Ezai 48 - NYANMIƐN NDƐ'N 1998

Anannganman bo sa uflɛ'm bé su ekun

¹ Zakɔb osu'n nunfuɛ mun, amun bɔ Izraɛl dunman'n wo amun su'n, amun bɔ amun ti Zida i osu'n nunfuɛ mun'n, amun bɔ amun fa Anannganman i dunman'n ta nda'n, amun bɔ amun bo Izraɛl Nyanmiɛn'n i dunman'n, bɔ amun di-man nanwlɛ, yɛ amun yo-man sa i nuan su'n, amun `sie amún su be `tie.

² Amun bɔ Nyanmiɛn i klɔ'n i dunman'n wo amun su'n, amun bɔ amun kisa Izraɛl Nyanmiɛn bɔ i dunman yɛlɛ Anannganman b'ɔ sie mɛn wunmuan'n i su'n, amun `tie ndɛ nga.

³ Sa klikli nga be juli'n, n dun mmua n kannin be ndɛ lalaa kpa. Be fin min nuan fiteli. N kali lɛ n yoli be, kpɛkuun be nuan yiali.

⁴ Kɛ bɔ n si kɛ amún nyin ti kekle'n nan amun anwlɛn'n ti ketewa, nan be bli amun-ɔn ɔ bli-man'n,

⁵ i ti n dun mmua m boli sa sɔ'm be su n kleli amun lalaa. N dun mmua n kan kleli amun nan b'a ju, kɛ ɔ ´yo nan amu'an se-man kɛ: «Ye amuɛn mun yɛ be dili junman sɔ mun-ɔn, e waka sran mun annzɛ ye amuɛn nga be fali aaba yoli be'n yɛ be kannin sa sɔ mun yɛ be yoli be'n ti.»

⁶ Amun tili sa nga m boli be su'n, yɛ amun wun kɛ i kwlaa'n i nuan yiali. ?Yɛ amun su kan-man sa sɔ mun kle-man sran? Kɛ ɔ fin ndɛ'n, n ´kle amun sa uflɛ bɔ n fiali bé su bɔ amun si-man be'n.

⁷ Nán laa sa mun-ɔn, sanngɛ blɛ li yɛ be su wa ju-ɔ. Lele b'ɔ ´fa ju ndɛ yɛ'n, amun `nian ti-mɛn i le. I ti amun kwla se-man kɛ: «E si be kpa!»

⁸ B'a kan kle-man amun, amu'an ti-man nun ndɛ fi, amún su wa ti-man nun mlɔnmlɔn. Afin n si kɛ amun ti gblɛfuɛ. Kɛ amun wo amún nin klun bɔbɔ'n, be flɛ amun kɛ: Nyin Keklefuɛ mun.

⁹ Kɛ n ti Nyanmiɛn'n ti'n, n ´yaci ya. Min nyrun bɔ n lɛ i'n ti, n ´tra min anwlɛn amún wun, yɛ n su nunnun-man amun kun.

¹⁰ M'an fa-man sin yɛ n yili amun nun fiɛn'n kɛ be fa sin be yi jɛtɛ ufue'n i nun fiɛn'n sa-a, sanngɛ nyrɛnnɛn yɛ n fa sali amun n niannin-ɔn.

¹¹ Sa ti bɔ n yoli sɔ'n, m bɔbɔ min dunman'n ti-ɔ, afin n klo-man kɛ n dunman'n ɔ yo finfin like. N fa-man min nyrun bɔ n lɛ i'n m man-man sran.

Sran ng'ɔ wa yia Anannganman i sa ng'ɔ jajali'n i nuan'n

¹² Anannganman waan: «Amun Zakɔb osu'n nunfuɛ mun, amun Izraɛlfuɛ bɔ n flɛli amun'n, amun tie ndɛ nga n kan'n! M bɔbɔ min yɛ n ti ninnge'm be kwlaa be klikli nin-ɔn, yɛ kusu min yɛ n ti be kwlaa be kasiɛn nin-ɔn .

¹³ M bɔbɔ yɛ n fali mín sa n wlali asiɛ'n i bo ase-ɔ, sɛ nyanmiɛn ng'ɔ la nglo lɔ plaii yɛ'n o ti bɛ'n, wuun n ´se kɛ m bɔbɔ yɛ n fali min sa n tinngɛli nun-ɔn. Sɛ asiɛ'n nin nyanmiɛn'n be ti sran'n, wuun n ´se kɛ, kɛ m bo be dunman cɛ'n, kpɛkuun be ba likawlɛ.

¹⁴ Amun kwlakwla amun `yia, yɛ amun `tie! ?Amun nun'n, wan mun yɛ be dun mmua boli sa nga'm be su-ɔ? Sran sɔ'n, n klo i, ɔ wa yia sa nga min waan ɔ ´fa yo Babilɔnifuɛ mun'n i nuan, yɛ i sa wa ´ti Kaldefuɛ mun.

¹⁵ Min bɔbɔ, min yɛ m boli i ndɛ su-ɔ. I sin, n flɛli i, yɛ n yoli man ɔ bali. Sa ng'ɔ wa yo'n ɔ ´yo ye.

¹⁶ Amun `mantan min wa, nan amun `tie! Kɛ ɔ fɛ i bo bolɛ nun'n, m'an fia-man ndɛ fi su. Kɛ sa sɔ'm be ´bo bé bo'n, wuun n wo lɛ.» (Yɛ siɛn'n, Anannganman Nyanmiɛn'n yɛ ɔ'a sunman min-ɔn, ɔ fɛli i Wawɛ mannin min.)

Ɔo! Sɛ ɔ ti kɛ amun sieli amún su n nuan bo'n, wuun nɛ́n i-ɔ!

¹⁷ Anannganman b'ɔ kpɔ amún ti'n, b'ɔ ti Izraɛl Nyanmiɛn'n, i ndɛ b'ɔ kan'n yɛ, i waan: «Min Anannganman bɔ n ti amun Nyanmiɛn'n, n kle amun like, amun bɔbɔ amún kpa yolɛ ti yɛ n kle amun-ɔn. Min yɛ n kle amun atin ng'ɔ fata kɛ amun sin nun nin-ɔn.

¹⁸ Sɛ ɔ ti kɛ amun sieli amún su mmla nga m mannin amun'n i bo'n, wuun amun ´di alaje. Sɛ alaje sɔ'n ti nzue'n, wuun n ´se kɛ ɔ ´yo kɛ nzue ba kun b'ɔ sonji kpuu b'ɔ kpɛ-man'n sa. Sɛ ɔ ti kɛ amun sieli amún su mmla sɔ'n i bo'n, wuun amun ´nyan muae. Sɛ muae sɔ'n ti jenvie'n, wuun n ´se kɛ ɔ ´bo gua cenje'n su tititi.

¹⁹ Sɛ amun yoli sɔ'n, wuun amun osu'n nunfuɛ'm be ´sɔn kɛ aunnyan sa, wuun amun mma'm be ´sɔn kɛ jenvie nuan aunnyan'n sa, yɛ be dunman'n su nunnun-man ń sa nun le .»

Amun `jaso Babilɔni lɔ

²⁰ Amun `fin Babilɔni klɔ'n nun fite, amun `jaso Kaldefuɛ'm be afiɛn be `wanndi. Amun `bo sro. Amun `bo jasin fɛ sɔ'n, amun `kan man be ti. Amun `kan man ɔ ju asiɛ'n i awieliɛ lɔ. Amun `se kɛ: «Anannganman kpɔli Zakɔb i osu'n nunfuɛ mun bɔ be ti i sufuɛ'n bé ti.»

²¹ Asiɛ kee b'ɔ ´fa be ´sin nun'n, nzue we su kun-man be lɔ. Ɔ ´yo man nzue ´fin yɛbuɛ'n nun fite ɔ ´fa man be. Ɔ ´kpaci yɛbuɛ'n nun, kpɛkuun nzue'n su nyrɛn.

²² Anannganman waan: «Be nga be lafi-man min su'n, bɔ be fa-man min mmla'n su'n, bé wun jɔ-man be le.»