Ezai 44 - NYANMIƐN NDƐ'N 1998

¹ Sanngɛ siɛn'n, amun Zakɔb i osu nunfuɛ bɔ amun ti min sufuɛ'n, amun Izraɛlfuɛ amun yɛ n kpali amun-ɔn, amun `sie amun su.

² Min Anannganman bɔ n yili amun'n, bɔ m boli amun falɛ nan b'a wu amun'n, bɔ n ti amun ukafuɛ'n, min wan yoo: «Zakɔb i osu'n nunfuɛ'm bɔ amun ti min sufuɛ mun'n, Izraɛlfuɛ mun bɔ n kpali amun'n, nán srɛ kun amun.

³ Afin n wa yo man nzue ´tran mɛn nga nzue we kun i nun sran mun'n i nun. Yɛ n wa yo man nzue ba'm be ´sonji asiɛ kee'n nun. N ´fa min wawɛ'n m ´man amun osu'n nunfuɛ mun, yɛ n ´yo amun mma'm be ye .

⁴ Sɛ be ti waka'n, wuun n ´se kɛ be ´fɛfɛ, yɛ be ´nyin ijre'm be afiɛn kɛ sol waka bɔ be o nzue ba'm bé nuan'n sa.

⁵ Kun ´se kɛ: ‹N ti Anannganman i liɛ.› Sran uflɛ ´se kɛ ɔ ´fa Zakɔb i dunman'n, yɛ sran kun ekun ɔ ´klɛ i sa'n su kɛ: ‹N ti Anannganman i sran.› Yɛ ɔ ´fa Izraɛl i dunman'n ɔ sie i su.»

Anannganman wɔ amuɛn'm be safle

⁶ Anannganman b'ɔ ti Izraɛl famiɛn'n, b'ɔ kpɔli Izraɛlfuɛ'm bé ti'n, b'ɔ sie mɛn wunmuan'n, i waan: «Min yɛ n ti ninnge'm be kwlaa be klikli'n nin be kasiɛn nin-ɔn. Nyanmiɛn fi nun-man mín sin kun .

⁷ ?Wan yɛ ɔ nin min sɛ-ɔ? Man ɔ kan nan ɔ tutu nun wein wein kle min. Man ɔ kan sa nga b'a ju kɛ n fali nvle nga nunfuɛ mun n sieli i lɛ i bo bolɛ lɛ nun lele b'ɔ fa ju yɛ'n. Yɛ kusu man ɔ yi sa nga be wa ju'n be nglo.

⁸ Nán srɛ kun amun, yɛ nán amun usu. ?M'an kan-man sa sɔ mun m'an kle-man amun laa? ?M'an bo-man bé su m'an kle-man amun? ?Nyanmiɛn uflɛ o mín sin ekun? Amun ti min lalofuɛ: Yɛbuɛ uflɛ fi nun-man lɛ kun, n si-man wie fi kun.»

Be nga be sɛ amuɛn ba mun'n

⁹ Be nga be yi amuɛn ba mun'n, nán like fi yɛlɛ be. Yɛ be ninnge nga be yi be'n, be ti ninnge ngbɛn-ngbɛn mun. Ninnge sɔ'm be nun'n, nga be waan be ti nanndoliɛ bɔbɔ'n, be kwla fa yo-man sa ye. Be nga be yi amuɛn mun'n, be ti be ninnge sɔ'm be lalofuɛ. Amuɛn sɔ'm be wun-man ase, yɛ be si-man sa fi. I ti'n, nyannzuɛn kun be nga be yi be'n.

¹⁰ ?Amuɛn bɔ be kpɛ be ba'n, nin amuɛn bɔ be klo like kɛ blalɛ sa be fa yi be'n, bɔ sanngɛ be kwla yo-man sa ye'n, be yolɛ tre?

¹¹ Be nga be yi ninnge sɔ mun'n, be kwlaa'n be ´wun nyannzuɛn. Be nga be di junman sɔ'n be ti sran. Kannzɛ man be kwlaa be tian bé nuan nan be bla, srɛ ´kun be yɛ nyannzuɛn ´kun be.

¹² Kɛ blalɛ bofuɛ'n ɔ ´bo kpɛliɛ'n, ɔ wlɛ i sin nun. I kunngba nin-ɔn, kɛ ɔ ´yi amuɛn'n kɛ ɔ yo i sɔ-ɔ, i sin ɔ fa marto finfin su. Ɔ fɛ i wunmiɛn'n kwlaa yɛ ɔ fa yo-ɔ. Sanngɛ kɛ awe kun i'n, kpɛkuun ɔ lɛ-man wunmiɛn kun, yɛ sɛ ɔ'a nɔn-man nzue'n, kpɛkuun ɔ su fɛ.

¹³ Waka sɛfuɛ'n ɔ sunnzun waka nin nyanman, ɔ fa laklɛ fa jaja amuɛn ba'n i wafa'n, yɛ ɔ fa soma fa sɛ, kpɛkuun ɔ fa like kpitɛ i wun ɔ yo mlɔnnɔnnɔnnɔn. Ɔ yo like sɔ'n kɛ sran sa, ɔ yo i nyrun klanman kɛ sran'm be liɛ'n sa, yɛ ɔ fɛ i sie sua kun nun.

¹⁴ Ɔ kpɛ sɛdri waka'n wie. Ɔ sie sɛni waka wie mun nin terebɛnt waka wie'm be nzɔliɛ sie waka'm be nun bo nun lɔ. Ɔ ta pɛn waka mun, yɛ nzue'n man be nyin.

¹⁵ Yɛ sran'n ɔ trɔ waka sɔ mun. Ɔ fa wie, ɔ kplɛ i nuan tɔn sin. Ɔ trɔ wie fa tɔn kpaun. Yɛ ɔ fa wie yo amuɛn, ɔ koto i bo. Ɔ fa wie sɛ waka sran, ɔ su i.

¹⁶ Ɔ trɔ waka sɔ'n i bue, ɔ fa tɔn nnɛn, ɔ nyintɔn nnɛn su ɔ di, i ku yi. Yɛ ɔ tɔn sin'n, ɔ se kɛ: «Wuun! N su tɔn sin, kɛ n wun sin taaman'n, ɔ yo min fɛ!»

¹⁷ Ɔ fɛ i onga'n fa yo amuɛn, ɔ fa sɛ waka sran, ɔ su i, ɔ koto i bo, ɔ kpan flɛ i. Ɔ se kɛ: «De min! Afin wɔ yɛ n sɔ wɔ-ɔ.»

¹⁸ Be nga be yo sɔ'n, be si-man sa fi, be lɛ-man ngwlɛlɛ fi. Be nyinma'n ti katawa, i ti be wun-man ase. Be akunndan'n su ti katawa, i ti be wun-man sa wlɛ.

¹⁹ Be wie fi lɛ-man akunndan, be wie fi si-man sa, be wie fi lɛ-man ngwlɛlɛ b'ɔ ´se kɛ: «N fali waka'n i wie n trɔli sin, yɛ n tɔnnin kpaun sin sɔ'n i sɛnmlɛn'n su, n nyintɔnnin nnɛn su n dili. Kpɛkuun m'an fɛ i onga'n m'an yo tete like! M'an koto waka losin'n i bo!»

²⁰ Cuekee, be fa be wla gua like b'ɔ ti kɛ nzuɛn sa'n i su. Sa bɔ be wun-mɛn i wlɛ'n ti b'a mlin. Be amuɛn'n ɔ de-man be. Kusu be bɔbɔ be usa-man bé wun kɛ: «Nán like ngbɛn li yɛ ɔ o min sa nun yɛ?»

Nán amun wla fi su kɛ amun ti min sufuɛ

²¹ «Zakɔb i osu'n nunfuɛ mun, Izraɛlfuɛ mun, man amún wla kpɛn sa nga su: amun ti min sufuɛ mun, n yili amun kɛ amun yo min sufuɛ mun, Izraɛlfuɛ mun, ń wla fi-man amun su.

²² N nunnunnin amún sa tɛtɛ mun kɛ nyanmiɛn ble'n b'ɔ wie fiakaa'n sa. N nunnunnin amún tɛ mun kɛ lika b'ɔ mlan kpɛkuun ɔ titi weiin'n sa. Amun `sa amun sin m bɔ n ti amun Min'n min wun wa, afin n kpɔli amun ti.

²³ Nglo lɔ lika mun, amun `bo ndɛ! Afin min Anannganman m'an di junman. Asiɛ'n bo lɔ lika mun, amun `bo sro. Oka mun, amun `bo ndɛ. Bo mun, amun nin amun nun waka mun, amun kusu, amun `bo ndɛ. Afin min Anannganman m'an kpɔ Zakɔb osu'n nunfuɛ'm be ti, yɛ m'an yi Zakɔb i nyrun b'ɔ lɛ i'n i nglo Izraɛl mɛn'n nun.»

Mɛn'n i yifuɛ'n ɔ si mɛn wunmuan'n i bo ndɛ

²⁴ Anannganman b'ɔ kpɔli amun ti'n, b'ɔ boli amun falɛ nan b'a wu amun'n, i waan: «Min Anannganman, min yɛ n yili ninnge'n kwlaa-a. Nyanmiɛn ng'ɔ la nglo lɔ plaii'n, sɛ ɔ ti bɛ'n, wuun n ´se kɛ min yɛ n tinngɛli nun-ɔn. Sɛ asiɛ'n ti tannin'n, wuun n ´se kɛ min yɛ n trɛli nun-ɔn.

²⁵ Ato nzɔliɛ nga be kan be ndɛ'n min yɛ man be kpɛ be bo-ɔ. Min yɛ n yo man wunnzue yifuɛ'm be kan ndɛ finfin mun nin-ɔn. N ´yo man ngwlɛlɛfuɛ'm be ´cuɛn kɔ siɛn, yɛ bé sa nga be si i'n, ɔ ´kaci sinnzin like .

²⁶ Ndɛ nga min sufuɛ'm be kan'n, n jran su. Yɛ sa nga min sunmanfuɛ'm be jaja'n, n yiɛ i nuan.» N se kɛ: «Sran'm be ´tran Zerizalɛm klɔ'n nun ekun.» Yɛ n se ekun kɛ: «Zida klɔ'm be kusu, be ´kplan be uflɛ.» M ´man be talɛ nga be bubuli'n be su ekun.

²⁷ N se jenvie dan'n kɛ: «Wu kee, man ɔ nzue'n wie nun.»

²⁸ N se kɛ: «Siris ti min bua'm be tafuɛ! Ɔ ´yo min klun sa'n kwlaa. Ɔ ´se kɛ be kplan Zerizalɛm klɔ'n i uflɛ, yɛ ɔ ´se kɛ be yo min Nyanmiɛn min sua'n ekun .»