ n kpali amun'n, min dunman nun ti sɛ famiɛn'm be wun amun'n, be ´jaso be famiɛn bia'm be su, sɛ famiɛn i awlo lɔ sran dandan'm be wun amun'n, be ´koto amun bo.»

⁸ Ndɛ nga Anannganman ɔ kan'n yɛ. I waan: «N tili ndɛ nga amun kɛnnin i blɛ ng'ɔ ti kpa'n i nun'n, yɛ i nun bɔ n deli sran mun, n jrannin amún sin. N sasali amun. N fali amun kɛ amun `yo aenguɛ bɔ e nin sran mun e tra'n i nun aowa. N wa yo man mɛn'n ɔ ´nyan nyrun ekun, yɛ n wa cɛcɛ min asiɛ bɔ ɔ'a saci ndɛ yɛ'n i nun .

⁹ N ´se bisuafuɛ'm be kɛ: ‹Amun `fite!› Yɛ n ´se be nga be o lika tuun nun'n be kɛ: ‹Amun `fite bla weiin nun wa!› Be ´yo kɛ nnɛn bɔ be didi atin nuan bɔ be nyan ijre kpɔlɛ'm be kwlaa su be di'n sa.

¹⁰ Awe su kun-man be kun, nzue we su kun-man be kun, aunngban'n b'ɔ lo fiaan'n nin wia'n be su yo-man be like fi. Afin m bɔ n si be aunnvuɛ'n, n ´kle be atin, n ´fa be n ´sin nzue ti'm be su be ´nɔn nzue .

¹¹ Lika nga be ti oka-oka'n, n ´trutru be nun be ´kaci atin, n ´yo atin'm be uflɛ.

¹² Be yɛ be ´ba yɛ, be fin mmua, wie'm be fin mɛn'n i nglo lɔ, wie'm be fin wia atɔliɛ, wie'm be fin mɛn'n i ngua lɔ Ezipt lɔ.

¹³ Nyanmiɛn su lɔ lika, bo ndɛ, asiɛ, bo sro, oka mun, amun `to jue. Afin min Anannganman n fɔnvɔ min nvle nunfuɛ mun, n si be nga be ti nyrɛnnɛnfuɛ'm be aunnvuɛ.»

Min liɛ'n, ń wla fi-man amun su

¹⁴ Zerizalɛmfuɛ'm be seli kɛ: «Anannganman kpɔcili ye, e Min'n i wla fili ye su.»

¹⁵ Anannganman tɛli su kɛ: «?Bla ta kun wla fi i wa'n su? ?Ɔ si-mɛn i bɔbɔ i klun ba'n i aunnvuɛ? Kannzɛ i wla fi i wa'n su bɔbɔ'n, sanngɛ min liɛ'n, mín wla su fi-man amun su le.

¹⁶ Amun `nian, n fali amun dunman'n klɛli mín sa klun, n wun amun klɔ'n i wun talɛ'n tititi.

¹⁷ Amun mma nga be wa kplan amun klɔ'n i uflɛ'n, be kan be wun be ba ndɛndɛ. Be nga kusu bɔ be sacili i'n, b'ɔ man ɔ kacili kɛ aawlɛ flɛnnɛn sa'n, be su wanndi amun kɔ.

¹⁸ Amun `man amún nyin'n su be nian-nian, amun mma'm be kwlaa b'a yia be su ba amún sin.» Anannganman seli ekun kɛ: «N kan m bɔbɔ min ti! Sɛ be ti bé wun wlawlalɛ like'n, wuun amun ´fa be wlawla amún wun. Sɛ be ti kplo'n, wuun n ´se kɛ amun ´fa be ci amun afiɛn kɛ bla kun b'ɔ su kɔ aja'n ɔ fɛ i cisu ci i afiɛn'n sa.

¹⁹ Amun lika bɔ b'a bubu'n, amun klɔ'n bɔ ɔ'a bo'n, amun mɛn'n bɔ ɔ'a saci'n, ɔ cɛ kaan-an, i nunfuɛ'm be su sɔn-man nun kun, yɛ be nga be yo bɔ amun nunnun'n, be ´kɔ mmua.

²⁰ Ba'm bɔ be wuli be amun sin'n, be ´se amun kɛ: ‹Lika'n ti kaan, ɔ ju-man ye, amun `su siɛn nan e `nyan tranwlɛ.›

²¹ Amun wa usa amún wun kɛ: ‹?Wan yɛ ɔ wuli ba nga mun mannin ye-ɔ? Afin e liɛ'm be fili é sa. E yoli klun kpanfuɛ. Be fali ye ɔli mɛn uflɛ nun, be kannin ye bo. ?Yɛ ba nga mun'n, wan yɛ ɔ tali be-ɔ? E ba kunngba yɛ e trannin sa lele-ɔ. ?Kɛ ɔ ´yo sɔ'n, wuun ba nga'm be o nin?› »

²² Anannganman Nyanmiɛn'n wan yoo: «Amun `nian, m ´man ń sa'n su nvle-nvle'm bé su, n ´kplan min flanga'n, n ´kaci i nyin mɛnmɛn'n bé su. Yɛ be ´fa amun mma yasua mun bé sa su be ´ba. Be ´fa amun wa bla mun be wati su be ´sa bé sin ba.

²³ Famiɛn'm be wa kaci amún si, yɛ bé yi'm be wa ta amun. Be ´koto yɛ be ´utu bé nyin ase amún bo, be ´tafitafi amun ja wun ndutre'n, yɛ amun wa wun i wlɛ jrɛiin kɛ min yɛ n ti Anannganman nin-ɔn. I liɛ'n, be nga be ´fa bé wla gua min su'n, nyannzuɛn su kun-man be.

²⁴ ?Like nga safunyrɛn'n ɔ fali'n, be ´de i sa nun? ?Sran ng'ɔ sie sran mun'n, b'ɔ tin be su'n, i bisuafuɛ'n ɔ ´flo i sa nun?

²⁵ Ɛɛn, sran nga safunyrɛn'n trɛli i'n, ɔ ´flo i sa nun, like nga be bɔ be sie sran mun kekle su'n be fali'n, be ´de bé sa nun. E nin amun kpɔfuɛ mun e ´kun, yɛ n ´de amun mma mun, Anannganman yɛ ɔ kan sɔ-ɔ.

²⁶ N ´yo man be nga be kle amun yalɛ'n, be ´di be bɔbɔ be wunnɛn'n, yɛ be ´nɔn be bɔbɔ be mmoja'n be ´bo kɛ be nɔn nzan lɔflɛ'n be bo'n sa. Yɛ sran'm be kwlaa be ´si kɛ min Anannganman min yɛ n de amun-ɔn, yɛ be ´si kɛ min bɔ n ti Zakɔb i Nyanmiɛn bɔ n kwla'n, min yɛ n kpɔ amún ti-ɔ.»