Ezai 43 - NYANMIƐN NDƐ'N 1998

¹ Ee! Zakɔb osu'n nunfuɛ mun, ee! Izraɛlfuɛ mun, Anannganman b'ɔ yili amun'n, siɛn'n i wan yoo: «Nán srɛ kun amun, afin n toli amun, n fali amun dunman'n yɛ n fa flɛli amun-ɔn. Amun ti min liɛ.

² Sɛ amun ´sin nzue nyin su-ɔ, min nin amun yɛ e ´sin-ɔn. Sɛ amun ´kpɛ nzue ba mun'n, be su mɛn-man amun. Sɛ amun nanti sin nun'n, ɔ su yra-man amun, yɛ sin taaman'n su yo-man amun like fi.

³ Afin n ti Anannganman amun Nyanmiɛn, n ti Izraɛl Nyanmiɛn, min yɛ n de amun-ɔn. N ´fa Eziptfuɛ mun m ´man kɛ amún ti kpɔlɛ like sa. N ´fa Etiopifuɛ mun nin Sebafuɛ mun n ´kaci amun.

⁴ Kɛ bɔ amun lɛ nyrun dan min nyrun'n, kɛ bɔ m bu amun sran'n, kɛ bɔ n klo amun'n ti, n ´fa sran'm n jran amun ajalɛ nun, n ´fa sran kaci amun.

⁵ Nán srɛ kun amun, afin n jin amun sin. N ´fa amun osu'n nunfuɛ mun wia afiliɛ lɔ ´ba. Yɛ n ´ko yia amun wia atɔliɛ lɔ amun ´ba, amun ´kan bo nun.

⁶ Sɛ mɛn'n i nglo lo lika'n ti sran'n, wuun n ´se i kɛ: ‹Yaci be nun!› Yɛ n ´se ngua lɔ lika liɛ'n kɛ: ‹Nán tra be nun! Amun `fa min wa yasua mun mmua lɔ bla, amun `fa min mma bla mun asiɛ'n i awieliɛ lɔ bla.

⁷ Be nga n dunman'n wo be su'n, be kwlaa nga n yili be'n, bɔ m boli be n jrɛli i wa'n, bɔ n yoli be kɛ be manman min'n, amun `fa be sa bé sin `bla.› »

Min lalofuɛ yɛlɛ amun

⁸ Nvle bɔ i nunfuɛ'm be nyinma'm be o lɛ bɔ sanngɛ be wun-man ase'n, bɔ bé su'm be o lɛ bɔ sanngɛ be ti-man sa'n, man be yi be fite wa.

⁹ ?Man nvle-nvle'm be nunfuɛ'm be yia, man mɛnmɛn'm be nunfuɛ'm be tian bé nuan, be nun onin yɛ ɔ boli sa nga su-ɔ? ?Wan mun yɛ be kannin sa klikli'm bé wun ndɛ kleli ye-ɔ? Man be yi be lalofuɛ mun bla, man be kpli bé ti, man be ti be ndɛ nga be ´kan'n nan b'a kwla se kɛ: «Ɔ ti nanwlɛ!»

¹⁰ Anannganman waan: «Amun yɛ amun ti min lalofuɛ mun-ɔn. Amun ti min sufuɛ, amun yɛ n kpali amun-ɔn. Kɛ ɔ ´yo nan amu'an lafi min su, nan amu'an ´si sɔ, nan amu'an wun i wlɛ kɛ min yɛ n wo lɛ'n ti. Like fi nun-man min nyrun, like fi nun-man n sin.

¹¹ Min-ɔn, min kunngba cɛ yɛ n ti Anannganman nin-ɔn, defuɛ wie fi nun-man mín sin kun.

¹² Min yɛ n kannin sran'm be delɛ'n i ndɛ nin-ɔn, min yɛ n de be-ɔ, min yɛ n dun mmua m boli su laa-a. Amuɛn'm bɔ be o amún sa nun'n, bɔ amun ko tuli be mɛn uflɛ nun'n, nán be nun wie-ɔ. Amun ti min lalofuɛ, amun si kɛ min yɛ n ti Nyanmiɛn nin-ɔn. Min Anannganman yɛ n kan sɔ-ɔ.

¹³ N ti sɔ laa lele yɛ ɔ'a ju yɛ. Sran fi kwla de-mɛn i sɔ yolɛ'n mín sa nun. Sɛ n yo like kun'n, sran fi kwlɛ-mɛn i kaci.»

N ´sunman sran kun amun dunman nun

¹⁴ Anannganman b'ɔ kpɔ amun ti'n, b'ɔ ti Izraɛl Nyanmiɛn'n waan: «Amun ti yɛ n sunmannin sran kun Babilɔni lɔ nin-ɔn. N ´yo man lɔfuɛ'm be kwlaa be ´wanndi be ko fia be mmeli'm bɔ be fa di be nuan laa'n be nun.

¹⁵ N ti Anannganman amun Nyanmiɛn, min nzuɛn nin klɔ sran liɛ'n ti-man kun min yɛ n yili Izraɛlfuɛ mun-ɔn, n ti amun famiɛn.»

Atin uflɛ kun wo aawlɛ flɛnnɛn'n nun

¹⁶ Laa, Anannganman tikeli atin kun jenvie'n nun, ɔ yili atin nzue kploun'n nun.

¹⁷ Laa, Anannganman yoli man sonja kpanngban kpa wie mun nin alɛ kunfuɛ bɔ be si alɛ kun kpa'n be nin kakaklolo mun nin nnɛn kpanngɔ mun be fali atin'n kɛ be ´ko kun alɛ. Kpɛkuun be tɔli, b'a jaso-man kun, be nunnunnin, be yrali kɔlikɔli kɛ kannin nyanman sa. Siɛn'n, Anannganman waan:

¹⁸ «Nán amun bu sa nga be juli laa'n be akunndan kun. Nán man laa ninnge sɔ'm be lo amun kun.

¹⁹ Amun `nian, n wa yo sa uflɛ kun, be su wun i bue nuan bɔbɔ. ?Amun su ´wun-mɛn i wlɛ? N wa tike atin kun aawlɛ flɛnnɛn'n nun, yɛ n wa yo man nzue ba'm be ´sonji asiɛ kee'n nun.

²⁰ Blo nnɛn mun o, nsoso mun o, klɔnsoklo mun o, be ´manman min, afin n ´yo man nzue ´tran aawlɛ flɛnnɛn'n nun, yɛ nzue ba'm be ´sonji asiɛ kee'n nun nan min nvle'n nunfuɛ mun bɔ n kpali be'n be `nyan nzue be `nɔn.

²¹ Min nvle nunfuɛ bɔ n yili be'n, be ´manman min.»

Nyanmiɛn nin Izraɛlfuɛ'm be ndɛ'n

²² Anannganman waan: «Ee! Zakɔb osu'n nunfuɛ mun, nán min yɛ amun kpan flɛli min-ɔn! Afin Izraɛlfuɛ mun, n flannin amun!

²³ Nán min yɛ amun fali amun bua nga b'a kpɛ cro'n yili tɛ nga be yra be nnɛn'n kɔlikɔli'n mannin min-ɔn. Nán min manmanlɛ ti yɛ amun yili amun tɛ sɔ mun-ɔn. I kusuman m'an mian-man amun kɛ amun man min like, m'an su-man amun su kɛ amun man min ansans.

²⁴ Nán kɛ amun fali amun sika toli like fanninfannin mannin min-ɔn. Nán kɛ amun fali amun tɛ'm be nnɛn'm be lui'n mannin min n dili-ɔ. Sanngɛ amún sa tɛ bɔ amun yoli'n be ti, m miannin sa fii, amun fɔnlɛ bɔ amun fɔnnin'n, ɔ kleli min yalɛ kpa.

²⁵ M bɔbɔ min yɛ n yaci amún sa tɛtɛ mun n cɛ amun-ɔn. Mín wla su kpɛn-man amún sa tɛ'm be su kun le.

²⁶ Amun `kan sa nga amun wunnin i mín wun'n ekun, man e bue nnyɔn'n e `niɛn i likawlɛ. Amun `kpli amún ti man e nian.

²⁷ Laa amun nannan klikli'n ɔ yoli sa tɛ, yɛ be nga be ijɔ amun nuan'n, be jasoli mín wun.

²⁸ I sɔ'n ti yɛ n yoli man be nga be ti min sua'n nun lɔ kpɛnngbɛn'n bé nyin guali ase nin-ɔn. I sɔ'n ti yɛ n sieli i kɛ be ´nunnun Zakɔb i osu'n nunfuɛ mun nin-ɔn. I sɔ'n ti yɛ Izraɛlfuɛ'm be kpɔfuɛ'm be kpɛli be nzowa nin-ɔn.»