Ezai 47 - NYANMIƐN NDƐ'N 1998

Babilɔni i ase kanlɛ ndɛ

¹ Babilɔni, sɛ a ti bla'n, wuun n ´se kɛ: «Ɔ bɔ a ti talua bɔ a si-man bian'n, jra, tran ase ndutre'n nun. Kaldefuɛ'm bé wa bla, tran ase asiɛ wun, afin a ti-man famiɛn kun. Be su flɛ-man wɔ kɛ Babilɔni Klanman kun. Be su flɛ-man wɔ kɛ Babilɔni Klanman Lɛkɛlɛkɛ kun.

² Fa yɛbuɛ dandan nnyɔn fa si ble'n nan yi i sanmlɛn, yi tannin'n b'ɔ kata ɔ nyrun'n, man ɔ tralɛ tɛnndɛn i ngua'n su, tike ɔ́ ja'm be su nan kpɛ nzue ba mun.

³ Be ´wun ɔ́ bo, a ´wun nyannzuɛn, n ´tu n klunngbɔ'n, sran fi su kan-man ndɛ.

⁴ Be flɛ e ti kpɔfuɛ'n kɛ Anannganman b'ɔ sie mɛn wunmuan'n, yɛ Izraɛl Nyanmiɛn.

⁵ Kaldefuɛ'm bé wa bla, tran ase diin, yɛ fia aosin'n nun! Be su flɛ-man wɔ kɛ Famiɛn Diwlɛ'm Be Nun Dan'n kun.

⁶ N fali min nvle'n nunfuɛ'm be wun ya, n yoli min sran sɔ'm be finfin, n yili be m mannin wɔ. W'a si-man be aunnvuɛ, yɛ sielɛ nga a sieli sran oke mun'n, ɔ yoli kekle.

⁷ A seli kɛ: ‹N ´sie mɛn'n tititi. A bu-man ninnge nga a yo be'm be akunndan, ɔ'a kpɛn-man ɔ klun kɛ cɛn kun be ´wie.

⁸ Mmo b'ɔ klo mɛn dilɛ'n, b'ɔ tran ase fouun'n, bɔ i klun ti-mɛn i'n, b'ɔ se i klun lɔ kɛ: ‹M bɔbɔ min'n, sran fi nin min sɛ-man'n, n su di-man angboti le'n, min mma'm be su fi-man mín sa le'n,› sie ɔ su siɛn'n.

⁹ Ɔ nyin bɔ a ´bo i bla-a, sa nnyɔn nga be o yɛ'n b'a ju wɔ su wia ba kunngba bo: ɔ mma'm be ´fi ɔ́ sa, yɛ a ´di angboti. Sa sɔ'm be ´ju ɔ su kekle kpa. Kannzɛ a ´yi wunnzue o, kannzɛ a ´di bae o, ngbɛn-ɔn !

¹⁰ A lafili ɔ klunwi'n su, a seli kɛ: ‹Sran fi wun-man min.› Ɔ ngwlɛlɛ'n nin ɔ silɛ'm be lakali wɔ. A seli ɔ klun lɔ kɛ: ‹M bɔbɔ min'n, sran fi nin min sɛ-man.›

¹¹ Nyrɛnnɛn sa kun wa tɔ wɔ su, a su si-mɛn i finwlɛ. Sa kekle kun wa tɔ ɔ su, a su kwla yi-mɛn i ɔ́ su. Yalɛ'n wa fu ɔ nun, ɔ ´di wɔ.

¹² Ka ɔ bae dilɛ'n su, nán yi i ase. Nán yaci ɔ wunnzue yilɛ kpanngban'n. Ɔ junman nga a dili be ɔ kaan nun'n be yɛlɛ like ng'ɔ o lɛ mun. Wienun-ɔn a wa nyan nun muae, wienun-ɔn a wa yo tinwafuɛ.

¹³ A kleli ɔ́ wun yalɛ yili wunnzue mun lele. Be nga be nian nyanmiɛn b'ɔ la nglo lɔ plaii'n su be yi wunnzue'n, be nga be nian nzraama'm be su be yi wunnzue'n, be nga be nian anglo su be yi wunnzue'n, man be yi bé wun nglo nan be de wɔ.

¹⁴ Nian, be ti kɛ ijre bɔ sin yrɛ i'n sa, be kwla de-man bé wun sin taaman'n i sa nun, nán sɛnmlɛn bɔ be fa tɔn kpaun nin-ɔn, nán sin bɔ be trɛn i wun be tɔn sin nin-ɔn.

¹⁵ Nian, be nga bɔ a kleli ɔ́ wun yalɛ suli bé su lele'n, b'ɔ a sinnin bé sin ko yili wunnzue lele i nun bɔ a tɛ yo kaan'n, kɛ be agualiɛ'n ɔ ´yo kɛ ng'ɔ o lɛ'n sa. Be ´wlan-wlan sa vaa, nga ´kɔ wa nga ´kɔ wa, sran fi su de-man wɔ.»